動漫中的「大殺器」

 

係日本機械人動畫,戰略大殺器係好常見嘅事物,例如係各種衛星武器,超弩級戰艦,大殺傷爆彈等。有人話依啲都係核武器嘅隱喻,代表日本人其實心底裡覺得美國勝之不武,要靠動漫世界去翻盤。而我就覺得大殺器代表嘅係命運,係偶然中嘅必然。

 

==以下有舊作微劇透==

 

面對大殺器,最普通嘅想法係破壞。例如係《高達OO》,天人部隊嘅「死兆炮攻略戰」,基本上係以小博大嘅賭局。反過來講,亦可以將大殺器視為強逼決戰清除餘黨嘅手段之一。00有趣之處,係死兆炮居然有兩個,但諗落又幾附合政府有錢就會駛嘅作風。

同樣係大殺器,其實班主角都有,無論係ZZ高達嘅重粒子炮,Wing Zero嘅雙管破壞步槍,DX嘅衛星微波炮,Turn A嘅月光蝶,雖然體積唔大,但都係獨當一面嘅大殺器。最大分別,應該係佢地唔會濫殺無辜。每件主角武器都總有某些缺憾,例如係零式系統會搞癲駕駛員,微波炮要對住月亮,以防觀眾覺得屈機無癮。

相比之下,魯魯修絕對係一個時代亮點。係太西洋決戰對抗終極大佬修奈爾皇子時,皇子嘅王牌武器就係空中堡壘-達摩克利斯(源自傳說故事達摩克利斯之劍,以下簡稱達叔)。達叔搭載戰略武器Fleia(全稱Field Limitary Effective Implosion Armament,又稱愛之女神)同擁有高能防護罩(值得吐糟,高達入面嘅超武全部都好脆),攻防都點爆哂。而且仲有黑色騎士團做護衛,整體戰力係壓倒性有利。

主角魯魯修同其他智障型主角最大嘅分別係,佢唔止識打仗,仲有諗打完仗後嘅事。分散佈陣,用部隊餵核彈真係只有佢先做得出。而且一切只係誘餌,基於整體戰力差距,直擊本陣先係真正嘅戰術目標。係用盡謀略/科技/操作/熱血/運氣等等因素,突破防線攻入達叔後,俾著其他動畫大概就係炸左就算,而魯魯修就係決定劫機,然後以核威脅統治全世界。印象中,佢係唯一一個成功統治地球嘅機械人駕駛員?唔統治全世界,憑咩話自己贏左?

有人話港人對魯魯修評價高係因為似香港,我就唔係咁睇。好既作品,應該係超越時空,探討人類本質。例如係笑傲江湖,岳不群永遠都會存在,一世人總會遇上幾個。

睇返香港,你可以話大DQ係猶如破滅魔劍般令人絕望嘅屈機大殺器。但反過來講,逼得對手唔再顧戰場常態都要出手,其實真係代表大家終點在望。大DQ係就係議會戰線內無敵,但我地嘅戰線從來不應止於議會。令大DQ變成國際線嘅彈藥,係短期戰術重點。要長治久安,香港人始終要有自己主權。

 

作者:港政漫評

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 208747
Date: 2020-08-01 08:21:06
Generated at: 2020-08-11 06:34:27
Permalink: https://www.vjmedia.com.hk/articles/2020/08/01/208747/動漫中的「大殺器」