收成期 vs 這一代

政治 / 最新文章綜覽

上星期,903國民教育入面,我出左一個無人駕駛,好長既無人駕駛。結果,節目完左,我收左5個聽眾,問可唔可以將封信放上面書。

我話,我要問得事主同意。

原來,一個本土派既仔,同一個黃絲老豆既故事,係擊中咁多香港家庭既心。

呢封信,我放係呢度,畀大家,再睇一次。


健吾,無咩野,早排同老豆嘈完來,想搵人呻下姐。

你好,我係你FB page其中一個長期follower. 唔好意思因為frd zone 入面有啲公司同事,所以唔夠膽長期留言同點讚,(好啦仲有大部份原因係懶)不過由雨革起,都叫做follow左個page五年咁。

你果陣都做好多雨革既內容。文化監暴,上星期黎過既威廉,都同你係佔領場上做過訪問。果個,我都記得。果陣威廉仲講,佢話佢去福島果d 經歷添。

只係,時間過左,有好多野,真係有d……唔同晒。

以下既內容,有好大程度係有關於我同我個收成期黃絲老豆既對話,仲有部份係有關於我對依家「本土派」既一啲感想。因為覺得你信得過,),我又搵唔到朋友同我傾,你知啦,依家就算係黃絲,個分歧都可以幾大架啦,所以先寫野俾你。

講左我同我老豆個對話先啦。好老實講,之前成日聽到啲人話咪一家都係黃好幸福,我真係唔覺得有幾幸福。因為我同我老豆自從兩三年前起,只要一講起政治幾乎都係以嗌交收場。係佢眼中我係激進既本土派,或者係無知既港獨份子,總之就唔係佢個類人啦。而我對佢亦都由以前既尊敬變到依家大部份時間係睇唔起,或者係好似我阿媽成日講甘「佢老啦你體諒下佢啦」個種。問心個句,好多對民主、自由都係由我家兩老啟蒙既。佢地每日都會係屋企評論時事,四年一次既投票年年都會去,仲次次都投民主派,然後同你講中國點衰點衰。所以好自然地,當我18歲個年第一次有投票權既時候,我都會揀民主派既侯選人來投,雖然當時既我唔知投左之後對個社會有咩作用。

但慢慢,呢種唔知點解就變得越來越強烈,特別係雨革之後。好啦,其實我唔係甘鐘意雨傘革命呢個名,係我眼中始終叫雨傘運動比較適合。因為入面連一啲激烈少少既革命元素都無,只係一個大型既社會運動,動員左好多人,係街頭瞓左幾個月,之後就無聲無息甘結束左,只係一場大型社會運動。不過叫雨運好似有啲翹口,仲有其實我知道雨革其實改變左好多人對民主運動既睇法,所以我地仲係叫佢做雨革啦,好嗎?

雨革其實對我既影響好大。因為我係第一次親眼見到有人為左所謂民主、自由去做比投票更多既野。雖然最後都係徒勞無功,但引起既聲量、反思比起咩民主派議會大勝引起既情緒都更加強烈,由個時我就開始係度諗,究竟投票仲有咩意思?反正就算民主派大勝,政府或者中央都係會用其他方法,例如功能組別去阻止你架啦。同埋每次話咩只有大勝先可以反對議案真係好煩,每次話反對議案,最後咪又係俾政府同建制派傾多兩傾又轉軚。初初我仲會信,依家真係睬你都傻。反正我咩都得唔到,點解我當初唔投建制派?最起碼人地仲識過時過節send啲msg過來關心下你呀,同埋唔會亂甘阻住啲議案通過呀。喂你估立法會淨係得你個啲所謂同民主自由有關既議案架,仲有好多民生相關既野架,反正你地班友俾人氹多兩氹都係轉軚架啦,不如俾啲橡皮圖章入去好過啦。

不過係之後既立法會投票,我都係按雷動計劃係超區投左涂謹申。因為唔知投邊個。(至於九東就唔記得了)依家五年過去了,好似咩都無變 ,反而仲差左。我知道呢個差唔係人民心態差左而變差。相反,雨革之後民主派可以話進入左大分裂時代。隨著本土派既興起,傳統泛民既領地逐漸受到壓迫,加上中央越趨強烈既打壓,只係逼到一班傳統泛民既支持者越走越遠。只係係議會入面,我完全睇唔出呢個時候作出改變既意義。要改變既一早就改變左啦,最起碼當初係政府修改議事規則,DQ候選人個陣就已經要改變啦,依家仲改咩呀。人地搵幾個保安都抬走曬你地啦,仲charge返你地轉頭添啦。不過,我個個黃絲老豆,依舊沉迷係永續既投票遊戲,好似投左就有希望,好似投左就表達左意見就完成左責任甘。

我真係好討厭呢啲人。

討厭既原因,唔係因為由三十年前,可以開始表達意見既時候,佢咩都唔做,淨係識得投票;唔係因為佢仲信三十年後,係中央強力既壓逼下,仲可以靠投票同遊行呢啲和平既手法去爭取到自己想要既野。(好啦其實呢兩樣野都好討厭)但更討厭佢俾左一個民主既希望俾我地,甚至比我更細既一班年青人,但係就從來唔去為左呢個夢去做任何野。

既然係甘,點解要一開始同我地講民主自由?點解唔俾我地好似大陸個班年青人甘,係中國夢入面生活?最起碼人地個夢有車有樓有番狗,仲唔會俾人睇唔起添!

