好多後生仔無啦啦畀人拉咗，開始有人走出嚟話後生仔「犧牲佢哋吃喝玩樂嘅時間，要面對咁嚴峻嘅政治清算」。尤其是，最近一班廿幾歲嘅被人高調對付，呢種聲音更加大聲到開始有當事人出聲話唔係咁。其實，除咗幾歲同十幾歲嗰啲，人人都有過二字頭嘅人生，相信人人都明，二字頭絕對唔係一段只係用嚟吃喝玩樂嘅時光，喺今日呢個歷史嘅十字路口就更加。
所以，筆者就粗略咁將自秦以來，嗰啲企正喺歷史十字路口嘅人──歷朝歷代嘅開國皇帝，真正嘅新聖人、真龍天子，當佢哋過完二字頭嘅人生，踏入三字頭嗰一年做緊啲咩。講明先以下嘅30歲係計實際嘅30週歲，唔計中國人嘅虛齡。
秦始皇趙政生於秦昭襄王四十八年（前259年），30歲係秦王政十八年，之前一年秦已經滅韓，統一中國嘅戰爭已經開始咗，呢一年佢又派王翦發兵攻趙。
漢高祖劉邦生於楚考烈王七年（前256年），細秦始皇三歲，30歲時六國已經亡咗兩個，而佢本人估計喺魏國嘅外黃做緊張耳嘅食客，不過下一年魏國就滅亡，劉邦亦都可能返咗去沛囉。
新朝嘅「真皇帝」王莽生於漢元帝初元四年（前45年），30歲時係漢成帝永始二年，外戚王氏家族已經掌權，但就仲未輪到佢，不過就名聲經營得好，得到大司馬王鳳遺言要王太后關照，之前一年王莽就獲封為新都侯，正係「王莽謙恭未篡時」。
漢光武帝劉秀生於漢哀帝建平二年（前5年），30歲時佢喺河北征戰，手下不斷勸佢登基，終於喺當年夏季喺鄗縣即皇帝位，半年之後攻陷洛陽，定為首都。
魏武帝曹操生於漢桓帝永壽元年（155年），30歲時係漢靈帝中平二年，之前一年佢參與平定黃巾之亂，因功獲濟南相一職，晉身二千石高官行列，正喺濟南國對付貪官。至於魏朝嘅真正開國皇帝，魏文帝曹丕就生於中平四年（187年），30歲時係漢獻帝建安二十二年，當年佢受封為魏太子，奪嫡成功。
漢昭烈帝劉備生於漢桓帝延熹四年（161年），30歲係漢獻帝初平二年，當時佢時任職高唐令，但唔夠山賊打棄官走佬去公孫瓚度，公孫瓚上表保薦，幫佢R到個平原相嚟做，一樣晉身二千石高官行列。
吳大帝孫權生於漢靈帝光和五年（182年），同曹劉唔同，佢18歲就任會稽太守，身居二千石高官。30歲時係建安十七年，赤壁之戰之後嘅戰果瓜分已經底定，之前一年佢將根據地由吳縣搬到建業，呢一年佢開始起石頭城。
晉武帝司馬炎生於魏明帝青龍四年（236年），30歲時係晉武帝泰始二年，泰始元年十二月中，佢逼魏元帝禪讓，正式成為皇帝。由於泰始元年實際上只有十幾日，晉朝開國之後修律、改制嘅嘢，基本上都係喺泰始二年做嘅。
宋武帝劉裕生於晉哀帝興寧元年（363年），30歲時係晉孝武帝太元十八年，喺北府兵冠軍將軍孫無終手下做緊司馬。
齊高帝蕭道成生於宋文帝元嘉四年（427年），30歲時係宋孝武帝大明元年，早年於軍中稍有成就，當時已襲父親爵位，喺太宰江夏王署中做嘢。
梁武帝蕭衍生於宋孝武帝大明八年（464年），年輕時結交沈約等文人雅士，30歲時正係蕭鸞身居輔政大臣落手去篡位嗰年，而蕭衍當時係蕭鸞嘅黨羽，獲任命為給事黃門侍郎，參與策劃政變。蕭鸞成功登位為齊明帝，而蕭衍亦因而得到兵權。
陳武帝陳霸先生於梁武帝天監二年（503年），30歲時係梁武帝中大通五年，佢喺建康做咗段時間油庫吏之後，當年大概已經去咗新渝侯蕭暎度做傳教，因為咁識咗蕭暎，後嚟先有機會去廣州帶兵。
