【現代巫師點滴】百日築基大長篇(第一章)——感化毒龍大作戰

文教 / 最新文章綜覽

 

 

大家好!好耐無出Post啦~

七月中嘅時候咁啱係冥王星最接近地球嘅時間,喺星相黎講,冥王星係掌管人嘅陰暗面,佢一靠近地球真係會將我地心底嘅創傷一鑊撬起!(你有無份爆炸呢?)其實喺小白白個Page到都透露左少少,我都經歷嘅啲深層傷痛大爆炸… 爆到七哂彩個隻~小白就今朝啱啱完結呢個回合,都有好大得著架~所以同大家開心些牙返啦。

話說小白最近同一位幾年無聯絡嘅朋友傾計,事源就係因爲開左個Page開心些牙嘅神怪野羅。呢位黃師兄(黃絲?)識好多野架,仲一直有自己研究佛經添。呢排佢見到我啲文,就令我地傾多左好多計。因爲兩個人之間嘅信念同知識有分歧,我地之間嘅磨擦亦隨之產生,上篇文《大戰風水佬》,黃師兄真係屌到我啪啪聲阿,仲因爲咁,我地兩條油就定立左《百日築基》大挑戰,每日花時間打掃自己身心,之後分享得著。(呢篇就係《百日築基大長篇(第一章)》啦,歡迎大家多多支持小白成長日記。)風水佬我呢單柒野就留返下次講,今次講嘅係新鮮滾熱辣,琴晚同黃師兄炒大鑊呢件事~

黃師兄係啲好嚴格嘅人黎,小白呢啲亂鳩黎嘅性格,成日都比黃師兄屌。琴晚又同黃師兄吹水,《百日築基》吹吹下佢分享返今日嘅自我打掃功課,佢講開一個呼吸法,我就提出意見話…

「下,唔好咁樣呼吸喎,咁樣唔係幾好架…」
「咩阿?你自己做事件A唔係都係咁咩?事情B呢?事情C呢?你答丫?你答丫??」
「一單還一單阿下,我好心提你架!」小白躁底了。
「事情A、B、C本質上有分別咩?你咪又係亂咁黎!」
「你爆鳩我做乜野阿?淨係識話我!」不停被批評嘅白白爆炸了。

 

小白真係好唔開心架,雖然白白有時做野真係甩甩漏漏咁,但出發點都係希望人地好架。好心提醒,唔接受意見不特止,仲要如數家珍咁數返哂白白啲柒野出黎,做咩啫… 雖然我知道黃師兄話我,都係希望我好嘅,只係唔知點解我地兩個真係火星撞地球。小白嬲到Unfollow左黃師兄IG添…

嬲左幾粒鍾之後,黃師兄就再Send左個訊息比我,叫我做今日清掃自己嘅功課(#你今日清左未呀?),雖然好唔情願,但我就拎左一粒水晶陪我沖涼,一路沖涼一路冥想思考。點知…

我開左個花洒,都未準備好開波之際,舊水晶入面就爆出左一條白色嘅龍,全身圍住紫色嘅毒霧。呢啲咁嘅情況,以前嘅小白就係一野打爆佢啦… 但係被黃師兄訓話左成個月之後,小白就乖乖地,嘗試用「慈悲心」去道化佢…

小白都未郁手,條龍就郁手先,不過唔係攻擊,佢喺我個腦入面塞左好多畫面,佢話可以令我盡享榮華富貴,又話可以比強大靈力我,條件就係要將佢由舊水晶到放出黎。呢啲咁低招嘅技量,小白當然唔會中計啦~之後我就問左一句:

「你個故事係點架?」
「哈哈哈哈!你真係想知?」
「係丫,我想知你個故事。你話我知啦~」

說時遲那時快,個畫面就轉左去古代一個祭祀嘅神殿入面,有一個好老嘅伯伯,著住一件灰色長袍,拎住一支柺杖,佢好慈祥咁望住啲小朋友喺到玩。

畫面突然又轉,去到一個好似研究室嘅地方,入面有好多玻璃燒杯,有幾個小朋友喺到周圍跑,其中一個撞跌左台上面嘅一個燒瓶,入面一條好靚嘅藍色魚跌左落地死左。伯伯見狀就嬲到炸開!佢發誓要令所有嘅小朋友死。

畫面又轉,伯伯落毒喺井水到,毒死左好多小朋友。但同時佢又諗,大人唔死,其實都係會生小朋友,咁咪搞唔掂?伯伯有呢個諗法之後,就開始風雲色變,個天到處落雷劈死啲人。

咁啲人都唔係傻嘅,見狀當然係起勢反抗啦,下一個畫面就轉左去阿伯伯比啲民眾隊霖左。但伯伯怨念太深了,憎恨甚至更進一步,佢憎哂成個世界,死左嘅佢就轉生成爲一條毒龍,佢殺哂成條村莊嘅所有人。

過左一段日子,因爲村莊嘅人已經死哂,毒龍好肚餓,想食人都無得食。有一個和尚路過呢條死寂嘅村莊,和尚見到條龍,微微笑咁坐左喺條龍面前,之後將自己嘅食物比左條龍食。如是者,和尚花左好長時間,不斷搵食物返黎餵養毒龍。

