特朗普輸咗，起碼暫時以票數嚟講依個係事實。

（圖：朝日）

到底特朗普仲有冇底牌、到底拜登會唔會突然被爆出咩醜聞甚至係造假而失去總統資格、到底下年嘅美國會迎嚟咩變化，中國又會唔會乘機返生，我一概唔知。

我心底都好想特朗普贏。先唔講佢連任會唔會繼續為香港嘅抗爭帶嚟正面影響，起碼每個人都知道佢唔鍾意中國，亦唔會為利益而任由中國亂嚟。但如果香港人想特朗普贏係覺得佢會利用美國嘅力量去「Free Hong Kong」，咁你又可以放心：無論邊個做美國總統，佢都唔會為咗香港而直接同中國開戰。正如香港唔會因為冇大陸人嚟買嘢而完蛋，美國冇咗香港一樣唔會覺得痛。

特朗普要贏總統係靠自己，而佢都用緊一切嘅方法去做；香港人要達成目的，一樣要靠自己，唔好妄想坐喺度有人打救，食住花生就贏咗場仗。

就算特朗普連任，就算佢日日同全世界提住香港幾慘幾慘，香港都唔會迎嚟任何改變。你話因為武肺因為限聚所以唔敢出嚟？算啦，泰國冇武肺咩？政府冇打壓示威咩？人地啱啱先又企完出嚟。如果抗爭係代表喺政權容許嘅情況下進行，麻煩搵一搵嗰本字典比我睇睇，我諗我要惡補返中文。

民主本來就係一個地方容得下一百種意見，而家喺黃絲心入面就變咗「我就是民主」。如果你同我意見不合，就係藍、就係鬼、我要用不分化去分化你個分化。黃店做錯嘢唔鬧得，黃絲入黃店做就應該有免死金牌，搞搞吓仲惡過大陸新移民。甜品鋪喺隻碟用醬畫周同學個樣叫你唔好忘記，買嘢用12義士做12%折扣Code。望到依啲我唔可以出聲仲要拍手大叫你做得好？用同一把尺的話陳彥霖老母都唔係咁過份吖。

要人幫你，首先做好自己。當自己要做嘅抗爭都搞唔好，仲有咩面目玩國際戰線？美軍來了我帶路？到時警察一句叫你上返行人路，你咪又係乖乖上返去等比人拉。

作者：毛言地

你有多久沒去找自己的理想？搏殺一天，回到家，倒頭就睡。 無言，只因生存太累。談理想？妄想； 毛言仍言，只因理想，本就是「理應去想」 http://www.facebook.com/MaoYanDe

閱讀後覺得好，請多多讚好及分享～：）