香港人永遠唔會同荷包過唔去

尋日連登仲講緊《從壹傳媒股價暴升,反映出香港人經濟實力好強》;彭博 (bloomberg)又話《反抗鎮壓股票成港人最新抗爭武器》……咁今日係唔係《香港民主最黑暗嘅一日》?!😅😅😅😅😅#民主概念泡沫化#毋忘282#282要人呀#齊上齊落呀

政治大嬸判發佈於 2020年8月12日星期三

 

蘋果股價大升,大家都話因為要撐蘋果,撐黃圈。

咁而家蘋果股價大跌,係咪大家已經唔撐?

香港人好識搵錢。當見到手上股票升咁多,賣到好價錢,大家自然會賣。撐蘋果?有啊,噚日課咗十蚊,買咗份報紙架喇,我已經做咗應做嘅事。大家成日喺度話因為自己收成期而唔理香港死活嘅人好仆街,咁賣蘋果股份去賺錢,算唔算收成,又係唔係仆街?

香港人好鍾意黃子華嗰句「搵食啫,犯法啊」,依個理念直頭入骨。就算口講抗爭,口講支持,前頭都係唔好再阻住佢搵錢,唔好阻住佢發達,撐蘋果買股票同發現佢升咗幾倍,幾十倍而放,香港人會毫不猶疑選擇後者。

但係,咁又同你地口中班「因為自己收成期而唔理香港死活嘅人」有咩分別?如果你地覺得買蘋果股份係撐佢地,點解一遇到靚價就放?係咪即係就算係香港,只要共產黨比到個靚價你,你都可以賣埋香港,然後高呼「我愛共產黨」?

香港人太識搵錢,依個天性唔會改變。

當然喇,股票市場嘅出現就係為咗比你低買高賣去賺差價。你買得股票,有賺,放咗佢,好平常。但如果你將買蘋果股票依個行為昇華到去「我係撐蘋果,對抗中國打壓」的話,而家個蘋果股價跌到咁就真係笑大人個口。

如果你有心要抗爭,真心希望頂住中共入侵,首先你要分得開賺錢、消費同抗爭,唔好諗住混為一談。你可以「表態支持同路人」而食黃店,買蘋果日報,但千祈唔好當你食咗碟唔多好食嘅咖哩牛腩飯,買咗份其實你冇打開過嘅蘋果日報,就同大家講你有份抗爭,就當自己為香港出完一分力。衰啲講句,你簡直係侮辱緊曾經喺前線出生入死,以及排緊期等比人告嘅真手足。

通宵排隊,蘋果日報清哂,畫面好靚。但畫面靚有咩用,中共夠唔夠醜?建制夠唔夠柒?警察夠唔夠賤?佢地畫面一啲都唔靚,但佢地贏到開巷,唔止五比零,係五十比零。

如果咁就係抗爭,對面無論再柒再失敗,瞓喺度都贏。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 209032
Date: 2020-08-12 17:28:21
Generated at: 2020-10-29 06:18:22
Permalink: https://www.vjmedia.com.hk/articles/2020/08/12/209032/香港人永遠唔會同荷包過唔去