畫面又轉,毒龍突然間向和尚攻擊,但係和尚有護法嘅咒語,毒龍嘅攻擊啓動左個咒語,反彈傷害令條龍困左入一粒水晶入面。和尚見狀傷心慾絕,因爲佢覺得係自己嘅失誤,先會害到條龍被困水晶,和尚希望贖罪而自殺了,死之前佢發願,希望毒龍困喺水晶當中會思考自己嘅過錯,終有一日能夠超脫離苦…

 

睇到呢一幕,沖緊涼嘅小白白喊到PK,眼淚一直流,成個人跪左喺浴室。點解?點解和尚要咁做?點解和尚要自殺呢?爲左咩?故事未完,靜一靜之後我就繼續睇埋個故仔。

畫面返返黎現在,毒龍就好高傲咁望住我,佢好似身處喺盲點,完全唔明白和尚嘅好意。

「你知唔知道其實和尚係對你好好?你而家困住水晶入面係咎由自取,成千年你都無反省?」
「我…我知錯了!你不如放我出黎,我一定會改過架~!」毒龍雙眼發出紅色嘅光。
小白用念力打出一度金光,打穿左龍頭側邊嘅一啲雲霧,毒龍嚇左一跳。
「和尚同我其實都可以輕易收伏你!只係我地都無咁樣做,你知唔知點解?點解?因爲我地在乎你阿~」
毒龍開始軟化…
「就算你現在逃脫,死不悔改只會令事件重複,終有一日你會重覆呢一個悲慘結局。你知道出路係得一條架~」

毒龍諗左一陣…

「我…我唔想再係咁…」
「就咁咋?堅定啲啦!唔係嘅話無用架喎~」
「我想超脫!我想離苦得樂!我唔想再咁辛苦啦!」

呢個時候我嘅上師 彌勒菩薩 就喺我背後出現…

「可以了,之後交比我。」

 

彌勒菩薩比左指示,我就起願,送左一朵蓮花比毒龍,等佢可以同菩薩結緣,我將佢交左比菩薩,毒霧開始消散。但係當中出現左一條好可愛嘅白色龍仔,我估係條毒龍嘅元神掛…

「多謝你阿~我想陪住你,幫返你手~」條白龍仔把聲勁卡通。

佢飛左入去原本舊水晶入面,水晶個形象就變左一支水晶做嘅樹枝。呢個位,小白又喊到PK了… 幾分鐘前,小白先想一野打爆條龍就算,而家條龍仲話要幫返我轉頭,其實真係好慚愧…唉… 喊其實係好嘅,清理自己內在嘅好多傷痛… 個心都喊到覺得好空洞…

黃師兄教落,通常呢啲位,要將每次打掃完學到嘅野,放返入心入面嘅空位,以免心入面嘅空間比其他野乘虛以入(除左鬼之外,仲有貪嗔癡阿!)。

咁我就將啱啱支水晶樹枝放返入心裡面,樹枝轉眼間就變左一棵水晶樹,樹上面生出好多朵曼珠沙華(彼岸花),但啲花就立刻枯死… 有個白色裙嘅小妹妹出現,佢收集哂啲花剩返嘅花蕊,一大籃咁送返比我…

畫面一轉,啲花就變左做好多把紅色嘅劍,圍左一個圓圈,通常呢啲圖案,啲刀刃都係向外指,但今次係向中心指。
成個旅程好長,仲有好多諗唔明嘅地方,但暫時結束了。

 

我將成個故事講返比黃師兄知,佢只係講左幾句說話:

「其實,條毒龍係你。」
「……….」小白黑人問號左一陣,但同時眼淚開始流。
「你頭先開始鬧我個陣,你一線之差架咋。」
「……….」
「暫時你應該未明白點解個和尚會咁做,遲啲你會明。你而家係行到【毒龍去左彌勒身邊】呢個位,你唔想再玩呢個遊戲,你選擇左走。」
「………」

小白其實成個腦充滿問號,由個旅程當中,其實都意識到自己之前嘅狂妄,同時亦無言以對。加上根本仲未明白發個故事點解,更加唔識回覆黃師兄。同時我又好想快啲解決呢個問題…

「請問水晶樹、仲有彼岸花係咩意思呢?個劍嘅圖案又咩意思?」小白好苦惱。
「你重新睇一次個故事啦,思考。思考每一個位。你唔明啲樹同花點解,係因爲你連和尚做緊咩你都唔明。你諗明左前面,之後我再答你啦。」
「多謝你。」黃師兄講完呢句就去左訓覺。

 

到底黃師兄想講咩?點解佢會講多謝?點解和尚要自殺呢?啲樹同花又咩意思呢?呢一刻寫緊文嘅小白當然已經過左關啦~賣個關子,大家一齊思考下啦。

下回分解啦喂~

 

【現代巫師點滴】

訓訓下,我隔離多左個人!全身白色衫,條利勁長!

風水佬亂set 嘢,古靈精怪圍住間屋開Party,可以點解決?

幫少女驅白蛇,佢唔多謝不特止,仲. . . . . .

遊魂野鬼入左人型公仔,趕走佢仲難過cut 有線!

我地呢行都有西客?叫我去驅鬼通常都西. . . . . .

 

 

作者:小白

擁有超凡視力的人,低調解說平行空間。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 208684
Date: 2020-07-30 07:32:08
Generated at: 2020-08-10 17:31:48
Permalink: https://www.vjmedia.com.hk/articles/2020/07/30/208684/【現代巫師點滴】百日築基大長篇(第一章)