盤點那些辦公室痴線規則,網友:「6分鐘一格timesheet 你填過未?」

 

 

雖則各行有各行嘅需求, 但有啲規則真係努力參透極都睇唔透, 究竟係少年我太年輕, 玩唔透辦公室啲規則, 定公司真係有病?

究竟係憨居規則使行業變得憨居,定行業憨居先有呢堆規矩?

最近有網民分享各種公司痴線規則,年輕嘅我睇完都深有同感,實在不片不快。於是整理以下7點莫名奇妙office規則,究竟係我太後生太天真,定大家都頂唔順呢堆規則?

老實講,都無expect過公司會有咩改變,但如果你咁啱睇到呢篇文,咁啱係嗰管理層,咁啱平時用開呢堆憨居規矩,希望你用幾分鐘睇下究竟班員工不滿啲咩啦。

規矩係死的,人係活的。規矩係管理手段,唔係用嚟管死人,令員工無晒活力,而係要適合員工,可以自在而有方向地工作。

 

8號波繼續WFH

呢種模式係疫情帶蛟嚟嘅新改革,少年我都唔知係咪應該讚公司適應力快,咁快就識靈活運用WFH呢種新模式。今日掛8號波,公司精明啦,直接開口鼓勵大家屋企繼續加油。真係WFH開,覺得大家夠熟練,直接開波做嘢咪得。但問題係,疫情前,打8號波唔返工係公道。開始WFH之後,啲公司食髓知味,明明已經正常復工,到放假又繼續用返WFH呢套,你唔上水好似係你失職。不過,公司角度一定覺得咁先符合成本效益,既然大家WFH係順利,何樂而不為。老實講,可唔可以俾啲彈性,唔好追魂call咁,真係好痛苦。天氣差,工作狀態都差,okay?

 

要報備每日每個時段的工作內容

有網友就分享話用上午下午做報備單位已經係小兒科。有啲行業因為要報bil所以要求更加細緻,要用6分鐘(0.1hr)做單位,夠唔夠恐怖?仲要係每半個月填一次紙本表格,有啲公司就會以週計或者月計。月計的話,老實講,隔咁耐其實記唔到咁仔細,但每個禮拜都要填一次又好煩,所以其實點解唔可以轉用app 紀錄,咁咪方便大家?唔會你又質疑我係咪記錯,我又嫌你咁多表要填。最浮誇的公司更加要求員工去廁所都要報備時間,呢啲真係唔知為咩。

 

每星期交交工作報告

網民分享呢類多數常見於中資公司,啲大老闆特別鍾意講經講語錄,開會最鍾意就係傾啲學習心得。而打工仔就要每個星期都交一份報告,講自己做過咩,有咩得著,有咩不足,有咩改善方法,好似小學咁,然後等班主任(老闆)批改同點評。填呢堆嘢真係要用一定時間,寫得太少俾人話無認真寫,寫太長老闆就眼花亂咁搵重點。同埋同考試同理,你寫得唔夠正面,又會俾老闆捉著講經,要調整你心態,抄考啲企業家名言就永遠無死。有時最尷尬係,呢啲功課會係公諸於世,何必呢?

 

電話要鎖入locker

日資公司最多呢類規矩,好強調公事時間唔可以受私事干預。電話無疑係佢哋眼中一大干擾物,員工帶咗佢喺身就會做唔到嘢咁。少年我係覺得呢項要求有啲無謂,你越要鎖我反而越掛住部機,越認住有人搵我有事,越想快啲hea到放飯時候瘋狂玩手機,呢啲就係所謂逆反心理。你俾員工自己袋返部手機,習慣部手機嘅存在,反而唔會好刻意咁想用手機,同埋,其實當住客人面都唔會用得好密。如果生意好慘淡咁就另計啦,不過無生意時候用電話其實會點影響生意?

 

Annual dinner 要新人表演

呢個少年我感覺還好,我估關鍵係嗰表演好唔好玩,同埋班同事放唔放。有啲唔俾員工足夠時間或者資源,純粹要求員工攝下時間,大家當然覺得晒自己時間,排練得相當痛苦。少年我都會好奇點解公司唔爽快拎錢請專業嘅表演,但其實就同有無錢無關,純粹佢哋順便攞嚟當team building,以為大家會havefun,唔只係娛賓。其實呢點無問題,但公司俾多啲資源,hr俾多啲心機規劃下嗰資源點用,嗰表演應該會fun好多,而唔會覺得浪費大家時間。

 

唔可以缺席公司旅行

最近疫情就無呢支歌仔唱,但多數公司隔年都會舉行個旅行,老闆見到一定覺得出錢你仲想要啲咩,我多謝你,但可唔可以搞清楚嗰旅行意義同目的。係,你想團結大家,想留下咩共同美好回憶,咁你知唔知嗰前提係咩,係自願啊。係咪一定要病到死、紅事白事先算合理理由,甚至唔去會受到紀律處分,請問係咪軍營?好心勉強無幸福啊,如果員工就係唔想應酬社交,點解要強逼佢要改變,返工應酬已經夠累了大佬們。

 

各樣衣著要求

衣著要求一直係一個弔詭的存在,衣著的確同形象掛鉤,但一啲衣著要求真係好束縛人性。例如夏天照著白色長袖襯衫,女仔著裙一定要過膝,唔可以著西褲(呢個就有啲涉及性別歧視),唔可以著背心短褲等等。究竟專業形象係咪意味著死板嘅穿搭,係值得大家思考嘅問題。唔係話要翻天覆地嘅改變,但到底要限制到咩地步,係咪長度等所有嘢都要有一個模板規範,少年我覺得有啲太多囉。

 

禁止辦公室戀愛

呢個真係非人道,唔喺職場識人,請問係咪叫全世界上app搵,或者搵讀書時期舊情人重溫舊夢?同埋感情呢啲嘢其實點用規則限制,最多咪變地下情,麻煩大家,對公司只會多怨言。同埋公司可以有咩根據去限制人發展戀情,怕尷尬?都係情人之間嘅事,關公司咩事呢。好啦,俾你捉到有人怕拖,你可以點做?你要批評員工啲咩呢,未成年戀愛?無人明呢條規矩為咩,員工只會覺得公司反智。

(Sor少年我未有對象,所以還好啦)

 

 

作者:員工體驗研究所

員工體驗研究所
討厭工作有十萬個理由.喜歡工作只需一個原因。員工體驗研究所陪你一同研究怎樣開心工作。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 210809
Date: 2020-10-23 09:50:26
Generated at: 2020-11-28 03:20:02
Permalink: https://www.vjmedia.com.hk/articles/2020/10/23/210809/盤點那些辦公室痴線規則,網友:「6分鐘一格timesheet-你