三步抒發負面情緒,絕招係. . .

 

 

早排覺得個人好負面,一嚟工作壓力大,二嚟感情唔順利,三嚟因為疫情少咗同朋友出去玩,少咗去做運動,安多酚少咗,壓力又抒發唔到,加上每日睇住社會上嘅不公義,就會好憤怒,但係同時無力感又好重,甚至有啲絕望,於是成個人唔係抑鬱就係暴燥,不停放負,簡直係生人勿近,好彩朋友同讀者都無放棄到我,我最近開始慢慢復活喇!而家諗返轉頭先發覺嗰陣嘅自己好傻仔,好執著,成日為咗啲未必會發生嘅事而憂慮,無好好活在當下。

其實唔止我,我諗好多人都成日會有負面情緒,我哋要做嘅唔係壓抑佢,而係要學識點樣同佢相處,點樣喺適當嘅時候釋放佢,負面情緒就好似一隻住喺心入面嘅怪獸咁,愈困住佢,佢就會愈癲,甚至令你傷害自己,所以你得閒要帶佢出嚟散吓心,畀啲好嘢佢食,佢就會乖乖哋變返隻狗仔,每個人對付佢嘅方法都唔同,我就分享吓我嘅做法。

遇到唔開心嘅事,我通常第一步都會同身邊嘅朋友呻,通常講完都會舒緩咗,溫馨提示大家,其實好多時朋友搵你呻都唔係要求你要畀個實質嘅解決方法佢,你只需要聆聽,表示理解就可以,小事可以咁樣解決,但有時嚴重嘅話會發覺就算同咗好多人講,聽咗好多安慰嘅說話,個心仍然係唔舒服,跟住第二步我就會去做運動,例如跑步,做瑜珈等等。

第三步係絕招嚟,其實得閒就可以做,對身心都健康,就係離開電子產品一日,你會發覺個世界寧靜咗好多,個心都會好平靜,自自然然心情就會輕鬆起嚟,你可以去行吓公園曬吓太陽,可以去圖書館睇吓書,去cafe飲杯嘢扮吓偽文青,唔使再望住個電話,欣賞吓香港嘅風景,留意吓身邊嘅人同事,有時其實都幾有趣,有日我就聽到有個女人喺度同朋友呻。

「我呀媽覺得女人就係要結婚生仔,只有呢兩樣嘢先係女人嘅成就喎!」女人說。
「佢都真係好傳統喎,咁你點算?」朋友說。
「有咩點算,唔理佢囉!時代唔同咗㗎喇,女人做嘢叻都可以好叻,都可以係成就,唔使一定要靠男人!」女人說。

我即刻好慶幸我呀媽無催我結婚生仔,佢永遠都係話開心就好,其實平時嘅生活實在係太忙碌,我連行步路都快過人,就算放咗工,都花好多時間去睇FB同IG,或者同人 whatsapp,浪費咗好多時間,又無乜得著,所以久唔久有一日比自己靜落嚟,同自己溝通,整理心情,掃走晒啲唔開心嘅嘢,就會豁然開朗,覺得現況其實都唔係咁差啫。

其實幸福一直都在,只係我無張看眼去睇,去感受。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

  • 做傳銷其實同入邪教無乜分別 by 小盛女
    「想唔想快啲有錢結婚買樓?」「想唔想快啲搵到人生嘅第一桶金?」「想唔想出人頭地?」「想唔想一世免費用護膚產品?」…
  • 【MHXX攻略資料】村下位 ⋆1-6 KEY 任表 by VJGamer
    村 下位 ⋆1 KEY 任表 任務名稱 狩獵對像 出現條件 備註 古代林の特性ゼンマイ 採集 8 個特産ゼンマ […]…
  • 運動場上的小團體——「女朋友協會」 by 愛麗 ‧ D
    曾經遇過一個最讓我佩服的女生是這樣的:首先她拿到了全勤;而且她親和力夠,再且可能因為全勤的關係,跟男朋友ssssss都熟絡,熟悉得能接下球場上內外的所有人的所有話題;還熟悉球場上所有的規則,懂得球證每次響哨的意義;還跟每一位女朋友都熟,就像…
  • Goodbye HK, Hello HK. by 毛言地
    班機兩點半飛。預早三個鐘到準備Check-in,再計埋搭巴士去機場,準時十點打開屋企大門,準備迎接久違嘅飛行之旅。雖然平時我同啊媽買餸幫手拎袋橙都話好重,但拎行李就另計,再重都係開心事。等巴士用十五分鐘,車程用差唔多一個鐘。雖然淨係去機場嘅…
  • 吃很多但不會胖的女子 by 藍兼併
    她啜了一口凍檸茶,然後接連吃了三口米粉,郊外的泰式食店在晚飯時段前的最後一個下午茶餐,在她慢慢品嚐下,變得特別美味。她是個會吃很多,但看起來依然弱不禁風,有時瘦削得營養不良的模樣,臉頰都會凹陷,只有鼻樑是高挺的女生。…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
歡迎讚好我們的facebook page,免費資訊源源送上。

文章資訊

ID: 210586
Date: 2020-10-14 09:02:25
Generated at: 2020-10-20 15:16:25
Permalink: https://www.vjmedia.com.hk/articles/2020/10/14/210586/三步抒發負面情緒,絕招係