返工做野唔攰,應付公司啲老海鮮先喺最費神!尤其是佢地扭盡六壬卸啲工作俾你!

 

話說我做緊間公司入面有超過8成都係老海鮮(講緊做左幾十年以上),當中不乏好識得點人做野既人,佢地既面皮真係相當之厚。同埋公司裡面同事之間年齡差距好大,真係講一句說話都要諗過度過,點樣同佢地鬥智鬥勇!其實呢啲情況我諗好多人都有講過,但係作為唔計較或者唔識拒絕既人,其實真係會陷入陷阱,好難出返返嚟!以下就係有幾種最常見情況。

 

溫水煮蛙法:

我知道去到一間公司要同融入要打好關係係要同人傾計,介紹自己等人地認識下你啦。初時佢地嚟問我野其實我都答,例如人地問我學歷呀工作喺做啲咩呀(其實後來先知好奇怪,佢地喺度做左幾十年都唔清楚公司運作?講緊公司每個人既職位,做啲咩其實應該心中有數),但係都要問長問短,後來諗下原來佢地喺比較工作量,又或者八卦你日常做啲咩野(詳細步驟),睇下佢有咩可以卸俾你做!尤其係見到你有類似既工作步驟。

如是者,逐漸佢地就會逐啲逐啲將佢地手頭上啲手辦眼見功夫既野叫你幫佢地做。呢啲野我初時就覺得可以幫下,好快搞掂(因為真係唔難,郁下手就搞掂),但係其實唔可以!當繁忙時間段佢地搵你幫佢地做呢啲瑣碎事(叫得你嚟其實佢地都已經做左,但係就係要你幫佢做),又或者當公司好多人都開始卸俾你,而你時間又得咁多,就會忙到癡線!但係佢地就可以un un腳唔洗做,好空閒!你就做到嘔血!仲可能因為要兼顧佢地掉俾你做既野影響到你自己工作表現!

 

推卸責任法:

同埋我觀察到有種卸膊技巧,喺真係喺佢地啲老油條度學返嚟!講緊同一個post,但喺彼此有分工咁。當佢地做左一樣野,而俾人話可以做得更加好或者佢地俾人挑剔佢地啲野(可能只喺用字方面),佢地會行埋嚟大大聲同我講:

「喂!XXX,其實呢度下次應該咁樣做,咁樣寫,會好啲架!」然後開始訓話:「我地做野應該要諗多一步!要諗下點樣可以令個presentation好啲……blablabla」

但係其實!啊姐!呢樣野都唔喺我做既!你俾人話完同我講做乜!我又唔會犯你既錯誤,但佢地咁樣做就俾人感覺好似成份野喺我做而又做得唔完美咁,然後下次就順理成章將份野隊埋俾我變左做我既工作量,仲要美若其名話喺幫緊你學多啲野!袋錢入你袋!如果真係啲值得學既野就話姐,問題係你將啲瑣事雜務推俾我做,你唔得閒我可以幫,但係從此以後變左我要負責埋你做既呢啲雜務!咁你份糧唔出埋俾我?

仲要大大聲當住其他同事面前話教我呢份嘢應該點做,俾住說話我聽仲要我幫佢地啃埋佢地啲蘇州屎豬頭骨,搞到唔知情既同事覺得喺我做得唔好,其實根本成份野都唔喺我負責既!為左自己做少啲錯少啲,真係諗盡辦法將啲工作卸俾你!好彩我做呢同一個post一年半左右,就升職調左跟另一個head,終於擺脫左唔洗喺個pool度俾人點嚟點去!

 

洗腦法/疲勞轟炸法:

我諗辦公室洗腦真係老油條常用既方法,佢地好多時候都講多過做野。而講完一大輪似是而非既野,其實目的只有一個,就係要你幫佢做野,仲要心甘情願帶住感恩既心情!

有時候佢會捉住你up一大輪,少則半個鐘,多則一個鐘。因為我係好討厭人煩既人,最後就係頂佢唔順,妥協幫佢做野,其實只喺想快快脆完左個話題同埋唔想聽佢地講野(只限於我識做個啲)!因為真係好煩!

如果佢地好聲好氣地叫你幫佢做野,咁我得閒的話,我都會幫下既。但係你又要人地幫你做野,又要比說話人聽話人地,諸如:

「出嚟做野呀,要努力啲,要抵得諗……如果你唔喺好多野做既話,其實可以幫下人既,同埋你自己都會學到野,咁學到既野喺你自己架嘛,識多啲野無壞既,出得嚟做野做曬自己野都要之餘都要主動學多啲野blablabla……」
真係好似美容院啲疲勞轟炸咁。

所以話,出糧其實唔係出緊啲工作酬勞,係出緊啲精神損失費呀!真係好啱。

 

作者:西鯊子

西鯊子
一隻平平凡凡既鼠。奴

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 211132
Date: 2020-10-30 09:51:18
Generated at: 2022-07-06 09:56:46
Permalink: https://www.vjmedia.com.hk/articles/2020/10/30/211132/返工做野唔攰,應付公司啲老海鮮先喺最費神!尤