【高階食譜】忽然WFH 下的「冬蔭功醬」

 

唔知大家有無work from home？

Work from hill嗰啲唔計，work from hell就應該好多人都係。WFH呢單嘢似乎要持續多一段好長嘅時間，有排搞，你睇依家777個款都唔想武肺咁快完啦，畀美國制裁緊咁大鑊都中要全心全意繼續搞鳩香港人就知，佢呢份堅持真係要用「欽敬」嚟回應。

 

Btw其實我成日都睇錯WFH做WTF，有幾次差啲衝口而出跟同事講錯WTF，唔知大家有無咁嘅情況？

又btw，呢排先知原來日本都越來越多WFH嘅安排，而WFH嘅日文叫「テレワーク」或「在宅勤務」，唔怪得我同日本人講WFH時佢唔知我講緊乜。

其實我係識日文㗎，FYI WFC LOL。

 

點解無啦啦講WFH呢？因為話說我最近公司安排，都加入咗WFH嘅行列，WFH即係喺屋企嘅時間多咗，尤其係我本身係返工由新界西搭去港島東、每程巴士再轉車花個半鐘嘅打工仔，可以WFH就變相每日多咗3個鐘在家嘅時間，除咗睡眠時間充裕咗皮膚又靚咗之外，唔知可以做咩嘅空閒時間亦多咗。

所以我同好多朋友一樣，呢排培養出屋企煮飯仔嘅閒情逸致。

 

我平時都有整開蛋糕甜品嘅，又因為步入中年關注養生，早排開始健身所以會懶係健康咁試試唔同食譜，整吓低脂高蛋白飯盒呀咁，最近天氣熱，上星期仲整咗花雕醉雞翼同雞胸添！

（入得廚房出得廳堂㗎我，求包養）

 

好喇，去返正題先。

話說我好怕食辣嘢，以前試過同朋友食麻辣米線最小辣都差啲食到反檯，所以無乜必要我就唔會食泰國嘢呀印度嘢呀咁，無謂玩命。

 

不過早兩日睇某電視台一個講宵夜嘅清談節目，平時都有追開，三位主持嘅互動真係笑到我痴線，而呢次主持人煮咗一個「冬蔭功忌廉意粉」，不得了，橙色嘅冬蔭功湯本身嘅色澤已經令人流晒口水，佢用個湯隔渣後加入忌廉煮汁，再放意粉入去炒，嘩，啲汁掛晒喺意粉上面㗎，明明唔食得辣嘅我個肚都馬上「咕」咗一聲，宵夜時段播呢啲真係極邪惡。

 

咁樣挑釁我，嬲嬲地真係想整返一個自虐吓，但問題嚟喇：主持人用嘅係現成冬蔭功醬，肯定好辣（至少我食唔到），又唔知裡面落咗幾油同糖，而且椰漿同忌廉都勁肥。

減肥嘅嘢，三成運動七成飲食，忍耐同堅持最重要，呢啲邪惡宵夜，一開咗個頭就停唔到喇喎大家都好清楚。我呢啲懶健康嘅人就最麻鬼煩㗎嘞，又想食又想食得無咁肥，可以點搞？

 

正所謂萬丈高樓從地起，雞脾食皮肥撚死，意粉汁嘅椰漿同忌廉要搵咩代替都係後話，話得係冬蔭功忌廉意粉，冬蔭功湯底點整先係重點。

怕辣怕肥唔敢用現成貨，咁咪自己整囉，反正阿叔我WFH收工後好得閒。

 

其實要自煮冬蔭功醬唔難，只係有啲煩，煩就煩在預備工夫。

睇到呢度，如果你真係唔怕煩，咁以下落嚟我就嚟料㗎喇喎！

 

要做一樽懶健康低脂冬蔭功醬，所需嘅材料及器具包括：

 

器具

易潔鑊 一個
食物處理器 一部 （或果汁攪拌機都得）
手提攪拌棒 一支（無的話可用上面嘅食物處理器或果汁攪拌機代替）
果醬樽連蓋 （記得用滾水煮至少15分鐘徹底消毒，然後風乾）

 

