出嚟做嘢,食死貓係預咗

 

 

職場上一定會遇到唔同類型嘅腦細同同事,每個人嘅性格都係獨一無異,所以相處方式都唔同,有人鍾意奉承,有人鍾意做實事,有人鍾意講八卦,如果你用死一招,一定好快比人KO,打唔到大佬,唯有局住見人講人話,見鬼講鬼話,始終工作上同人有好嘅關係,做嘢都會方便好多,因為就算你有能力,只要唔小心得罪咗一個人,都可以令你跌落無間地獄,永不翻身。

公司最大就係腦細Michael,乜都係佢話事,佢係富二代,除咗有錢同好吹得之外,都無乜一技之長,佢成日都問我有咩意見,初初我都傻豬豬咁畀好多建議佢,但後嚟我發現佢只係假民主,佢只係想聽到你話:「好,無問題,OK,哦,得!」佢要你認同佢嘅idea,全力支持,不要質疑。如果係有能力嘅leader當然無問題,可惜佢無料扮四條,又唔接受進諫,唯有大家攬炒不停做啲白費心機嘅嘢,最慘係佢有老人痴呆症,今日講完嘅嘢轉個頭就會唔記得。

「Brenda,條片加返中英文字幕,然後再拍一條關於公司新嘅產品插入去,而家果條唔夠update呀。」Michael說。
「但係咁樣改條片會好貴,我哋又無條原片,不如直接刪咗唔update嗰啲頂住先,等有多啲新產品再拍。」我說。
「梗係唔得啦,你照我意思做啦!」Michael說。

數小時後。。。

「條片我報咗價喇$18,000。」我說。
「咁貴!你刪咗唔update嗰啲咪得囉,洗乜搞咁多嘢,做人要識變通!」Michael說。
「嗯,OK。」我說。

以上呢啲情況久唔久都會發生,不外乎都係腦細叫我做A,然後我做咗,佢就話我做乜做A,當然我可以直接同佢講:「係你叫我做㗎喎你唔記得咗呀?」但係我咁講佢係唔會突然醒覺自己做錯咗,因為腦細係永遠唔會錯,佢只會覺得無面,然後更加嬲,話佢根本無咁講過,再喺其他事繼續為難我,所以如果唔係好大件事,呢啲死貓我都會選擇食咗佢。

初初出嚟做嘢都仲會同腦細鬥氣,或者覺得唔係我錯點解要認低威,但係撞過幾次板之後就開始改變處事方式,其實無話對與錯,只要自己覺得適合就可以,有時係會好唔gur,咪同同事呻兩句,寫下文發泄,放咗工又係一條好漢。喺職場上,懂得點樣同唔同類型嘅人溝通先係致勝之道,而呢一課,將要用畢生嘅時間嚟上。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 208474
Date: 2020-07-23 06:36:19
Generated at: 2020-08-11 05:11:47
Permalink: https://www.vjmedia.com.hk/articles/2020/07/23/208474/出嚟做嘢,食死貓係預咗