【港人英國警花實錄】一星期接兩三單：分手後發現對方有自己裸照. . .

是咁的，在英國做警察，同做人老豆老母無乜分別，好多人芝麻小事都會報警，而當中最令呀姐我反晒白眼嘅就係：分手後先發現對方有自己啲裸照而報警。

我明白兩個成年人拍拖，情到濃時影下相、拍下片好正常，但同一時間，你都要諗下萬一分左手點算？但好多人似乎真係唔用腦，影完分左手先黎驚，萬一對方擺啲相/片上網點搞？

我地嘅答案係：無辦法架，你當時同意，佢又冇擺上網，唔犯法警察做唔到野架！唔通我走去搶你前任嘅手機，拎本電話簿打完心口打背脊，迫佢解鎖再幫你刪相咩？（後面嗰段係我內心讀白，我地專業嘅，梗係唔會咁講啦）

一星期起碼接兩三單呢啲「桃色糾紛」，真係人都癲。在此警花姐姐呼籲各位小朋友：請唔好隨便給自己另一半發裸照，同埋自拍愛情動作片，因為覆水難收，出左嘅水同拍左嘅片都係收唔返，分手嘅時候又係得個煩字。

有時候呢啲case真係好令人哭笑不得，就好似早兩日我地遇到個case，個女仔報警話好擔心前任男友有佢嘅裸照，堅持要我地同佢講，叫佢刪相。咁好啦，你開免提我地四四六六拆掂佢囉。點知我地講到一半，個男人話一早就刪晒佢啲相，然後講「警官們，你知道這母豬的裸照有多嘔心嗎？每次跟她上床我也要關燈，我拍她裸照是因為我懷疑她有性病，我拿去問醫生。你猜醫生說什麼，你又猜為什麼我會分手？」女事主連忙掛線，場面極度尷尬。

原來… 拍裸照還可以有醫學用途… 長知識了（汗）…

作者：英國警花

閱讀後覺得好，請多多讚好及分享～：）