溝同事,敢?唔敢?

 

 

「喂,其實點解你會鍾意佢?」朋友Ryan說。
「因為我喺公司成日都見到佢好努力咁做嘢,認真工作嘅男人好charm,感覺又好成熟,好可靠咁,對屋企人又好(下刪十萬字)。」我說。
「聽落又唔錯嘅,唔似得你之前嗰啲,問你鍾意佢乜你都答唔出。」Ryan說。
「不過佢對我忽冷忽熱,其實我都諗住放棄㗎喇。」我說。
「鍾意人咪去馬囉,怯,你就輸一世!同埋好心你扮下靚,成日都咁頹,搵鬼溝你囉。」Ryan說,呢條友永遠都咁mean。

同事日見夜見,有好感真係唔出奇,但係由好感提升到變成情侶真係一啲都唔易,又唔可以做得太明顯,驚畀其他同事發現,通常呢啲情況一畀人起哄就玩完,膠劇情節就係其他同事會問你哋係咪有嘢,係咪鍾意對方,然後基於面子問題、淆底,更慘嘅係堅無feel,就會死口唔認。

一齊做嘢嘅好處係可以見到大家真實嘅一面,例如係爆粗鬧腦細,點樣解決問題,同其他同事相處嘅時候係點,當然加班加到天昏地暗,殘到呀媽都唔認得嘅樣都見過晒,而唔係好似交友app咁,完全唔知頭唔知路,好無安全感。

女人面皮薄就梗㗎喇,你知啦如果會錯意好柒㗎嘛,同埋一場同事,處理得唔好真係好大鑊,分分鐘要搞到辭職,所以一直都係處於「敵不動,我不動」嘅狀態,仲要一有少少唔對路就即刻龜縮,喺度諗哎呀唔得㗎喇,都係當佢普通同事咪算囉,自己一個咪好哋哋,無期望無失望呀,一陣又受傷就慘喇。唔知點解對住鍾意嘅人,就會無晒自信,淆晒底,可能諗得佢太好,就會覺得自己襯唔起。

直至之前見到「小鬼」單新聞,我先突然發現人原來真係可以好化學,今日唔知聽日事,加上而家疫情未完,其實身體健康,行得走得已經要感恩,如果因為一時嘅淆底無去行動而第時有所遺憾,咁不如努力試咗先,即使最後係失敗,柒到核爆。其實遇到一個鍾意嘅人真係一件好難嘅事,而佢又咁啱鍾意你更加係難上加難,到真係咁好彩一齊到,都可能仲有好多相處嘅問題,愛情呢個課題真係唔簡單,夠我上一世。

「喂,上次聽完你講之後我諗住去馬,但係我唔識點去。」我說。
「男人都係視覺動物,執返個樣先啦,之後就多啲身體接觸囉。」Ryan說。
「無啦啦點身體接觸啫!?」我說。
「借啲二挨埋去囉。」Ryan說。
「癡線邊做到,成日畀埋啲生埃tips。」我說。
「咁你自己執生喇,good luck。」Ryan說。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 210304
Date: 2020-09-28 10:06:15
Generated at: 2021-05-14 18:01:36
Permalink: https://www.vjmedia.com.hk/articles/2020/09/28/210304/溝同事,敢?唔敢?