【隱世清幽】愉景灣橫山徑

愉景灣係一個好地方,前面係平靚嘅海灣,後面係清緑嘅山巒,有個水塘,又有夠細路玩水嘅山澗。今日取道愉景灣落梅窩,食啲嘢就行鳳徑一二段上大東山落伯公坳。我想早架,但食吓嘢又遲咗,七點鐘先到欣澳站,轉巴士成七點二十分先到起點。

呢個起點喺半山、小學嘅對面,條樓梯喺行山APP有名架,叫「SCHOOL STEPS」,路牌話七百米去到觀景台,不過全部係樓梯,一路撐上去百幾米高。行唔慣樓梯就要慢慢行,唔好急,一步一步上。我唔夠FIT,中間停咗四五次回下氣。

 

上圖︰SCHOOL STEPS山徑入口

 

樓梯嘅盡頭有分叉路,前進上老虎頭,左轉就去觀景台,好快就見到支標高柱,當然順手行出去KILL「標」喇!標高柱通常喺山頂同開揚嘅地方出現,方便山下測量人員搵到,憑住同唔同標高柱嘅方位嚟定位。而呢支「標」樹立喺愉景灣山邊一個突出開揚嘅地方,地圖有標示228米高,應該係俾山下嘅愉景灣、甚至係遠啲嘅迪士尼、做土地仗量嘅座標。企呢度,愉景灣沙灘、豪宅都在腳下。呢個時候又有啲海風,時間尚早唔太曬,係一個休息嘅好地方。嚟到呢度大約一公里,用咗半個鐘左右。

 

上圖︰標高柱係一地嘅高點,未必係山頂,但八九成開揚,方便山下測量人員找到以仗量定位。所以,呢啲地方通常都有良好景觀。

 

樓梯盡頭有直路上老虎頭,我在標高柱就見到之前在長樓梯爬我頭嘅兩位鬼佬山友已經上到一半,佢地咁FIT可能一陣間就上到老虎頭。

我就按自己嘅計劃,向南平路行,落少少就有個涼亭,又出去睇下風景先。呢個涼亭有個方向牌,正面就係東方,即係一日睇日出嘅好地方。住愉景灣嘅話,真係會揀個好天日子,或者係元旦、年初一咁,五點鐘走上嚟睇太陽出嚟。

 

 

呢日市區落紅雨,呢邊就只係密雲,上面張相其實見到好遠嘅市區係落緊雨,仲間中聽到雷聲添。

跟住就行落少少,經過有條山澗,有人帶狗狗落去玩水。再行前啲就到咗愉景灣水塘,諗起「遙望青山綠水美如畫」。呢個水塘無環湖嘅路徑,有啲可惜。

 

愉景灣水塘

 

過咗水壩無耐就見到呢兩個路牌,唔再行車路,轉入山路。呢條路係平住山腰行,未有名,我就叫佢做「愉景灣橫山徑」。條路係小路嘅格局,途中會過澗,有兩三個上落位我會安全啲出手扶住啲石嚟爬過,都係一兩步就通過到。我覺得技術好嘅山友可以彈下彈下就行過去,但我呢啲怕滑倒、睇踏腳位又唔係咁準嘅就會扶下山邊嘅石同樹,重心低啲,心理上又穩陣啲。SORRY我無影到路況嘅相,雖然講到要手腳並用咁,但係呢條路算係安全,所謂「難度」算係要留心一下啫,就算真係跌倒,又唔係懸涯,又唔係好高,又唔係有咩尖石,係好玩啲架。

 

有路牌,確認唔會行錯路。

 

八成以上嘅路況係咁,有人剪草,枯草鋪在路上,軟腍腍好舒服,但唔可以跑。

 

過其中一條小山澗,路在右面。

 

一路行,見到條路係有剪草機條整過,周圍算係密林,但係條路可以俾「一個人」舒適通過。要強調,條路只可單人行,好多郊遊徑、麥徑衛徑,通常闊到兩個人並排而行都得。跟住見到呢個牌,解釋咗我嘅諗法。

 

呢個牌唔似政府部門嘅,應該係愉景灣嘅管理公司嘅,即係呢條橫山徑係「私人管理嘅公眾康樂設施」。

 

