如果你有能力搵過另一個家人

政治 / 最新文章綜覽

有兩日,有個讀者send 左個咁既message 畀我:

尋日睇完你本書,入面有啲說話,係我個心度好耐。我唔知同邊個講好,第一次咁樣send message 畀一個作者,講到一舊舊舊,希望你原諒。

睇到2014年後U君同B君同家人關係冇好過嗰段,我都覺得同自己經驗有少少似。

雖然自己唔係日日對住屋企人,冇左日日嘅精神轟炸,但由2014年開始,每次打電話返去,只要講起有關遊行示威,都係以吵架結束通話。就算嘗試說服,到最後佢地都只會話我俾人毒果洗左腦,到最後講多幾次都覺得浪費自己口水而放棄對話。

如果要正正常常傾計,同佢地講下飲飲食食,傾下佢地幾時又再返鄉下佢地就最開心,最滿意。

而2019年開始喺電話嗌交嘅情況就更加嚴重,加上屋企人就係同啲中產藍絲想法一樣,睇埋嘅消息又係咩幫港出聲嗰啲page,來來去去就話「點解抗爭要影響到其他人生活」,「做乜要搞亂香港」之類嘅說話。

講到呢度,我真係完全唔知未來如果真係搬返香港,自己仲有冇可能同佢地住同一屋簷下而又唔日日嗌交,又或者唔會俾佢地搞到抑鬱。

 

 

~~~~~

好多人都會好中意笑d 二世祖。例如,每次睇到一d 八十後買到樓既報道,又或者係點樣九十後拋棄高薪厚職政府工,之後就去追尋夢想,去學沖咖啡去拍youtube 片之類。大家就會好快搵到,究竟佢地呢d 有權追尋夢想既人,究竟中間有幾多人幫過佢地。例如屋企人資助一百萬首期,又或者係邊個家姐阿哥或者朋友男朋友女朋友屋企畀50萬,打本佢做生意之類。

但之後,有一個朋友,就同我講左一個好有趣既故事。

佢係一個博士生,亦都係一個從小到大由名校畢業既前輩。而家,佢已經係一個大學教授,而且,已經係實任架啦。佢有一次,聽到一個好有名既文化人同佢飲野果陣講:「你地d 教授,係咪應該負返多d 責任,類似係社會責任,去導正下世道呢?」

根住,呢個教授就話:「喂,我今時今日做到教授,我都有努力架。唔係個天跌畀我架。我都有無數過夜晚,我唔去打波,唔去溝仔溝女,我都係考試考返黎。我寫phd 果陣差d 寫到抑鬱,有冇人會可憐我?唔會。我最多可以話你知,如果有錢d既話,可以去食d 貴d 既野囉。你窮,你就冇資格抑鬱架啦。」

我聽到之後,我有d shock,因為,呢一番說話,係我第一次聽到一個左派同一個右派(不過又扮左派)既對立面。一d 左派既觀點,成日都會覺得,你如果係個社會入面,係屬於比較有錢,有資源既人,就應該要無條件咁去幫下人。但係係右派既人既觀點入面,就會覺得佢地今時今日擁有呢d 野,你係知道,亦都明白,你係付出過既。係讀書仲可以改變社會階層既時代,有一部份人,真係用左佢地既努力,先至會考到個phd 返黎。就正如,我有一個係牛津讀書既朋友,佢屋企算窮既,所有野都係考獎學金考返黎既一個朋友,佢有一日,深夜果陣,忍唔住同我講左個好長既電話。佢話:「今日,個有錢女,飲醉酒,佢喊住同我講。佢話,我屋企係有錢咋,但我所有野都係靠我自己讀返黎架。我而家屋企有錢,係我有錯咩?」

我聽完之後,我好明白我個friend ,點解會咁唔開心。因為,佢真係好辛苦。

好辛苦先得到而家你擁有既野,你可以讀到呢度,係因為你屋企人畀錢你讀,唔使考獎學金,唔使搵朝唔得晚咁,日日限住自己食費只係係10磅。你考完試,去食餐飯,都係米芝蓮有星既,餐餐都70磅起跳。

我呢? 我考完試,都係食2磅既菜同雞同雞蛋。

講左咁多,我想講咩?

我只可以話,原生家庭,係冇得揀既。我亦都明白,希望別人明白自己,係一個好原始既慾望,好多人都會想有人認同自己。但當你,真係唔小心發現左,有d野,係你既原生家庭,係一定畀唔到你既時候,係咪應該好好咁諗下,有d 人,唔應該強求?

有一套漫畫,最近會改成電影,叫《約定的夢幻島》。當你睇完呢套被視為係最可怕既飲食漫畫之後,你或者會發現,有d野,唔一定可以強求,有d人,應該唔應該特別期待。

所謂既親情,可以好深厚,亦都可以好脆弱,亦唔一定,人人都會擁有同樣既質地既親情。如果,真係冇辦法,唔可以得到原生家庭既認同既時候,或者你可以用你既能力,去搵一個明白你既親人丫?如果你有足夠既能力既話?

 

Become a Patron!

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 210719
Date: 2020-10-20 12:03:21
Generated at: 2020-11-27 16:06:05
Permalink: https://www.vjmedia.com.hk/articles/2020/10/20/210719/如果你有能力搵過另一個家人