人愈大愈唔敢拍拖

 

 

「我買咗支指甲油呀,一陣幫我搽吖。」我說。
「你拍拖呀!?」媽媽說。
「癡線,搽指甲油同拍拖關咩事。」我說。
「你十年都唔搽一次㗎喎!」媽媽說。
「唔係囉,咁啱見到隻色幾靚咪買嚟搽。」我說。

拍拖,話易唔易,話難唔難,老土啲講有時都幾睇緣份(講完都覺得自己好old school),當然都睇你係想認真拍,定係散拖都OK啦,但我覺得年紀大咗,考慮係會多咗,唔似得廿幾歲嗰陣,有feel就試咗先,唔得咪散,然後再搵過,因為每次試其實都好攰,要重新認識一個人同畀人去認識,相處嘅時候要互相遷就、磨合,需要好大耐性,當中有開心、有感動、有失望、有傷心,即使到頭來係提出分手嗰個,其實都需要時間去復原,總括嚟講就係「心很累」。

拍得幾次拖之後,你會愈來愈清楚自己想要咩,例如同dede拍拖會發現雖然一齊嘅時候會帶嚟好多活力,但係同樣地會知道自己唔鍾意湊仔,面對太唔成熟嘅人係會溝通唔到,可能你會話:「咁係因為唔夠愛啫,夠愛就可以包容一切。」我承認係,只不過經驗值增加咗之後,有啲人你會預視到一齊咗都唔會長久,咁不如唔好開始,即係好似轉工咁,你都會考慮人工、福利、地點同工作內容等等,諗得好清楚先會決定轉,特別係出嚟做咗好耐嘢嘅人。

單身果陣你仲會發現一個人其實又幾自由喎,做乜都得,唔使再同人交代,同朋友一齊玩都開心,但又不得不承認拍拖嗰種幸福感始終係朋友唔會畀到你,然後當你遇到一個覺得幾啱嘅人,又會開始淆底,其實佢對我有無意思?係咪要因為佢跳出而家呢個Comfort zone?會唔會其實又跳咗落個坑到㗎?

「喂,你最近同佢點呀?」朋友阿花說。
「無點呀,敵不動我不動,敵動我都唔敢動啦,一陣柒咗咪死。」我說。
「歌都有得唱啦,愛真的需要勇氣!」阿花說。
「我唔想又奶嘢,而家自己一個咪好哋哋。」我說。
「點都好,我希望有一日可以見到你幸福。」阿花說。

成日聽人講「結婚嗰個通常都唔係最愛,只係喺適合嘅時間出現咗一個適合嘅人」又有人講「其實出軌都好正常,好多人都係隻眼開隻眼閉」、「三字頭都嫁唔出就做老姑婆㗎喇」等等,其實好多人都係廢嗡當秘笈,因為唔使負責任,最緊要係自己知道自己點諗,唔好人云亦云,唔好太在意人哋點睇你,只需要對自己負責就好,不過寫出嚟就易呀,做唔做到就真係好睇自己,大家一齊努力吧。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 209776
Date: 2020-09-13 09:11:41
Generated at: 2020-09-22 18:29:25
Permalink: https://www.vjmedia.com.hk/articles/2020/09/13/209776/人愈大愈唔敢拍拖