魏道武帝拓跋珪生於代王什翼犍建國三十四年（371年），佢係拓跋什翼犍嘅孫，30歲時係魏道武帝天興四年。佢5歲時代國滅亡，15歲時由佢復國，改稱魏王，用十幾年時間由後燕手上奪取中原，正式稱帝。30歲呢年佢喺新都平城起緊皇宮，又搵咗班學者嚟編中文字典《眾文經》。
齊神武帝高歡生於魏孝文帝太和二十年（496年），30歲時係魏孝明帝孝昌二年，正值六鎮之亂，高歡先加入叛軍，後投入朝廷嘅爾朱榮麾下，鼓動爾朱榮入洛陽奪取政權，得到爾朱榮器重，漸漸有機會掌握軍隊。至於北齊實際上第一位皇帝齊文宣帝高洋就出生於孝昌二年（526年），30歲時已經做咗皇帝7年，北齊文治武功達到鼎盛，呢一年，佢認為之前嘅人生已經做晒呢世人可以做嘅嘢，之後就開始發神經，幾年之後飲酒飲死咗。
周文帝宇文泰生於魏宣武帝正始二年（505年），30歲時係魏文帝大統元年。之前一年，佢接手賀拔岳嘅部隊，控制關中，魏孝武帝就逃離高歡控制入關投靠佢，但又因為不齒皇帝亂倫，宇文泰將皇帝毒殺咗。30歲呢年，佢立南陽王元寶炬為傀儡皇帝魏文帝，開啟權臣生涯。至於北周真正嘅開國皇帝周孝閔帝宇文覺就生於魏文帝大統八年（542年），不過佢得年只有15歲，被輔政嘅堂叔宇文護殺害，連叫享年都未有資格。
隋文帝楊堅生於魏文帝大統七年（541年），30歲時係周武帝天和六年，已經做過大將軍又做過刺史，亦都繼承咗隋國公爵位冇幾耐，有可能守緊喪。
唐高祖李淵生於周武帝天和元年（566年），30歲時係隋文帝開皇十六年，做咗唐國公好多年，喺隋朝周圍做緊刺史。
梁太祖原名朱溫，生於唐宣宗大中六年（852年），原本係黃巢叛軍嘅將領，30歲時投降唐朝，獲唐僖宗賜名為朱全忠。25年之後唐朝皇室喺佢手上冚家鏟，然後改名做朱晃。
唐莊宗李存勗生於唐僖宗光啟元年（885年），30歲時係梁太祖乾化五年，但作為反梁復唐勢力嘅首領，仍然使用唐哀帝天祐年號。當年佢已經繼承李克用為晉王多年，同梁軍大戰緊，呢一年佢攻陷咗魏博，但根據地晉陽亦被梁軍圍攻，差啲火燒後欄。
晉高祖石敬瑭生於唐昭宗景福元年（892年），30歲時係天祐十六年，當時佢喺晉將李嗣源手下，率領李嗣源親兵三討軍同梁軍大戰緊。李嗣源幾年之後聽石敬瑭勸奪取帝位，成為唐明宗，令石敬瑭可以掌握兵權。
遼太祖耶律阿保機生於唐懿宗咸通十三年（872年），30歲時係唐昭宗天復二年，或者係契丹痕德可汗二年，佢喺之前嗰年成為迭剌部嘅夷離菫，即係主掌軍事嘅首領，嗰一年佢為契丹攻打緊代北一帶，不過只係為咗掠奪人口。至於令契丹真正改組成遼朝嘅遼太宗耶律德光就係生於痕德可汗二年（902年），30歲時係遼太宗天顯七年，當時仍然未改國號為遼，呢一年佢已經係佢做契丹君主嘅第6年。
後漢高祖劉知遠生於唐昭宗乾寧二年（895年），30歲時係唐莊宗同光三年，同石敬瑭一樣都係喺李嗣源軍中，但具體做緊咩就好難講。不過佢就救過石敬瑭，所以過幾年李嗣源登位、石敬瑭上位之後，劉知遠亦開始得到重用。
周太祖郭威生於唐哀帝天祐元年（904年），30歲時係唐末帝清泰元年，因為又打得又識字，喺石敬瑭軍中主掌軍籍。
宋太祖趙匡胤生於唐明宗天成二年（927年），30歲時係周世宗顯德四年，做緊殿前都指揮使，正係帶領禁軍支援周世宗攻取淮南。
夏景宗李元昊生於宋真宗咸平六年（1003年），30歲時係顯道二年，係李元昊繼承定難軍節度使、西平王之位嘅第二年，佢以避父諱為理由將宋仁宗嘅明道年號改為顯道，之後就一直用獨立嘅年號，同時又設立百官，準備獨立建國。
