好想擺脫停滯不前嘅生活

 

「你終於肯轉工嗱?咁之後咪無得見你個同事囉。」朋友呀花說。
「唔見咪唔見,佢都唔鍾意我㗎啦。」我說。
「你又知?可能因為係同事所以驚尷尬啫。」呀花說。
「有啲嘢Feel到嘅,咁耐都無表示,我走咗應該都唔會再聯絡㗎喇,唔想再嘥時間喺度。」我說。

喺而家呢間公司做咗兩年幾,對上對下都無人,基本上都係自由發揮,一係就腦細話做乜就做乜,有時明知唔work唔make sense都要照做,最初入嚟當然有團火,成日比idea,但每次都係被ban,一係就聽都唔聽,睇都唔睇,所以而家已經變咗yes man,或者只係一個不停做嘢嘅機械人。唔係話完全學唔到嘢,但真係唔多,加上之前又減人工又放無薪假,真係已經無心機再做落去。

感情方面一樣係膠著狀態,雖然有鍾意嘅人,但係一嚟自己淆底,二嚟對方又無乜反應,完全唔知佢諗乜,其實都打定輸數,成日浮浮沉沉咁,心情大上大落,完全唔似一貫嘅自己,明明以前不嬲都好開心,即使係單身果陣。既然呢度工作同感情都無好結果,不如去另一個地方重新開始,離開呢個comfort  zone,雖然轉工可能只係跳入第二個地獄,但係呢一刻嘅我好需要一啲改變、衝擊。

除咗不停send cv之外,我仲參加咗啲group,即係好多活動玩果啲,咩BBQ呀露營呀,但係我仲未去嘅,始終疫情未完,唔好咁大班人聚埋好啲,就算去都會揀少人啲嘅活動,之後去咗再同大家報告。其實本身我係覺得而家嘅朋友已經好足夠,仲邊有時間同心力去識新人,但係而家諗法又唔同咗,可能想要啲新鮮感啦,女人真係五時花六時變,分分鐘仲變得快過腦細。

我唔知離開呢度係啱定係錯,我只係唔想再渾渾噩噩咁過我嘅人生。得閒睇多啲書,學多啲嘢,做多啲運動,均衡飲食,早睡早起,花多啲心機喺自己身上其實更值得。對自己好啲,真係講就易,做就難,盡力啦,如果自己都唔愛自己,仲有邊個會愛你?

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 211195
Date: 2020-11-03 06:53:40
Generated at: 2021-05-14 18:27:38
Permalink: https://www.vjmedia.com.hk/articles/2020/11/03/211195/好想擺脫停滯不前嘅生活