Goodbye HK, Hello HK.

我叫阿朱，今日絕對算係我今年當中最重要，最興奮嘅一日。

撲到機票之後，上個星期同公司拎咗兩日大假，今日天未光我就起身，再望一望我個行李係咪已經執好。七公斤重量啱啱好符合手提行李要求，反正今次我冇咩要買，香港我都成日去架喇，唔洗特別買咩返嚟，自然唔洗留位買手信。

班機兩點半飛。預早三個鐘到準備Check-in，再計埋搭巴士去機場，準時十點打開屋企大門，準備迎接久違嘅飛行之旅。雖然平時我同啊媽買餸幫手拎袋橙都話好重，但拎行李就另計，再重都係開心事。等巴士用十五分鐘，車程用差唔多一個鐘。雖然淨係去機場嘅時間已經差唔多同機程一樣，仲未計要喺機場等三個鐘，但搭飛機就係咁值得期待，就算之前要辛苦少少都冇所謂。

終於到赤鱲角。入到機場真係同以前差好遠，人少到大叫都可能有回音。一諗起我可以成為今日全香港少數有得搭飛機嘅幸運兒，轉頭喺登機閘位影張相就可以打卡，Tag返一句「我飛喇」同埋「終於有得去旅行」，我身邊班朋友一定好羨慕。嘻嘻，一千蚊嘅單程機票真係值回票價。

唔知有冇人同我一樣，覺得機場嘅麥當勞係特別好食。雖然係貴啲，但話哂係我起飛前喺香港嘅最後一餐。一陣叫完個餐之後又要自拍多幾張，然後Tag返句「香港最後一餐」同「大家不要掛念我」先。

食完嘢，行足一大段路，終於見到8號登機閘位！雖然我好想即刻跑過去攬住個閘口指示牌再自拍，但緊係要去買返杯星巴克先，再戴返好副黑超，咁先係去玩應該有嘅態度！舉起杯咖啡，自拍完一輪之後，仲有一個鐘先可以登機。喺依個時候緊係善用時間，將頭先影堆相執返好先，然後喺起飛之前再Post上FB同IG，到我一落機嗰陣仲唔收爆心心？

死喇！唔記得買Sim卡，陣間咪上唔到網？啊，好彩都係飛去香港，將Sim卡應該都收到嘅，唔緊要。

終於可以排隊準備登機，我即刻拖住個手提行李排喺頭位，等空姐Check我護照同機票。上到飛機之後，我搵到我靠窗個位置坐低。喺Post好唒相之後我將電話Set去飛行模式，廢事轉頭轉咗我去漫遊收我天價電話費。時間愈嚟愈近，飛機都終於郁。空姐繼續話比大家知逃生門喺邊同救生衣點用，不過今次大家冇再忽視，而係個個都聽得好入神。緊係喇，咁耐冇飛，依個位都好令人懷念。

「祝閣下旅途愉快」。喺空姐講完依句之後，我知道今次嘅旅程終於要開始。我終於喺一年之後再次可以飛，可以開始一個真正嘅旅行—比起搭船過長洲，果然都係搭飛機先算出埠。依個時候我又諗到一句新Tag，不過最衰飛機已經起飛，我唯有喺落機之後先再Post多張相落Tag喇。

「Goodbye HK, Hello HK.」

作者：毛言地

你有多久沒去找自己的理想？搏殺一天，回到家，倒頭就睡。 無言，只因生存太累。談理想？妄想； 毛言仍言，只因理想，本就是「理應去想」 http://www.facebook.com/MaoYanDe

閱讀後覺得好，請多多讚好及分享～：）