被一些比你不幸和更不學無術的人影響你的人生,那是好事嗎?

有時候,做完節目之後,都會有d朋友,同我fb msg 傾計。情況就好似,以前做完電台節目,個聽眾會係大氣電波問個主持,可唔可以傾多一陣咁。

我估,有d 朋友係真係睇完或者聽完我地講既野,都會有d 感覺同反應既。我好珍惜呢d 反應,因為,我地仲可以有反應,有反應仲未畀人拉,我地仲未麻木,我地係應該珍惜既。

有一個學生聽完上星期既903國民教育,都問左我好多問題。我地傾左三十分鐘之後,佢就有感而發,話:「係香港論政,你講一個觀點,對方唔同意,解釋又話你熱狗,你鬧醒佢又話你暗共你係鬼,唔出聲又話你冷感。然後你飲飲食食睇日仔泰仔就話你竹林七賢。總之我既罪名就係識得處理自己。最好香港所有人都好似精神病咁睇新聞,係連登出po,就叫革命。

呢種咁既生活,係香港人自己要迫死香港人,冇人拎住支槍迫你要參與。唔參與又點?你睇住班泛民剩係要份糧,班自稱本土以為自己可以爭贏班泛民就叫贏左場民主運動,乜野係民主,乜野係論政既基本修養佢地都未有,就扮晒大文豪咁講講係度鬥up,我都唔知香港人可以點走落去。而家睇返我d 朋友睇既kol,一個係台灣,一個係加拿大,佢地就辛辛苦苦係香港搵錢畀呢堆人係外國安安全全咁養老,香港有咩事佢地都唔會上身,而我地就晚飯都冇得出去食。

究竟香港人前世做錯咩,搞到而家咁折墮?」

我另一個網友,呢就話呢個生態,係一種好神奇既黃絲論政生態:

「呢個係一個好重要既內需循環。蠢黃同埋黃絲KOL,係互利共生既。

KOL散播愚昧 →蠢黃無獨立思考覺得好有道理 →課金養KOL →KOL見愚昧有市場,繼續散播愚昧。至於香港搞成點,唔係佢地主要擔心既,KOL只擔心課金,蠢黃只擔心有無心靈寄託或者精神嗎啡。所以渾水話要用錢投票,邊個KOL講過要撐泛民議員留任,就要退課金,佢地就好驚好驚。點解?因為佢地要錢。蠢黃呢?佢地冇咩意識既,只要有人講野,係佢arm聽。嚇到佢地好驚好驚,然後課金畀佢,佢地就會心安理得。呢種狀態,就好似邪教一樣。唔需要道理,亦唔需要…痛,咪會發癲囉。」

果種愚昧既狀態係點既呢?

香港既黃絲KOL 既招數,黎黎去去,都係兩招:

一、二元對立。

總之佢地支持既人,就係反對共產黨管治,抗威權。但呢一句說話,唔可以話絕對arm,或者錯。就正如,最近我睇到一份中二既公民教育既教材,佢地有一條是非題,就問中二既學生,中華人民共和國,是一黨專政既國家。true or false? 原來,根據官方教材既資料,中國政治教科書中,中華人民共和國的國體是:「工人階級領導的、以工農聯盟為基礎的人民民主專政。」又有稱中國的政黨制度,係「中國共產黨領導的多黨合作和政治協商制度。」

「一黨專政」則是中共以前標籤國民黨的既文宣:劉少奇係1937年,寫過《抗日游擊戰爭中的若干基本問題》:「我們的口號是:打倒漢奸政府、維持會,反對投降,改造原來一黨專政的政府成為人民的抗日政府。」1940年的《論抗日民主政權》進一步論述:「在全國,由於國民黨不願結束『一黨專政』,不願『還政於民』,這種政權仍然不能建立。」又在最後說:「有人說:共產黨要奪取政權,要建立共產黨的『一黨專政』。這是一種惡意的造謠與誣衊。共產黨反對國民黨的『一黨專政』,但並不要建立共產黨的『一黨專政』。」

所以,果個中二學生果條true or false既正確答案係咩呢?係false。因為,中國而家,仲有八個「合法」既在野黨,民主黨。佢地分別係中國國民黨革命委員會、中國民主同盟、中國民主建國會、中國民主促進會、中國農工民主黨 、中國致公黨、九三學社 、臺灣民主自治同盟。呢八個係中華人民共和國既反對黨,都係人大係有席位既。