而當我向佢作出呢個控訴既時候,佢卻只係簡單甘同我講一句時代唔同左。

時代唔同左?我依家身處既時代唔係由你上一代製造出來架咩?你留個甘既爛攤子俾我地,之後好意思同我講時代唔同左?甘點解你地一開始唔企硬啲?點解唔一開始就搞雨傘革命又好咩都好,點解要等到中央決定剷除全部香港人了先拍拍我地既膊頭話我依家要交棒?屌你你又知我實接既?仲有我憑咩要接?你地班人夠渾渾噩噩過左三十年啦,我都一樣得架。我愛國愛港,手機裝曬微訊微博抖音,全部頭像都係中國國旗,你想我點,我就點架啦。

然後當我話要照本土派,抗爭派既方式來,即係街頭抗爭既時候,佢又話你班人太激進。

係呀,最好我地一齊渾渾噩噩甘等死,問題係個時你已經百年歸老,我去到2047個陣都係好似你依家甘大咋。到時我要點同我既下一代講?「曾經呢,香港有過一樣既一國兩制。你問一國兩制係咩?大概就係國家話咩,你可以換一種方法去認同國家所講既野吧。同埋中間你都可以扭下計,話我唔鐘意甘樣,想要甘樣,但之後你會發現媽媽(共產黨)講既野先係最啱既。」

呢個咪就係你遊行或者投票做到既野囉。

都係個句,我最討厭上一代人既係,如果你從來無為你所講既希望付出過,唔該你一開始就唔好俾呢個夢我。我受唔起。我寧願做藍絲,起碼藍絲既生活快活啲。

不過循例我最後都係要講番句啦,我老豆既睇法唔可以代表全部黃絲既睇法,好似我阿媽甘就無甘偏激既。另外我個frd list個度都有啲肯付出既黃絲既。雖然係係各人可接受既範圍努力,不過總好過好似我老豆甘咩都唔做呀。

至於本土派呢個分類,其實有時我都好疑惑,自己係咪一個本土派。

老實講,我從來都打算為自己定義做一個咩派別既人,呢個只係我個憨鳩老豆求其塞過來既一個分類。係佢眼中,好似全部鬧泛民既人就係本土派,但其實如果你認真睇,呢班人入面仲好多分類。好似熱普城,或者叫熱狗,就係一個大分支。但除此以外,就算係本民前、青年新政、或者係其他up得出名既本土派代表人物,佢地既政綱、政治理念都好唔同。我會話本土派係一班「真係好x 鐘意香港」,又願意為香港付出既人組成。不過當然,呢班人最近呢幾年都不停受其他派別既人吸收。例如黃之峰。好老實講,我係雨革之前甚至之後都唔係甘憎佢,但最近呢幾個月見到佢無論為左區選又好,立法會選舉都好甘高調既樣,就開始越來越反感。其實以佢係國際既影響力,佢可以做到更多野,不過唔知係咪坐完監成個人唔同左,依家既佢同個時反國教既佢已經越行越遠。

有時我真係好疑惑究竟香港來緊會點走落去。當中國既壓迫越來越大,(你唔好理佢點解啦,反正各家有各家說法)而香港仲有班死唔斷氣既老野係度阻頭阻勢,(我講緊不論建制派定民主派)香港既出路究竟係邊度。我都仲叫勉強係97前出世,之前申請過BNO,仲可以去英國搬磚。97之後個代,真係留係香港等死架。我啲仲叫有啲智慧既黃絲朋友會同我講,只要堅持就有出路。呢個好似已經變成佢地既一句slogan,但係一日班死老野仲係度阻頭阻勢,我真係睇唔出香港有咩出路囉。

香港既政治生態就係甘奇怪,從政個班唔論政,反而俾一群唔知邊度彈出來既中學教師、作家、煮飯佬求其係大氣電波又或者網台度亂講野。然後個個當佢神甘拜。我真係唔知甘樣既香港,可以有咩出路。

算啦,學似我阿媽話齋,你咪當敬老囉。你仲想佢點呀。一係你就乖乖留係香港做順民,並且期望終有一日特朗普會打勝仗,再唔係你咪走囉。

不過就算邊個打贏仗,都唔代表香港會變得更好。

香港,都無識得管治既人,香港點行落去?

所以我好早就同人講,我地可見既未來,就係「中國輸,香港贏,香港人點都輸」。除此以外無其他。因為中國贏香港會輸得更慘。

又或者,唔係既,或者藍絲會無事呢?

Anyway,多謝你睇到呢度仲未嫌我煩。我呻完架啦。最後祝你身體健康,生活快樂。

P.S. 我真係好x討厭政治
P.P.S 武肺對我真係無影響,唔好再問。
P.P.P.S. 其實依家諗深一層,真係早中好過遲中,反正以政府呢種防疫手法,中係遲早既事。早中左反而無甘擔心

多謝你做我樹窿。

~~~~~~~~~~~~

第一節完。

健吾:你收到一個咁長既msg,你會唔會 too long don’t read 呢? 抑或,你都覺得,應該要好好咁去應對一下,一d 潛藏既大家心入面既情緒呢?

收左呢個msg 之後,坦白講,我第一次,其實係冇睇晒既。

因為,太多情緒,亦都太多內容。

我之後,回左一個手指公既icon 之後,佢再話:「我講過長架啦=;=
個晚打左我2個幾鐘,其實依家睇返,我只係想發表一啲平時唔敢講既野。你知依家個香港幾二分法架啦。
只有唔表達意見,先係最安全。唉。」

你,有什麼感覺?

 

Become a Patron!

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 208825
Date: 2020-08-04 20:54:17
Generated at: 2020-09-22 15:16:20
Permalink: https://www.vjmedia.com.hk/articles/2020/08/04/208825/收成期-vs-這一代