係香港,仲有邊個想論政?

政治 / 最新文章綜覽

上星期,收到一個聽眾既留言,係咁既。

 

「健吾,我睇到個民主派話民調單野,就真係好笑。爛頭卒就民主黨做,公民黨呢?回應左未? 佢地明明係泛民第二大黨呀,佢地而家留定走,有冇同人講?第7屆立法會選舉,明明畀人dq晒架,點解而家唔出黎反抗下?唔出黎講佢地唔接受不公義既委任?點解要等民調?香港人,又係唔明既,點解個民調做左一次,又唔算數,要做多次?咁咁多年黎,鍾庭耀做既民調,係咪都係唔準確既?仲有呀,點解要9月21日先做?佢地之前已經做過一次民調,個答案已經鬼鬼地架啦:贊成留任既,就得一個答案可以揀,反對留任既,就有三個,全部走,部份走,被dq唔畀參選既留,咁即係反對留任既人既意見,就會被分成三格啦?咁一定會畀人分薄架啵。點知出晒術去做民調,民意都係話走既居多,咁點解而家仲要做多次?家陣係擲聖杯,擲到你自己高興為止呀?於是,民主黨咪派入屋傳單囉。係呀,黃之鋒鬧得啱架,點解公投果陣唔做,而家做呀?係咪想民意支持佢留任?梗係啦。唔係佢印黎做咩,派黎做咩?唔使錢呀?但黃之鋒鬧人,又係on 居既。鬧黎做咩?人地個黨做野梗係為黨利益架啦,好似黃之鋒咁黨都冇埋,冇得為黨利益做野,佢點會明下面有幾十個細既要養有咩感覺呀?所以睇黎睇去,呢d 野,我真係唔知同邊個講。丫,仲有呀,唔知點解呢,而家講呢d ,就冇人講分化架。龍門告個手足誹謗,係咪分化呀?係咪割蓆呀?果堆話人分化果堆網軍,連登acct telegram group 仲有 ig 文宣組,全部靜過太空,聲都唔敢出一句呀,香港人仲係信d 唔知咩人講既野就當自己覺醒左,你話呢個世界點會變得更好呀?」

呢個星期心情好,又有朋友送左好多生日禮物俾我,飲多左少少,又講多d。

 

民調,係一門科學

民調,其實係一門科學。係903國民教育,我都同時任既港大民意研究計劃既鍾庭耀博士做過訪問,民調係民主社會重要既工具,民意係會協助政客做適當既決定既,但係問題在於,如果參與民調既人,都唔尊重民調,或者係直接d 講,如果政客都唔接受民意,咁民調仲有冇意義?

從另一個角度黎講,有好多從政既人都覺得,選民係白痴黎架,佢地冇腦架,幾個kol 講咩就信咩架啦。好似咩擅用某人言論當成支持咁,呢d 咁既事情,你估反對派既政客做得少咩!? 所謂敵我矛盾,親疏有別丫嘛,係自己人講既野,咪咩都啱 ,唔係自己人講既野,就咩都錯囉。再唔係,用你講既一句說話,再加個「竟然」,所有野都會好似好煞有介事咁架啦。嘩,羅冠聰「竟然」話「泛民議員是否留任對國際線冇影響」啵,係咪好煞有介事呢?之後再可以加一句自己既引論,例如:嘩,羅冠聰「竟然」話泛民議員是否留任,對國際線冇影響。咁果堆以議員身份既人,冇左議員身份,冇得去遊說,係咪都係冇影響?亦都代表,佢地以前既遊說,都係冇影響力既呢?

係網上面,就係有好多呢d 咁既「竟然」,呢d咁既「係咪即係代表」,將d 語氣,推論,又或者政工作者想市民「覺得」既印象,塞畀一d 冇講過呢d 野既人個口度,然後就變成果d 十幾分鐘一條既youtube 片,之後有一堆唔知點解,以為自己覺醒左既香港人,listening 本身有問題,理解能力又有限既人就會簡化成一句本來唔係咁解既意思,如「羅冠聰支持民主黨留任」,又或早係「羅冠聰話以前泛民議員遊說冇用」等等既結論,再做圖廣傳啦。

各位,如果你睇晒我既脈胳,我對羅冠聰或民主黨既做法,係冇任何意意見既。畢竟留任與否同國際線冇關,係一句好聰明既命題,進可攻退可守,唔會得罪現在議員,一d 唔知會唔會留任既議員。至於,有咩係同國際線有關?你地心知。不過而家唔講得咁解既。而民主黨呢?出文宣講自己想講既野,有咩問題?難得佢地有錢。佢地咁想留低,然後想市民支持佢,咪出文宣囉。社會運動係咁架啦。過去一年,大家係睇得少,定係未接受,佢地係咁做野?

