【外賣仔日記】估唔到最清楚香港失業問題,係各大外賣平台,準過政府。

 

空姐打功夫

 

疫情下好多人都失業/被放無薪假,從疫情開始無耐,外賣送遞行業申請人數係有明顯嘅上升。而因為限聚令/晚市禁止堂食,餐廳索性唔開減少蝕本,講緊關閉數量係非常龐大。種種響外賣平台數據上見到嘅現象都非常容易反應到唔少嘅社會問題。

各外賣送遞平台嘅全部所提供嘅服務都唔係由平台自己提供,一定要依靠第三方,嘢食要由餐廳提供,送遞嘅人力資源,或者送遞用嘅電單車都要搵個人本身有電單車嘅。外賣平台本身呢個運作模式真係好容易就可以反映到香港某部份嘅經濟狀況,畢竟冇咗咩,系統即時會反映到。當一個行業突然有大量勞動力加入,而一個系統接近可以非常容易同好多餐廳連接,反映緊嘅嘢點都會有參考性。

作為政府收集到嘅數據一定比起一個行業多好多,疫情發生接近10 個月,統計處連失業率都公佈咗話係6.4%,創16年新高,一個政府,應該有一個長遠規劃,但到今日統計處公布失業率你仍然可以唔做任何嘢去解決問題,嚟緊國泰又話要裁員6千人阿,我想問,政府係咪要做到全民失業先安樂?有外賣平台今年8 月曾經去信林鄭月娥,提請政府採取緊急行動,係帶埋數據同你講架,然後呢?到今日公佈嘅失業率係6.4%,某啲行業失業率仲上升到15.2%。政府,想問你做過咩架?

睇番第一二三期嘅抗疫基金,就只有失業綜援放寬一倍,叫做好似幫助到失業人士,但係如果你同屋企人住,個資產限額講緊係已經要計晒你成家阿,即係你屋企兩老已經做咗好多年嘢,退咗休,揸住啲退休金,假設有兄弟姊妹,銀行戶口加埋得17萬6千?獨生子,屋企得三個人嘅,銀行戶口加埋得13萬2千?好啦,到你自己住嘅人,淨係計你自己,你自己住,然後失業?得6萬6響你銀行戶口?究竟有咩人先會個戶口得6萬6,又可以應付到自己住呢?你放寬得個綜援資產上限一倍,話就係為咗應付近來嘅失業人士,但係到最後真正受惠到嘅又有咩人呢?

政府搞咗個保就業計劃,申請嘅限制條款係間公司唔能夠解僱員工,咁我想問,如果本身無呢條條款限制住,失業率會爆升幾多呢?

當香港面對緊工種零散化嘅時候,政府係識得為佢哋嘅mpf 訂立一個行業計劃架喎,然後到疫情去搞抗疫基金,政府竟然係對呢啲人零政策?

03年失業率高峰係8%,但係嗰陣資訊接收嘅成本係高過而家好多㗎,而且無保就業限制住啲僱主唔能夠炒人,而家用手上部電話一 google 係非常容易就會接收到大量資訊,當年可以諉過話個求職者無錢買報紙睇分類廣告,無咩錢落街可以經常去好多唔同地方搵工等等, 但係今時唔同沙士,而家係連以前被標籤人工非常低嘅麥當勞都知,唔能夠再出最低工資請人嘅年頭,加埋保就業限額僱主唔能夠炒人,然後失業率已經去到6.4%?

根據統計處資料顯示,文化及創意產業,旅遊業,響2018年佔總就業人口嘅百分比分別為5.6 % 同 6.6 %,加埋佔總就業人口12.2%,2003年旅遊業佔總就業人口嘅百分比先得個4.4%(2003 年統計處未開始統計文化及創意產業),旅遊業依家主要有唔係來自內循環嘅生意?內循環可以令一個本來係外循環嘅行業長期維持落去?文化及創意產業工種零散化,而家失業率如何?定係抑或,有就得業過?

香港接近響資訊透明度接近非常高嘅情況下,有大規模失業率,香港而家要行內循環明顯唔work,香港好多行業工種零散化,我真係唔敢想像之後會點阿。

 

專題:【外賣仔日記】

 

 

作者:外賣仔

外賣仔

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 210410
Date: 2020-10-21 09:56:17
Generated at: 2020-11-28 04:22:49
Permalink: https://www.vjmedia.com.hk/articles/2020/10/21/210410/【外賣仔日記】估唔到最清楚香港失業問題,係各