去到英國做警花(自稱),見盡社會光怪陸離。

 

早排見d移民谷,個個都好擔心治安,人人好似會抬個夾萬日日出街等人打劫咁款,好似治安除左偷竊打劫外就無野要考慮。講到治安,你有冇諗過英國好多警力其實花了在照顧精神病人身上?

唔好笑呀,英國真係好多癡線佬,就好似台灣嘅手信係鳳梨酥、香港嘅手信係老婆餅,英國嘅手信應該係癡線佬。嗰種癡線嘅程度係由內到外再由外去返內,每日我出更,老爆兩日一單、偷野搶野我就兩三日處理一單,但係家暴同精神病患相關的case,我就次次出更都中嘅。

當中最地獄嘅係精神病人的家暴案,你係完全無辦法錄到口供,兩個思覺失調嘅話有人打佢,查左半日都講唔清到底係佢地互打、定係有人打佢、定係其實根本無事發生過。咁我地始終唔係香港啲黑警「呀Sir開file唔駛你教」,我地英國係「呀Sir開file唔會手軟」。就算你再癡線都好,我都會同你開足晒file,就算你再語無倫次都好,我都會錄埋你嘅口供,然後再叫白車黎送晒你地去醫院搵醫生檢查。

有時候我地都好無奈,社會資源唔夠,無人去理佢地,結果就係三日唔到兩日佢地又報一次警,然後我地又錄口供、送去醫院,然後隔兩日又放返出黎,無間地獄咁重覆又重覆。

直到有一日,佢地真係癲起上黎互劈死左個,咪會有政府部門睇返晒我啲報告,佢地做野囉… 英國窮呀嘛,所以唔到爆鑊邊緣都冇人會理,純粹係佢地爆得快,定我地架警車飛得快,我地快一步就再loop無間地獄,我地慢一步就有人真係會落地獄架啦。就好似今日咁,有個「職業特攻隊」瘋狂逆線飛車,我地幾經辛苦截停左佢,原來嚴重思覺失調,仲要俾佢吐口水。咩話?打佢老母?你諗都唔好諗呀,我地全部有隨身攝影機影住架,結果咪又係送佢去醫院,然後等醫生檢查完再送佢走。然後… 終有一天我地攔唔住佢架車,然後N屍N命,但我地依家都冇辦法。

我唔係想污名化精神病人,佢地大部分都係好安全同埋友善。但係你如果真係遇到個癡線嘅周街鬧人/搞人(其實通常佢地自己鬧自己比較多),我真係只能講句「深表遺憾」。唔好諗住移左民,從此就係美麗新世界,你以為香港癡線,黎到英國你先知咩叫唔正常呀~

 

#然後個癲佬仲要鬧我有賊唔捉專拉好人
#你衝左六盞紅燈逆線行車十分鐘兼無牌駕駛
#你邊忽好人啊
#你係好人嘅話我係港姐啦

 

作者:英國警花

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 210101
Date: 2020-09-19 08:15:15
Generated at: 2020-10-30 22:27:17
Permalink: https://www.vjmedia.com.hk/articles/2020/09/19/210101/去到英國做警花(自稱),見盡社會光怪陸離。