而有台灣既學者就認為,實際上,中國還有八個「民主黨派」,但他們在政治上幾乎毫無權力,不但受共產黨領導,不能自主地籌集經費與發展黨員,完全是花瓶黨。所謂多黨合作的形式,限於「吸收民主黨派人士參加國家政權,邀請民主黨派代表列席共產黨的代表大會,通過各種座談會、懇談會直接聽取各民主黨派的意見。」

其中,中央層次吸收民主黨派,最多只是給予一兩個次要的部長職位;聽取意見,大部分都可以是「聽了不做」,最多可以類比港英時期的「行政吸納政治」中的諮詢委員會。或者而家中央政府要處理香港立法會同區議會既反對黨既方法,都係一樣既。

所以如果你聽到d 黃絲kol,甚至係過去幾十年,有人話要結束一黨專政,你先唔理佢有冇真係有實質既路線圖同方法去推翻佢地口中既萬惡不義政權,對呢個政權黎講,佢地會話一直以黎「結束一黨專政」既訴求,都係多餘既。因為,佢地唔認自己係一黨專政。第二,果堆反對派,係一直係中華人民共和國既基本法所賦予既權力之中,承認既合法織立法會入面,拎住人工去做反對派既。所以,佢地既反對聲音,佢地會唔會聽唔到?唔會。但會唔會行動?唔會。

因為,香港係一國兩制底下,永遠係中華人民共和國既一部份。只要中華人民共和國唔解體,反對派既存在,都係中共施捨畀佢地既。

因此,果堆kol話反對派係係度抗威權,只係謊言。因為,佢地今時今日既地位,都係以前,中共認為佢地好大方咁畀佢地既。而家,只係冇以前咁大方咁囉。

第二、果堆黃絲KOL既另一條常用招數,就係冇理由既抹黑同散播恐懼。我叫 #陰謀論論證。

以前同前港大學生會會長馮敬恩都討論過呢件事。係香港,面對一個議題,論政既人,就會放一個氣球出黎。佢地果句起手式,叫「我收到風」。以前娛樂版,係咁樣做野既。

個故仔,大概係咁既。都係一個例子,你可以想像一下既:

謝霆鋒個媽媽,叫狄波拉。拉姑有一日,就唔識點解會收到一個娛樂記者既電話,就話:「喂,拉姑,我收到風,你尋晚同柏芝,係咪嘈交呀?」係呢個位,拉姑梗係會好識趣咁答,冇d 咁既事。之後遊一輪花園。之後,就會哈哈嘻嘻咁好似過左果節節目時間。

第二日呢,就會有一份,自稱係民主大報,係公義既報章,就會娛樂版頭條度寫:「拉姑說:我冇同柏芝不和。」於是,重覆返個節目講咩,之後睇娛樂版既人,就會自己想像:喂喂喂?點解拉姑會無啦啦講呢句? 呢d 咪叫此地無銀三百兩囉。

咁,就可以做一日節目,做一日新聞啦。

呢種做法,蔓延到政圈,就會有人做節目果陣,就話,我收到風,聽講xx黨決定要支持政改方案啵?你決定點做呢?

之後,就算xx黨出黎講,話佢地現階段點點點,佢地係唔會認既。於是,第二日,果張由大家好支持既民主大報,就會話:xx黨表明,唔會支持/反對xx 方案。又做一日新聞。係前網路時期,因為大家都唔fact check ,亦都唔會咁容易睇到投票記錄,最後佢地會出咩就係真,所以,最後,呢堆政黨既政工作者,就可以無往而不利咁做左咁多年議員啦。

好啦,而家果堆黃絲KOL最中意講既,就係陰謀論。一係就話唔承認bno 係旅行證件,唔會畀你出境。再唔係就話打仗就會冇飛機,要走難去英國就而家要即去,而家叫你唔好去既都係收左共產黨錢既。呢種人,講既所謂估算,全部都係佢地心入面既想像。而呢種想像,只要放大一個概念:就係執政黨係惡魔,佢係正義,佢地講既所有野,都會有人信。

佢地講既野,真唔真,唔緊要。就係寧可信其有。

好似311 果陣,有d 明星係twitter 話要叫人帶遮,因為輻射會落黑雨,所以大家出街小心,要帶遮。但日本政府官方,後尾就話呢d 叫 dema,即係不實資訊,d 明星人人就做晒「散播謊言」既幫兇,但冇所謂,佢地要既,就係呢種好多人覺得佢做左好事既快感,而受眾亦都好樂於進入一架情緒過山車,嘩,好驚好驚呀!嘩,好在有邊個有邊個咋!嘩,課金課金課金。如果呢堆人真係咁幫到香港,點解呢堆人會咁賺到錢既?好明顯,就係而家好大件事,呢堆人先有市場啦,係咪?

