為一夜情後嘅女人煮一個早餐

佢有一個好特別嘅習慣：每當喺酒吧搵到個情投意合，願意同佢返屋企一夜激情嘅女人，第二朝佢都會早過個女人起身，煮返個早餐一齊食。

朝早八點未到，喺港島區一個大概五百呎嘅單位入面，佢半裸上身，喺開放式廚房煮緊早餐。雖然見唔到八嚿腹肌，但一睇就知係有做開運動，條腰冇半點贅肉。屈指一算，今次已經係佢第四十七個喺一夜情之後煮嘅早餐。難怪嘅，身材吸引再配埋佢輪廓分明嘅五官，只要佢願意，一夜情嘅機會絕對唔係遙不可及。

放喺平底煎鍋烘到兩面金黃嘅方包，其中一面仲掃上誘人嘅牛油溶液。上面鋪咗兩條煎到微微捲曲，仍然保留住肉汁嘅煙肉，再加上仍然係半流心嘅太陽蛋同兩塊現成煙三文魚伴碟，無論係擺盤定味道，個早餐絕對有酒店級嘅水準。可能係比早餐嘅香氣吸引，佢聽到睡房傳出拖鞋喺地下磨擦嘅聲音，然後一個戴住黑色蕾絲胸圍，下身襯住同一款式內褲嘅長髮女人行咗出嚟。上圍會因為行路而出現輕微嘅上下搖晃，唔知係咪個胸圍嘅承托力唔夠呢？

「早晨」佢先打招呼。
「早晨」女人望住檯上面嘅早餐，再望一望佢，露出一絲驚喜神色。

煮早餐之前佢已經簡單梳洗，整理好髮型。佢覺得任何時候都應該令人留返一個好印象，依個係一種尊重同禮貌。所以到底女人嘅驚喜係在於個男人仍然咁企理，定係一夜情之後居然有埋早餐食？我諗只有個女人先答到你。

兩個人面對面坐好，拎起刀叉享用早餐。雖然佢地只係認識咗一晚，準確啲講係兩杯紅酒加三杯Cocktail嘅時間，但佢仍然可以製造到女人有興趣嘅話題，令依個早餐一啲都唔會出現冷場或者尷尬嘅情況。十五分鐘之後，兩個碟上嘅食物已經一乾二淨，而女人之後亦返返睡房，著好衫之後離開依個一晚歡愉之地。喺臨走之前，女人向佢講低自己嘅電話號碼，話搵晚得閒大家再一齊出嚟飲嘢。

佢答咗聲「再約你吖」，微笑目送女人離開，然後返去執拾檯上嘅早餐碟。留低電話嘅女人唔止依一個，佢亦真係再約留電話嘅女人出嚟飲嘢嘅，甚至同其中兩位分別保持咗一段肉體上互相滿足嘅時間(俗稱SP)。不過每次早餐過後佢仍然有一種失落，或者佢會煮早餐唔係純粹紳士風度或者細心，而係想有一個女人，每日都會喺佢張床起身，然後佢每一日都會為同一個女人準備一餐精緻嘅早餐。

佢曾經有三段戀情，一段對方以「大家唔夾」而告終，依次都唔係令佢最心痛嘅理由。一段對方只係想喺肉體上追求刺激，所以拍拖唔夠半年就密密出軌、一段聲稱飲多兩杯，同時同兩個朋友發生關係。三次過後，佢對感情變得好小心，務求搵到一個唔會受傷害嘅方法，而一夜情就係佢搵到嘅答案。朝早為唔同女人煮嘅早餐，就係佢喺一夜情當中尋求少少拍拖當中甜蜜感覺嘅動作。

又可能佢希望有一個女人喺食完佢嘅早餐之後，會有覺得佢係一個唔錯嘅男朋友，願意開始了解大家？

就喺佢洗緊碗嘅時候，佢電話一震，一個冇咩印象嘅電話Send咗個WhatsApp過嚟。

「今晚得唔得閒，不如出嚟飲酒？」

佢望一望個Icon，原來係上個月喺尖沙咀一間酒吧識嘅女人。就喺第二朝佢整咗個燒雞沙律配雜果乳酪早餐之後，女人同佢交換電話，講咗句「Keep in touch」。諗咗一陣，佢拎起電話，覆咗句「Why not」。

「會唔會係佢呢？」佢心入面閃過依個問題。不過好快佢就繼續埋頭洗碗，同時諗緊聽朝個早餐應該煮咩好。

作者：毛言地

你有多久沒去找自己的理想？搏殺一天，回到家，倒頭就睡。 無言，只因生存太累。談理想？妄想； 毛言仍言，只因理想，本就是「理應去想」 http://www.facebook.com/MaoYanDe

閱讀後覺得好，請多多讚好及分享～：）