【唔係防盜】豪宅屋苑的CCTV 用途

豪宅屋苑五星級服務是係常識！當然員工嘅稱呼同樣要「升呢」，唔好講係保安，試吓講係禮賓員。如果覺得唔夠氣派，就加埋尼泊爾籍警衛同警犬巡邏，簡直傲視同儕。

記得，幽默嘅前輩 T 同獨撚講：「豪宅嘅 CCTV唔係用嚟防盜，係用嚟昅住嗰住客幾時返嚟服侍佢！」。點解 T 會咁講？ 話晒 T 係豪宅屋苑做咗幾年已經「被」訓練有素。

某外籍戶主性格固執死板，跟他的職業倒是有點相配。如果，T 係 CCTV睇到外籍戶主出門，T 一定先截的士。因為戶主只要等超過五分鐘，就一定發癲破口大罵不停投訴。

又，如果戶主發現其他住客係樓下泊車，就會發揮專長力爭不斷投訴「至走方休」…… 。戶主嘅固執程度連佢老母都頂唔順，仲同 T 講「對唔住」，話好遺憾連自己都搞唔掂。

後來，T 同獨撚講：「識湊就好易湊，唔駛咁怕佢！最重要睇實CCTV ，預啱時間處理晒佢覺得唔順眼嘅嘢，搵唔到嘢鬧就自然返屋企！」。

獨撚唯一破例會加公司同事係Facebook 就係 T；遇到好前輩或者同事真係要「燒豬還神」。

另外，兩個CCTV 嘅故事咁啱都係喺凌晨嘅控制室發生。

「煙民主任」望緊𨋢CCTV講：「你睇唔睇到？」

我：「咩事？太快，睇唔到呀！」
主住：「屌！咁都見唔到，倒鏡俾你睇番。」畫面入面，男嘅淨係著住底褲想行入𨋢，而女嘅就衝出嚟捉住佢扯番佢出嚟。
主任：「知依嗰單位邊個名人住啦！」
我：「知，做咗手術嗰個嘛！」
主任：「都唔知係咪high大咗，估佢唔到！」
我：「唔知呀！我過目就忘，哈哈！」。

又某日，戶主來電:「喂！我要睇𨋢嘅CCTV，有無人係屋企拎走行李喼?」咁啱係「煙民主任」接電話，慳返唔駛「交番嗰波俾主任」，睇CCTV「小薯」話唔到事㗎。確認咗戶主身份之後，主任應承幫戶主睇 CCTV，但只會覆「有或者無」唔會再講其他。 最後，我哋「金精火眼」睇咗成個鐘「快鏡」CCTV嘅 結果——答案係有嘅。事情好簡單；深夜歸家嘅戶主發現行李喼「消失」，想確定女友有無「收拾細軟」拖喼走。我哋諗，女友走咗咪去追囉！唔係問我哋有無拖走個喼，係咪唔捨得個行李喼要追番，唔係掛？

PS. 控制室係保安重地，任何人都唔可以隨便入嚟或者要求睇CCTV。除非，住客報咗警，但要約齊三方（警方、保安或者物管、報案人）一齊睇，而唔係單獨俾住戶睇。

作者：六月的物管

真係做左六個月物業管理

閱讀後覺得好，請多多讚好及分享～：）