【外賣仔日記】甲級商廈保安森嚴,租戶要求都唔俾送外賣上樓?

 

 

有日送咗單外賣去咗一幢甲級商廈,呢幢大廈我係做咗嗰區咁耐都未試過送過去,個次係第一次。可能真係咁啱得咁橋無單係送嗰度啦。(但係都好少聽到其他同事會送去呢幢大廈)咁我去到大廈接待處就諗住話要登記上樓送外賣,點知大廈接待處職員話唔俾上樓。我個陣心諗,吓?平日日間辦公時間唔可以上樓?咁我就當然打俾個客問下佢想點啦。

嘟 ~ 嘟嘟

客:「喂?」

我:「你好呀,呢度係XX 外賣公司打嚟架,你哋大廈接待處職員唔俾上樓喎。」

客:「吓?點解阿?佢哋係咪要攞我授權先俾到你上?」

我:「咁我問下。」

我同接待處講:「你哋要攞客授權?」

大廈接待處職員:「唔係,係你哋冇得上樓。」

我就覆述返俾個客聽

我:「接待處職員話係我哋冇得上樓喎,咁你要落嚟啦。」

個客同我當刻都無一個合理嘅解決方案,佢唯有無奈咁落樓攞外賣

然後電話就收咗線。

今次張單唔係一個半個飯盒,而係好多袋嘅,我做外賣有經驗要一個人攞晒就易,普通人就真係未必攞到。個客落到樓,佢真係攞唔晒,然後要求我幫佢攞啲上樓。咁我人工本身都包括送上樓嘅,咁呢個要求我一定做到嘅。跟住個客就問大廈接待處我點樣可以上到去。(因為大廈有閘機,無證件連𨋢都入唔到)

客:「想問佢(外賣員)上去係咪要登記?」

大廈接待處職員:「唔好意思阿,佢冇得登記架。」

客:「但係我攞唔晒,要佢幫手攞喎。」

我心諗,甲級商廈嘅租客要求都唔理?痴線架?妹仔大過主人婆?佢唔租辦公室你哪來人工阿?

就係咁睇住個租戶同個大廈接待處職員鬧咗陣完全無意義嘅交。

最後嘅解決方法係,大廈接待處職員無視所有規則,由保安響閘機口用佢張萬能卡幫我開閘。

Er,點解唔一早咁做?最後都係要俾我上樓。

 

專題:【外賣仔日記】

 

 

作者:外賣仔

外賣仔

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 209184
Date: 2020-08-16 08:27:59
Generated at: 2022-07-06 09:57:47
Permalink: https://www.vjmedia.com.hk/articles/2020/08/16/209184/【外賣仔日記】甲級商廈保安森嚴,租戶要求都唔