有時人會失望,都只係因為抱有太大期望

 

 

「我想放棄喇,佢都唔關心我嘅,成日都隔幾個鐘,甚至係第二日先覆我whatsapp。」我說。
「可能佢忙緊呢,唔係個個都成日睇電話。」阿花說。
「咁佢都有講好忙,但係有時佢講同做係兩回事,我都唔知邊句真邊句假。」我說。
「男人知道女人鍾意聽咩,咪會講嚟氹下你囉,你聽完sweet完就算㗎喇,唔使咁上心。」阿花說。
「真係認真便輸了。」我說。

我都算係個機不離手嘅人,所以我通常都會好快覆人msg,除非忙緊、miss咗或者唔識覆,當然有時講無聊嘢都會已讀不回,朋友入面都有啲人係好似我咁覆得好快,有啲就時快時慢,有啲就勁耐先覆一次,甚至係經常已讀不回,但係唔覆嘅朋友其實都好熟,出嚟面對面都有大把嘢傾,只係平時真係少玩電話。

Whatsapp嘅好處係容易講啲平時唔敢講嘅嘢,所以有時可以討論得深入啲,但係當你每次都秒覆,然後等幾個鐘先有回覆,就會無癮再講落去,而且等人覆真係好辛苦,成日check住個電話都見唔到有佢嘅回覆,每次都係失望而回,然後就會開始亂諗,佢係自己有嘢忙緊?定係同其他人忙緊?佢做緊咩?點解睇咗都唔覆嘅?係咪佢一啲都唔在乎?然後一直處於患得患失,心情大起大跌嘅狀態,完全無心情做嘢。

「我搵佢佢就唔理我,我唔搵佢佢就搵我,點解咁犯賤?咁我搵定唔搵好?」我說。
「你想搵咪搵,你講咗你想講嘅嘢咪得,使鬼理佢覆唔覆,諗佢做緊乜,關你Q事咩。」朋友Ryan說。
「又好似係喎,做咩要諗咁多,覆咪bonus,唔覆咪算L數。」我說。
「同埋你世界又唔係得佢,大把其他嘢做啦,使鬼捕住個電話,森林又唔係得一棵樹。」Ryan說。

之前有時我好想搵佢,有嘢想同佢講,我都會忍住唔搵,或者係特登隔幾個鐘先覆,但其實我而家睇返轉頭,咁做只係會令自己辛苦,始終都係應該跟住個心去行,除此之外,都係花多啲時間喺自己身上啦,睇吓書、寫吓嘢、食下好西同做吓運動,增值自己,咁就唔會咁易亂諗嘢,有時人會失望,都只係因為抱有太大期望。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 210088
Date: 2020-09-19 09:14:08
Generated at: 2020-10-21 10:58:37
Permalink: https://www.vjmedia.com.hk/articles/2020/09/19/210088/有時人會失望,都只係因為抱有太大期望