又DQ 又延遲，中共人格分裂？

又DQ又延遲，香港人就笑香港政府同埋中國共產黨人格分裂，唔知做乜。

其實香港人長年畀宮鬥劇同辦公室政治荼毒，冇理由咁簡單都唔明。

一間公司都唔會一體，入面有唔同嘅人，有啲負責做決定，我哋叫佢哋做agent，有啲負責執行，我哋叫佢哋做齒輪。

當一間公司有多過一個agent，情況就會好複雜，因為佢哋可能目標唔同，利益唔同，決定就會有所衝突。啲資源就會消耗得多，執行力都會大大減弱。
噉通常都有啲機制化解下呢啲衝突嘅，但係當機制function唔到，尤其有啲嘢出咗街先嚟要撳停，就會好大鑊。

一間公司越大就越容易有呢啲情況，除咗因為agent多咗，亦都因為消息同命令嘅傳達需要時間，往往上頭嘅命令嚟到，情況已經發生咗變化，你嘅位置越前線，上頭嘅職位越高就越係噉。

莫講話命令每落一層，每一層嘅人就要做下文學詮釋，然後又變成一個指令傳達去下一層。你估叫人做嘢真係send封email去畀人咁簡單咩？

依家就係有至少兩個/兩班agent因應選情而做出某個決定，然後層層傳遞落去，去到執行嗰粒齒輪，佢就算知道兩樣嘢係incoherent都好，唔通佢可以去返命令嘅源頭同佢哋講：「喂，大佬，你哋拆掂咗先好叫我做嘢呀！」咩？

更何況，呢兩條命令都唔知幾耐之前，係因應咩情況而傳達。

噉咪唯有上面講乜，自己咪做乜囉。收得噉嘅人工畀人笑下柒有咩所謂呢？

至於出現啲噉嘅情況，代表住啲咩，就自己諗喇～
我愛國愛黨，相信香港一定會繁榮穩定。

作者：漁村愚公

閱讀後覺得好，請多多讚好及分享～：）