 

不過,親疏有別最重要

不過,網民或者網軍如果聽到呢段,佢地就會做圖,然後抽呢句出黎放大黎操弄民意啦。

呢d ,就係係香港既所謂民主操作,一群將敵我矛盾放到最大,先問親疏不問道理再講說話既政客,見到民調唔合自己心意,於是再做文宣,係呀,入屋傳單呢d 咪文宣囉,就係想改動民意,鼓動民意既方法。

民意,真係會變既。我記得,梁振英對唐英年果陣,反對派既議員,尤其是係公民黨既議員,特別中意講一句:寧願要個奸,好個要個蠢。

後來,大家求仁得仁啦呵?佢地為左要達到佢地既目的,等中央「知道佢地呢班人係反對聲音分餅仔招安」,於是就大力打宣傳,話唐英年係地產霸權既代言人。結果係點?點知,反對派既人既估算,係錯晒既:中央其實係覺得邊個做都冇所謂既。所以你唔中意唐英年囉,咪畀梁振英你囉。結果係點,大家睇到啦呵?

 

anyone but cy,你咪求仁得仁囉。

好啦,到上一次,雨傘過後,大家要既,只係anyone but cy,學聯係雨傘果陣,話指名要見林鄭既。好啦,而家anyone but cy,就畀個cy 2.0 你。所謂民意,真係會變架。所以,想為自己既政治利益圖謀打算既人,其實係好應該,亦都會好正常咁,希望民意會因為佢地既文宣而有所改變囉。

所以,你話而家既政工作者,係尊重民意定係玩弄民意?

答案,亦都非常簡單:睇下你,係咪佢地既支持者囉。

只要你信左佢地,投左票畀佢地,仲相信「唔係要畀泛民贏,而係要建制輸」,咁佢地點做,都係啱架。因為,而家要不分化,不割蓆丫嘛,唔可以講反對派有咩唔好架。一講,你就係鬼,你就係收共產黨錢既鬼。

係個咁既環境,邊個會論政?就係想害你既人囉,呵呵呵。

 

Become a Patron!

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

  • 【辦公室智慧】Learn how to not give a fuck, you will be fine. by 沒有句號
    大佬個 Sales Assistant – Ann 姐入 form claim 電話費,一次過 claim 一至八月,公司 policy 講明只可以 claim 最近兩個月嘅單,會計部都係跟 policy 做嘢啫,過咗期自然就彈㗎啦,所以 …
  • 【真人真事】小表妹的胎前記憶 by 表姐
    「你仲記唔記得喺媽咪個肚果陣係點架?」 「唔記得啦」 「再之前呢?未去媽咪個肚之前你喺邊架?」 「喺個天度」…
  • 失戀時,朋友講嘅野,聽下好喇! by 壞孩子
    佢地唔係你,唔知你個心有幾多掙扎,唔知你同個ex嘅經歷同佢俾你嘅感覺,就算你講左,佢地都係當故仔咁聽。而且,朋友為免你傻落去,通常都會叫你放手,話個人唔值得你等或者挽留。但你聽完,就算心知肚明,你鬼做到咁灑脫,如果你得,朋友就唔洗成日睇住你…
  • 關心柳俊江,仲多過十二位手足 by Terence Yun
    此新聞一出,不論是藍絲群組還是黃絲群組,都對此新聞樂此不疲,藍絲見此新聞,當然不會放過這個機會,明白,必然強力追擊,一定打到唔停手。但係唔明所謂的黃絲群組,所謂的本土、城邦之類,都對此也樂此不疲,大家七嘴八舌,當家常話,當正他有如阿嬌藝人般…
  • 去到英國做警花(自稱),見盡社會光怪陸離。 by 英國警花
    早排見d移民谷,個個都好擔心治安,人人好似會抬個夾萬日日出街等人打劫咁款,好似治安除左偷竊打劫外就無野要考慮。講到治安,你有冇諗過英國好多警力其實花了在照顧精神病人身上?…
  • 【MHXX攻略資料】村下位 ⋆1-6 KEY 任表 by VJGamer
    村 下位 ⋆1 KEY 任表 任務名稱 狩獵對像 出現條件 備註 古代林の特性ゼンマイ 採集 8 個特産ゼンマ […]…
歡迎讚好我們的facebook page,免費資訊源源送上。

文章資訊

ID: 209797
Date: 2020-09-14 17:34:39
Generated at: 2020-09-23 01:25:15
Permalink: https://www.vjmedia.com.hk/articles/2020/09/14/209797/係香港,仲有邊個想論政?