過咗呢個牌嘅山路呢,都算清楚,雖然無之前嘅路況咁一百分,都仲係易行嘅。呢條橫山徑無分叉路,一往直前,行下又有個開陽位,一舊大石突咗出去,咁就行出少少影張全景圖。天上又嚟雷聲隆隆,對下地圖行咗五公里左右,但已經用咗成兩個鐘,要諗諗下一段點行。

 

另一角度望向愉景灣,天上「風雲際會」。

 

轉翻入山谷位,聽到強勁嘅水聲,應該到咗神樂院大水坑嘅上游,大路係落山,過澗就小路上紅水山。咁嘅天氣,自己狀態麻麻,行完黃竹角咀嘅攰仲喺度,決定取易不取難,行大路落山去神樂院。呢啲大路落山,快步走一陣就到石屎路。

 

神樂院外的路牌。

 

有啲雨點,但無打雷,一陣就到梅窩。呢條路太多人行過講過,唔寫咁多。

 

石屎樓梯,一路落去,梅窩在望。

 

銀鑛灣嘅公園有人放龜,佢主人話佢要出嚟晒太陽。

 

行咗三個半鐘,十公里唔夠。食個早晏,天氣都係麻麻,又仲係有啲攰,就啱時間撘船走人。大東山,留番下次。SOLO嘅好處係自己話晒事,自己知所進退就OKAY。

 

 

總結一下︰愉景灣横山徑無咩人行(一個山客都遇唔到),可能唔出名又唔係上山頂KILL BILL,夠野外、難度低、唔係鋪晒石屎但又好好行,真行山徑,唔係咁多,要感謝管理員維護得呢條山徑好好。

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

  • 【辦公室智慧】Learn how to not give a fuck, you will be fine. by 沒有句號
    大佬個 Sales Assistant – Ann 姐入 form claim 電話費,一次過 claim 一至八月,公司 policy 講明只可以 claim 最近兩個月嘅單,會計部都係跟 policy 做嘢啫,過咗期自然就彈㗎啦,所以 …
  • 【真人真事】小表妹的胎前記憶 by 表姐
    「你仲記唔記得喺媽咪個肚果陣係點架?」 「唔記得啦」 「再之前呢?未去媽咪個肚之前你喺邊架?」 「喺個天度」…
  • 失戀時,朋友講嘅野,聽下好喇! by 壞孩子
    佢地唔係你,唔知你個心有幾多掙扎,唔知你同個ex嘅經歷同佢俾你嘅感覺,就算你講左,佢地都係當故仔咁聽。而且,朋友為免你傻落去,通常都會叫你放手,話個人唔值得你等或者挽留。但你聽完,就算心知肚明,你鬼做到咁灑脫,如果你得,朋友就唔洗成日睇住你…
  • 關心柳俊江,仲多過十二位手足 by Terence Yun
    此新聞一出,不論是藍絲群組還是黃絲群組,都對此新聞樂此不疲,藍絲見此新聞,當然不會放過這個機會,明白,必然強力追擊,一定打到唔停手。但係唔明所謂的黃絲群組,所謂的本土、城邦之類,都對此也樂此不疲,大家七嘴八舌,當家常話,當正他有如阿嬌藝人般…
  • 去到英國做警花(自稱),見盡社會光怪陸離。 by 英國警花
    早排見d移民谷,個個都好擔心治安,人人好似會抬個夾萬日日出街等人打劫咁款,好似治安除左偷竊打劫外就無野要考慮。講到治安,你有冇諗過英國好多警力其實花了在照顧精神病人身上?…
  • 【MHXX攻略資料】村下位 ⋆1-6 KEY 任表 by VJGamer
    村 下位 ⋆1 KEY 任表 任務名稱 狩獵對像 出現條件 備註 古代林の特性ゼンマイ 採集 8 個特産ゼンマ […]…
歡迎讚好我們的facebook page,免費資訊源源送上。

文章資訊

ID: 209751
Date: 2020-09-12 08:29:46
Generated at: 2020-09-23 01:25:24
Permalink: https://www.vjmedia.com.hk/articles/2020/09/12/209751/【隱世清幽】愉景灣橫山徑