我隻狗叫Oyster

佢叫Oyster，而家歲半，我同女朋友由Oyster三個月大就開始養佢。個個一見佢就話佢好靚仔，但其實佢係女嚟。

啱啱帶佢返嚟嗰陣，佢好乖，好少吠，屎尿都識定點去。但幾日之後，可能佢已經摸熟架步，習慣咗新嘅地方，佢開始周圍大小二便，然後一聽到咩動靜都會吠一餐。如果痾完屎我地唔喺度或者唔夠快手執，佢仲會食屎搏我地唔知，但永遠食淨一嚿仔，名符其實食屎狗。因為依件事，氹佢鬧佢咩都做過，佢依然故我，反正手尾都係我同我啊媽執。

講開啊媽，當初我話會帶隻狗返嚟佢都唔多願意，講明唔會幫手湊隻狗；但好快Oyster已經取代咗我位置，成為最得我啊媽歡心嘅生物。因為未養過寵物，我同女朋友一開波就用罐頭加乾糧撈比Oyster食，搞到佢對食物嘅要求鬼死咁高，往後淨係比乾糧嘅話只會聞一聞，噴一噴氣然後行開，就好似同我講「依兜嘢比狗都唔食」。啊媽話罐頭食得多唔健康，結果親自整鮮食比佢撈糧，蕃薯、紅蘿蔔、粟米、白飯、雞柳、西蘭花，餐餐都有新驚喜，耐唔耐仲有幾粒飯後果食，做狗做到咁真係夫復何求。

自從Oyster出現，我女朋友個個星期五晚就會嚟我度同佢玩，然後到星期日晚先走，話希望可以陪佢多啲。亦因為Oyster，我地由「想搬出嚟一齊住」變成「決定搬出嚟住」，目標好快決定咗搵村屋，因為一嚟好多村屋都養得寵物，二嚟希望有個大啲嘅地方比佢活動。之前我同啊媽住嘅地方三百呎唔夠，冇人喺屋企仲要放佢入籠，都真係幾可憐。

上年年尾，我地終於搵到間啱價啱心水嘅村屋。租唔算貴，夠哂新淨。而Oyster亦正式由個籠度解禁，可以喺間屋自由行走，同時自由屎尿。當我同女朋友出門口返工，我地就要鎖好哂所有房門，喺梳化鋪哂毛巾，務求佢最多只會痾落地下，將傷害減到最低。而經過我女朋友用盡心力教佢定點屎尿，甚至不惜換塊大一倍嘅如廁板之後，總算令佢肯乖乖痾啱地方—雖然久不久都會痾屎落地下，或者佢痾啱地方但我地出咗門口，結果佢會咬嚿屎上梳化慢慢食，所以梳化都係要鋪毛巾。

唔知係咪間屋風水利佢，搬入嚟之後一係Home Office，一係我失業，搞到佢好似長期都有人陪，要佢孤單一個留喺屋企嘅日子加埋都唔知有冇三個月。佢本身都好鍾意痴人，例如喺梳化睇電視佢會跳上嚟痴住你大脾瞓、你喺檯做嘢佢會乖乖地喺檯下面陪住你、你行入廚房佢就以為有嘢比佢食乖乖跟住你然後坐定定望住你等食好西。每晚我放工返屋企，行緊樓梯上去（我住中層）嗰陣佢就開始吠，我一開門，佢望到係我就會先自轉兩個圈，然後由梳化跳落嚟，再飛奔埋嚟舔我。你以為佢掛住嘅係我咩？你錯嘞，我隻襪除到一半，佢就會一口咬住拉我隻襪出嚟，然後自己衝上床玩。如果我唔比佢直接放入廁所污衣袋，佢就會襯我唔覺意自己走入去，咬低個污衣袋再喺袋口摷我對襪出嚟再拎上床玩。

為咗得到我對臭襪，佢係無所不用其極。

唔知係咪因為份工收得夜所以小咗陪佢，我返到嚟沖完涼，坐低準備食飯嗰陣佢就開始咬住玩具要我同佢玩。佢同我玩嘅方法就係扯大欖咁，無數玩具都經唔起佢牙力嘅考驗，半個月貨仔就溶溶爛爛。甚至試過有嚿軟膠骨頭同佢扯扯吓斷開，中間啲綿花飛哂出嚟，執到我死。因為佢破壞力太驚人，所以我地已經唔會再買百幾蚊玩具比佢，而係上HKTV買啲十幾廿蚊，一買就買三四件，然後由得佢玩爛都唔肉赤。

最近因為武肺關係，少咗帶佢出街。以往九點半左右就會帶佢行街街，同附近啲狗玩吓放吓電。而家冇得出街，佢一到九點幾十點就會吠我，好似提我帶佢出街，見我冇反應仲會咬我。依個情況仲會出現喺我臨瞓前，仲有朝早沖涼準備返工。佢一見我換衫就會吠，然後死咬住我隻襪唔放口，好似唔比我出門口咁。有時真係比佢吠到燥咬到癲，我就會喝佢「NO」同埋大叫佢個名，甚至會拍佢屎忽。不過到而家佢每朝都依然會咁做，好彩我女朋友暫時都仲係Home Office，我出門口先冇咁辛苦。

雖然佢真係幾百厭，但佢永遠都會咁熱情等我（對襪）返屋企，我坐喺度就會自己行埋嚟痴住我，瞓教會自己跳上床，然後喺我同女朋友中間搵一個可以同時痴住我地嘅位置瞓。有佢陪伴嘅依段時間係快樂嘅，特別係當睇新聞睇到我想抽離一陣，陪吓佢，同佢玩吓就係最好嘅方法。

狗狗嘅生命有限，而佢總會視我地為佢生命中最重要嘅親人。養得佢就要負責任，唔好因為佢地好可愛就養，養落覺得麻煩就唔要。只要你好好咁對佢，佢就會為你帶嚟唔同嘅快樂同驚喜。

仲有好臭嘅屎。

作者：毛言地

你有多久沒去找自己的理想？搏殺一天，回到家，倒頭就睡。 無言，只因生存太累。談理想？妄想； 毛言仍言，只因理想，本就是「理應去想」 http://www.facebook.com/MaoYanDe

閱讀後覺得好，請多多讚好及分享～：）