金太祖完顏阿骨打生於遼道宗咸雍四年（1068年），30歲時係遼道宗壽昌四年，當年佢過緊啲平靜嘅生活，因為幾年前已經幫叔叔盈歌將其他女真部落打咗鑊甘。
元世祖忽必烈生於成吉思汗十年（1215年），30歲時係乃馬真后稱制嘅第4年，佢當年冇咩嘢搞緊，不過就已經喺度招攬緊各地文人準備做大事。
明太祖朱元璋生於元泰定帝致和元年（1328年），30歲時係小明王龍鳳四年，呢一年小明王喺北方已經入居開封，吸引咗元軍對付佢，而朱元璋以應天府為根據地，施施然平定緊江左一帶，當年佢親征緊婺州。
清太祖努爾哈赤生於明世宗嘉靖三十八年（1559年），30歲時係明神宗萬曆十七年，當時佢已經完全取代尼堪外蘭喺建州女真嘅地位，明朝封佢為建州衞都督僉事，冇幾耐朝鮮之役爆發，明朝唔得閒再理佢，佢就繼續統一女真嘅戰爭。
睇到呢度，其實有幾多個嘅二字頭真係只係吃喝玩樂緊呢？hea爆如晉武帝司馬炎，佢嘅30歲亦都啱啱好係佢人生其中一個冇得hea嘅時刻。普普通通如隋文帝、唐高祖，至少都已經做緊地方官。真係投閒置散嘅漢高祖、王莽、元世祖，佢哋都分別以唔同方式經營緊自己嘅人生。甚至乎，不幸被殺而早死嘅周孝閔帝，佢嘅死都係因為想由權臣宇文護手上搶返實權。
之前又見到有人話，好多開國皇帝都有父幹，但你望下南朝嘅4位、五代嘅5位，有邊一個唔係白手興家？邊一個唔係憑實力搵時機嚟打天下？佢哋嘅二字頭，幾多日子係出生入死，史書可以話係提都冇提，但正係提都冇提，更加體現佢哋籍籍無名嘅日子，係過緊啲幾咁暗淡無光嘅生活。
反觀今日，香港好多話自己幾叻幾叻嘅人，佢哋又願唔願意做呢啲根本冇人會知道嘅努力呢？齊高帝後生時喺蜀地山間打仗，你估佢怕唔怕自己會唔知跌咗去邊？陳武帝本來只係管油庫嘅，但去到新渝侯署中做嘢，又可以令侯爺對佢念念不忘，去廣州都要帶埋佢去；後漢高祖亂軍之中，唔介意自己身處風險，用自己裝備完好嘅戰馬換石敬瑭匹馬甲損壞嘅馬，仲要殿後保護；周太祖係孤兒，喺冇錢冇書讀嘅年代兼亂世，佢都可以因為通文墨而喺軍中得到重用。
即使係有祖上庇蔭，一個唔小心，就會係周孝閔帝嘅下場。真係完全靠家族而開國嘅，可能只係得晉武帝一個。祖蔭最厚嘅秦始皇，滅六國都唔係一帆風順，仲未計佢要提防幾多人；魏文帝一樣要經歷同曹植嘅競爭；吳大帝都要面對外敵威脅；元世祖更加辛苦：佢只係成吉思汗咁多粒孫嘅其中一個，憑咩一定係佢做？忽里勒台啲票寫咗佢名架（即係咁講，我都知佢係武力推翻咗個選舉結果）。
唔好講到咁高難度，好似漢高祖、王莽、漢昭烈帝、梁武帝、元世祖咁，當後生未有位上、冇光環拎嘅時候，與人為善、交朋結友，成為一個值得人信任嘅兄弟甚至領袖，又有冇人做呢？
2020年好多新晉嘅香港政圈人物（我唔覺得可以叫政界，其實連個政字都冇幾多個沾到邊），其實都係廿幾卅歲，我衷心希望你哋會睇呢篇文章，又會睇到我呢段說話，然後諗下到底自己，係咪將革命當咗做請客食飯呢？
走筆至此，其實本嚟只係想同大家講聲：二字頭，唔止係吃喝玩樂（唔係唔畀玩，但唔係只得玩），尤其是我哋要成就一件偉業嘅時候。
【遊戲新聞】Bug 助你速通拿S+ 《生化危機 4 重製版》狙擊槍土遁大法輕鬆越過鎖上的門
當女朋友仲鹹濕過自己
Pokémon朱/紫！發掘古代，超越未來！訓練員進入開放世界！
女神新標準出爐！毒燃唔可以唔識嘅5位隱藏版女神MULCE
我在孤獨中找到了快樂
真正愛對方，唔好晚晚傾電話
2020年8月15日
