練美施老公一係Total Loss，一係最大贏家

今次細SO嘅出軌新聞比起黃心穎嗰次有趣好多。我地首先睇下幾個人嘅回應：

細SO認錯，老婆原諒，練美施公開話仲愛佢，牌面贏哂。

老婆原諒細SO，贏得浪子回頭（表面上），大家都覺佢可憐又堅強，同情分最高。

練美施寧願自爆都要高調認愛細SO，甘願受萬人指罵。姑勿論佢真係想比細SO知自己心意定係想出位，佢總算達到目的。

Macy個老公呢？話原諒老婆，仲話老婆份人其實好好，但連老婆個心都留唔住，仲要全世界都知佢戴帽。

一個男人，比老婆當住全港面前話「我好愛奸夫」，仲要為佢落過仔，依種感覺我諗真係比死更難受。如果事實同表面睇落去係一樣嘅話，咁練美施老公自然係Total Loss嗰個：日後點面對住自己老婆？段婚姻仲行唔行落去？到底自己仲係咪佢最愛，甚至心目中有冇自己位置？除咗個慘字，我都諗唔到點形容。

但如果練美施同老公本身都係各有各玩呢？嘩，佢發達喇。

講起獵食，目標大概可以分為以下兩類：一類就唔需要呃呃氹氹，總知大家啱眼緣，肉體上又夾就可以，即係大家成日講嘅SP；另一類就係你收埋自己有家室嘅事實，然後搵一個真係想拍拖嘅人再發展另一段關係，而依一類當然要冒住東窗事發身敗名裂嘅風險。

而家香港邊個唔知佢老婆笠咗大大頂綠帽比佢？要鬥慘有邊個夠佢嚟？佢大可以繼續搵啲想拍拖嘅女人同佢發展關係，然後喺被發現有老婆嘅時候長嘆一聲，淡淡然咁同個女人講「我就係練美施個老公」，之後再講自己其實同老婆已經冇哂感情，只係為咗小朋友有個完整家庭先冇離婚。好多女人心甘情願同個有婦之夫一齊都係信個男人會離婚，遲早會比個名份自己。試問而家全香港仲有邊個比練美施老公更加有資格用依個理由？只要佢肯講就一定有人信。

如果練美施老公真係咁長情咁愛佢老婆，佢當然係最慘，最可憐嘅男人；但如果佢都喺一個Player，佢將會超越中國，成為真真正正嘅最大贏家。

作者：毛言地

你有多久沒去找自己的理想？搏殺一天，回到家，倒頭就睡。 無言，只因生存太累。談理想？妄想； 毛言仍言，只因理想，本就是「理應去想」 http://www.facebook.com/MaoYanDe

閱讀後覺得好，請多多讚好及分享～：）