如何落街跑下步都溝到仔?

 

受到<如何落街跑下步都溝到女?>呢篇文嘅啟發,而加上我嘅親身經歷,我決定回應下。因為我試過落街散步,因為唔見身份證而有人同我搭訕,而結果我喺文末透露。

我呢,都係多數喺夜晚出沒,主要係唔想日頭跑到扯蝦除口罩被人公審,同埋真係好熱。係,的而且確會喺夜晚會見到好多仔仔女女。

喺夜晚先嚟跑步溝仔,唔同你平時落吧溝仔,唔使化乜運動妝,一跑完乜妝都溶啦!加上又有口罩遮住,又有黑夜加持,乜缺點都見唔到,化咗都無人睇到。只要著件運動胸圍加背心短褲,有咩本錢就小露一下。

如果自帶厄運嘅,好容易出意外嘅,就可以問人幫手俾位人哋入。例如:幫手搵嘢,跌親搵人攞水攞膠布,搵人扶乜乜物物,一來可以滿足男人嘅英雄主義,又可以拉近大家距離。

跑到咁上下,停低拉下筋,慢慢行。都可以俾人睇到你對運動同自己有幾認真,又可以多角度展現自己身體嘅曲線。男人都係視覺神經敏感嘅動物,靠睇女人嘅身體曲線嚟斷定女人嘅吸引力,尤其是臀部以下,拉腳筋嘅時候或者做深蹲嘅時候最吸引人。

同埋自己一個會易啲嘅,仲要有一顆開放開通嘅態度,唔好人哋連口都未開就當人癡線先。仲有,當自己唔想俾人哋電話,就唔她好俾,同佢講「聽日同樣時間再見。」因為我真係試過俾完個電話之後,條友勁猴急,話自己夜晚好寂寞乜乜物物,最後我封鎖咗佢,而呢條友就係我唔見身分證而搭我訕嗰條友。

即使佢問你會唔會出去一齊跑,記住唔好約太遲,大約六至八點呢段時間好啦,再熟啲先約遲少少。防人之心不可無!即使條友話自己要十點先收工,十點先可以出去跑,自己夜晚一個人跑好悶都好。

但係咁又點呢?你戴口罩,佢戴口罩,樣都見唔到,講經咩?之後除罩相見嗰吓,大家互相睇唔順眼又無感覺,就唔好嘥大家時間。同埋感覺唔對路就明確拒絕,佢死都要打擾你就封鎖啦!

 

作者:SAZI

沙一粒。重要咩?

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 209201
Date: 2020-08-17 07:22:21
Generated at: 2021-06-16 14:50:17
Permalink: https://www.vjmedia.com.hk/articles/2020/08/17/209201/如何落街跑下步都溝到仔?