麥味重

享受人生 / 最新文章綜覽

 

 

麥味重——一個同啤酒有關的形容詞,唔知大家有無聽過或者講過呢?有無發覺以前無人咁形容啤酒㗎喎,係近年興起手工啤酒或曰精釀啤酒之後,就開始有人答想飲啲咩啤酒嘅時候話想要杯麥味重啲嘅!

 

咁究竟乜嘢係麥味重?個人觀察就認為其中一個原因係當初手工啤經常被人以「麥啤」概括,因此,好多新手就會用「麥味重」去表示「想要杯『麥啤』」-即係唔想要平時飲開嗰種啤酒,但其實佢唔知啤酒真係有好多唔同風味,亦根本唔知「麥味」係點。而此類對答,如果發生喺專飲精釀啤酒嘅酒吧,即係飲CRAFT BEER嘅TAPROOM,就會係一個好機會向有興趣了解精釀啤酒嘅人推廣了!

由於我係玩自釀而認識精釀啤酒,或者我試吓從玩自釀啤酒嘅角度去解釋呢三個字嘅意思,可能下一次你聽到或者想講呢三個字嘅時候諗返起以下所寫嘅嘢,會知道應該點做。

 

又要從啤酒四大元素講起,即係麥芽、水、啤酒花、酵母,麥味重應該同麥芽較大關係啦,咁其實麥芽點先會問影響到麥味重唔重呢?係多啲麥芽定深色啲嘅麥芽呢?我哋又試吓從設計酒譜嘅麥芽配方開始睇,我哋設計酒譜嘅麥芽配方通常係由基礎麥芽同特殊麥芽組成;而比例上,基礎麥芽佔絕大部份,換言之,重唔重麥味即係取決於基礎麥芽!?又係唔係呢?

基礎麥芽係咩來呢?就係酒譜嘅麥芽組成中提供足夠可發酵糖嘅麥芽,有關釀酒嘅過程可以睇返呢篇。雖然有些特性較突出的基礎麥芽品種會成為一些啤酒類型嘅風味特徵,然而,較多的類型是因為特殊麥芽所添加嘅風味而令啤酒成品中會有較明顯嘅麥芽風味表現,在眾多啤酒中亦有不少強調麥芽風味嘅類型。咁即係強調麥芽風味嘅啤酒類型就係麥味重嘅啤酒啦!?又係唔係呢?

 

根據啤酒類型指南BJCP舉幾個強調麥芽風味類型嘅例子,如Märzen、Munich Helles、Scottish Ale、British Brown Ale等,當中提及到Malty亦有分為grainy-sweet、toasty、bready、caramel、roasted、toffee、nutty以至chocolate等;而根據《啤酒品飲聖經》(第44頁,臺北市:積木文化出版),上述嘅風味形容大致就係烤麵包、焦糖、太妃糖、麵包、焦香、巧克力等。原來,麥味可以更具體去形容,至少,大家會比較有把握咩係麵包味、焦糖味、拖肥糖味、多士味、朱古力味啦。咁以後想講或聽到「麥味重」嘅時間,不妨停一停,諗一諗上面嘅描述再溝通下,相信會更容易得到想要嘅嘢。

 

多謝你睇到呢度,係咪覺得學玩自釀對了解啤酒有好大嘅益處呢!除咗對麥味會有更多了解之外,更可以根據你對麥味嘅想法創造更多可能性,自己設計一款「麥味重」嘅啤酒都得。其實,香港有個聯合自釀啤酒玩家嘅組織叫Hong Kong Homebrewers Association,致力推廣自釀啤酒文化,定期舉辦活動之餘,每年仲有比賽添。而作者深信,本地嘅自釀風氣盛行,必能壯大本地精釀產業,為香港越來越少的特獨文化添上新元素,向世界展示「香港製造」依然係好嘢!

 

作者:發記

由自釀開始愛上啤酒。

閱讀後覺得好,請多多讚好及分享~:)

其他熱門文章

  • 【MHXX攻略資料】村下位 ⋆1-6 KEY 任表 by VJGamer
    村 下位 ⋆1 KEY 任表 任務名稱 狩獵對像 出現條件 備註 古代林の特性ゼンマイ 採集 8 個特産ゼンマ […]…
  • 建造港鐵北環線何去何從? by 朱家健
    這龐大建造成本,日後或會因成本上漲和所衍生利益,或被以環評、原居民利益或其他理由以司法覆核等挑戰,令造價更進一步上調,而且,市民或無從知道那造價和升幅的明細,如果想這些資訊透明化,在獲得資訊時,市民又要具有一個角色和身份。…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
  • 【劣食慎入】Murphy’s Law 與法式焦糖燉蛋 by 圓碌碌
    前幾天,下班經過順道買了幾個回家 。四十五分鐘內趕到家裡,卻發現紙袋濕了,再打開盒子是前所未有、有點慘不忍睹的狀態。頭一遍,看見燉蛋上的焦糖都融化成糖水。這種慘況,我疑惑了。是職員「手勢」的問題還是天氣?那天,氣溫還是冷、潮濕也說不上,為什…
  • 加拿大多元文化 by 游麗絲
      很慶幸自己成長在中西文化滙集的昔日香港。 英文和中文,同樣是官方語言。除了廣東話的電視頻道,也有 […]…
  • 秋風起,姣姣地 by 柚希
    走到外頭,涼風颯颯吹來,令我酒醒了半分。啊啊啊我到底在幹甚麼,我這輩子從來沒這樣的主動過,也太沒矜持了吧。在我正為自己的衝動後悔著,Terence從酒店步出拖著我手。「!」我還沒搞清狀況。「其實我book左今晚呢到房。」「上去啦咁。」老娘豁…
歡迎讚好我們的facebook page,免費資訊源源送上。

文章資訊

ID: 210672
Date: 2020-10-18 07:20:56
Generated at: 2021-01-24 05:10:59
Permalink: https://www.vjmedia.com.hk/articles/2020/10/18/210672/麥味重