【外賣仔日記】袋鼠邀請僅餘嘅舊制「時薪」轉「件薪」

關呢篇文事嘅人，應該都係持有deliveroo 僅餘嘅時薪加件薪合約（俗稱舊制）嘅師兄／師姐，可能有人係做咗兩年多，但係亦都有人已經做緊第四至五個年頭，首先想同嗰啲準備做第四至五個年頭嘅師兄／師姐講聲辛苦哂，多謝晒，感謝一直以來嘅努力。另外想同做咗兩年幾嘅師兄／師姐講聲，呢兩年習慣嗎？

相信大家都收到電郵，袋鼠再次邀請持有時薪合約嘅師兄／師姐轉件薪，而且今次係同2018年嗰一次邀請大家轉件薪好唔同，我覺得今次係勞資雙方嘅無力感都好重。

2018年deliveroo 邀請大家轉件薪，deliveroo 就不斷講緊件薪啲正面嘅事項，我就瘋狂講佢件薪嘅負面嘢，鬧到佢哋飛起，個陣deliveroo 只需要做多啲宣傳，基本上咩銀彈都唔需要，就有一大堆人會轉過去，今次突然嘅邀請，加上一個完全前所未見嘅金額邀請你轉，我覺得唔係單純想邀請你轉咁簡單。

持有緊時薪加件薪合約嘅師兄／師姐，你點都經歷過deliveroo 響2018 年邀請你轉件薪。講真吖，你要轉，就一早轉咗啦，而且個機會一直都響度，一封電郵就搞掂，唔會係今日見到個邀請加獎金先想轉啦。2018年推出件薪制度嘅時候，袋鼠要讚揚佢個新制度吸引人轉又好，或者邊個要抨擊佢個新制度，都只能夠靠一堆寫出嚟嘅嘢去吹。但今次嘅邀請唔同，個前題係大家係親眼見到大量送餐員兩年嘅數據，係有一啲最有說服力嘅數據下，deliveroo 提出呢個邀請，如果吸引到你嘅，一早吸引咗啦，使鬼有呢個邀請咩。

所以對於件薪制，毋須任何人在旁加鹽加醋，你哋心中都已經有一個定論。

如果係完全唔關心送餐員，佢哋要郁手根本唔難，甚至我認為有啲條款可以用嚟隨時郁手添。

好可惜係deliveroo 一直都會理送餐員，會尊重佢哋，我仲好記得2018 年年頭deliveroo 中西區送餐員第一次罷工之後，總經理羅家聰同時任營運部總監Sebastian Gilbert 寫咗封Letter to Rider 俾我地，佢哋大可以唔寫㗎，個陣仲可以大規模請人替代啲罷工嘅車手，但係最後無咁做。要以呢一種會真係關心員工嘅管理方式，如果要玩直接毫無預警下終止合約，重要對住一個做咗接近五年，甚至係一開香港deliveroo 就做嘅外賣員嘅人咁樣玩，可能性好低。

寫一封電郵嚟，除咗帶出deliveroo 無力感之外，外賣員都好難做，因為你唔想轉，你都係唔會因為今次邀請而轉阿，但係deliveroo 又放風話有可能唔會再支持時薪加件薪合約，你處境都陷於兩難局面阿。

當睇完封電郵我係同兩年前感覺好唔同，兩年前我或者會鬧到佢飛起，但係而家留低仍然都係時薪加件薪合約嘅，一定係有諗過，有度過。年資細嘅都有兩年，年資高嘅去到五年，要旁人再加意見，我相信就已經冇呢個需要。

我對呢封電郵嘅感受，我只能夠說，天下無不散之筵席，人生會聚散亦尋常。

但係你哋嘅市佔率高，開旺區嘅件薪都好似幾唔錯喎，但係香港幾時可以實行Free login Zone 阿？

某啲區多單，但係星期六日超級繁忙時間反而可能會無咩單，數據難儲阿，實行Free login Zone 啦！！！！！！！！！

專題：【外賣仔日記】

作者：外賣仔

閱讀後覺得好，請多多讚好及分享～：）