所以,而家我地係進入左一個新既網路部落社會,香港已經痴晒線,變成「部落型社會」,人只會取信於部落內嘅觀點,從而作出行動,而無視外人。就好似某個部落既人,相信「火」係神既化身,可以控制「火」既就係神。不可以控制既「火」,就係神既懲罰。你同佢講,火可以由「光+熱」去構成,仍地唔會信。

呢個,就係聽香港某d 論政者既蠢黃蠢藍既生態。

不過,你唔好誤會,亦都唔係話而家既政治狀況唔可怕。

係好可怕。但就好似鬼月咁,係好可怕,但你明知佢係度,佢亦都會搞到你覺得好可怕,咁你會唔會因為可怕而做到任何野既時候,點解唔冷靜d 咁諗下,究竟我地應該點算好,而係畀騙子呃你d 課金,然後等佢不斷咁講鬼故畀你聽,然後搞到你好驚好驚,好辛苦好辛苦,然後沒有然後。之後走黎問d 冇收過你錢既KOL 拎答案,而唔係問果d 收左錢,收左票,然後用個議席黎賭J呃like既政工作者?

寫左咁大篇,好簡單,都係想賣下廣告。

想睇有深度有質素既內容分析,再加食好西,呢個月老娘生日,拍下片,分畀大家睇下。畢竟我飲飲食食最開心,果堆賤貨點鬧我,對我冇咩影響。影響既,係可憐既香港人而已。

你睇免費野,你既人生就畀一d 比你更不幸更廉價既人影響,值唔值得?你自己諗。

好似呢本,講民主黨「黨校」教d咩既書,我只給patreon 的訂戶看。

https://www.patreon.com/posts/41110964

 

點解我寫得出《未敢忘記2019/20》:https://www.patreon.com/posts/41110964

 

Become a Patron!

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

  • 【辦公室智慧】Learn how to not give a fuck, you will be fine. by 沒有句號
    大佬個 Sales Assistant – Ann 姐入 form claim 電話費,一次過 claim 一至八月,公司 policy 講明只可以 claim 最近兩個月嘅單,會計部都係跟 policy 做嘢啫,過咗期自然就彈㗎啦,所以 …
  • 【真人真事】小表妹的胎前記憶 by 表姐
    「你仲記唔記得喺媽咪個肚果陣係點架?」 「唔記得啦」 「再之前呢?未去媽咪個肚之前你喺邊架?」 「喺個天度」…
  • 失戀時,朋友講嘅野,聽下好喇! by 壞孩子
    佢地唔係你,唔知你個心有幾多掙扎,唔知你同個ex嘅經歷同佢俾你嘅感覺,就算你講左,佢地都係當故仔咁聽。而且,朋友為免你傻落去,通常都會叫你放手,話個人唔值得你等或者挽留。但你聽完,就算心知肚明,你鬼做到咁灑脫,如果你得,朋友就唔洗成日睇住你…
  • 關心柳俊江,仲多過十二位手足 by Terence Yun
    此新聞一出,不論是藍絲群組還是黃絲群組,都對此新聞樂此不疲,藍絲見此新聞,當然不會放過這個機會,明白,必然強力追擊,一定打到唔停手。但係唔明所謂的黃絲群組,所謂的本土、城邦之類,都對此也樂此不疲,大家七嘴八舌,當家常話,當正他有如阿嬌藝人般…
  • 去到英國做警花(自稱),見盡社會光怪陸離。 by 英國警花
    早排見d移民谷,個個都好擔心治安,人人好似會抬個夾萬日日出街等人打劫咁款,好似治安除左偷竊打劫外就無野要考慮。講到治安,你有冇諗過英國好多警力其實花了在照顧精神病人身上?…
  • 【MHXX攻略資料】村下位 ⋆1-6 KEY 任表 by VJGamer
    村 下位 ⋆1 KEY 任表 任務名稱 狩獵對像 出現條件 備註 古代林の特性ゼンマイ 採集 8 個特産ゼンマ […]…
歡迎讚好我們的facebook page,免費資訊源源送上。

文章資訊

ID: 209508
Date: 2020-09-03 17:54:27
Generated at: 2020-09-23 11:59:22
Permalink: https://www.vjmedia.com.hk/articles/2020/09/03/209508/被一些比你不幸和更不學無術的人影響你的人生,