材料

大紅辣椒 5條（可以用生曬辣椒乾，但我覺得太辣，平時一粒辣椒仔我都頂唔順）
南薑（去皮薄切） 5至6片

紅蔥頭 2瓣

香茅 2條

臭西（芫茜）根 幾條（可以唔落）

乾羅望子 50克 （印尼食品鋪頭有售，包裝上有時會叫做「小酸子」）

蝦醬 半湯匙

魚露 2湯匙

椰糖 3至4湯匙（砂糖狀嗰隻，用圓柱體狀嗰種的話就大概一塊啦，呢次我用咗黑糖，純粹係因為椰糖賣晒）

九層塔 數塊（新鮮檸檬葉都得，但我屋企附近街市搵唔到）

菜油 1湯匙

青檸汁 1湯匙

 

 

做法

1）乾羅望子用一碗飯碗嘅清水浸至出味，隔渣後備用。

 

2）紅辣椒洗淨切件，放入食物處理器加入半碗水打成辣椒泥，又係備用。

怕辣的話可以切走埋入面白色嘅部分，食到辣的話可以保留辣籽，我就只留咗一條辣椒嘅辣籽。
重點：記得戴手套切，我赤手咁切完唔夠一陣手指就乸到仆街，結果痛咗兩個鐘，無錯係兩個鐘！

 

3）南薑、紅蔥頭切碎粒，都係備用。

重點：切嗰陣千祈唔好摔眼，唔好摔眼，唔好摔眼！佢老味我切嗰陣因為標眼水，唔小心用手背摔咗眼一下，仆街吖對眼馬上好似食撚咗TG咁，狂沖水3分鐘再抖2分鐘先掰得返開。

 

 

4）香茅切細段，放入食物處理器打碎（有心機的話可以就咁切細片，我就無咁好心機喇），依然係備用，備用完未？未。

 

5）九層塔或檸檬葉切碎，芫茜取根，備用。Okay，終於備用完喇，可以開始埋爐煮⋯⋯

 

6）中火開鑊，落一湯匙菜油起鑊，落南薑碎同紅蔥頭碎炒香，btw唔煮過都唔知原來冬蔭功湯其中一種香味係來自南薑，嗯～開心大發現！

 

7）倒入香茅繼續爆炒，痴線㗎好撚香～

 

8）加入辣椒泥，煮約5分鐘左右至汁料半乾。

 

9）倒入羅望子水，煮出冬蔭獨有嘅酸香，同樣煮至汁料半乾，然後加入臭西根，出味後夾走。

 

10）魚露及蝦醬撈好，下鑊炒勻，睇你鍾意食幾鹹啦，想鹹啲可以落多啲。

 

11）加入椰糖或黑糖繼續炒，因為試味後覺得唔係太鹹所以我無落晒啲糖，落咗一半多少少。

 

12）加九層塔或檸檬葉碎，炒至收汁後，略為攤凍，再用手提攪拌棒或食物處理器blend撚到佢爛蓉蓉，很治癒～

 

13）中火回鑊後再加一碗水煮成杰汁，熄火前加入青檸汁，可以增強熱帶風味同埋令冬蔭醬保持色澤。

 

14）趁果醬樽仲熱，倒入去冚蓋，攤凍後放入雪櫃，可存放約兩個月，禮成～

 

其他食譜通常都落勁多油去炒，但呢個版本嘅冬蔭醬因為用咗易潔鑊嚟炒，由頭到尾我都只係落咗好少油，糖方面亦唔需要落好多，視乎個人口味同煮出嚟嘅醬汁而調節，感覺上比市面嘅現成貨健康好多㗎好似係。

味道方面，啲辣椒煮到收汁後嘅辣度比我想像中強勁，食入口時先係食到近乎係燈籠椒咁款嘅菜甜味，鹹度剛剛好，然後辣味先慢慢衝出嚟，對我嚟講都係有啲過辣，唉屌，不過真係好香口～

而且明明整嗰陣廚房開咗抽油煙機，但煮完之後成間屋都充滿冬蔭功嘅香味至少一個鐘，各位煮之前要留意返喲！

 

 

Btw原來冬蔭醬同煮冬蔭功嘅材料好似，只係無落椰奶同蝦殼，平時就咁取一小羹加雞湯煮麵的話已經好惹味！

 

 

不過煮完個醬，因為啲辣椒太刺激隻手仲係好撚痛，整完又好攰，個冬蔭功忌廉意粉都係等我過兩日先再整了⋯⋯