【經常外出用膳注意】如果而家咁嘅防疫生活都會感染流感，即係有武肺你都會中

防疫生活真係令人好沮喪，戴住個口罩行街睇戲，除左on9 之外我都俾唔到咩評語，然後我地又會不甘寂寞keep 住on9，人類真係好複雜。

anyway，武漢肺炎未有疫苗又未有特效藥，後遺症又未確認，有傳話部份康復人士失去味覺臭覺，諗起都癲。

適逢政府又停課又盛咁谷衡宣傳個流感高峰期，乘機講下呢方面。

唔知大家有無類似感覺，就係自從農曆新年武漢肺炎爆發，香港人自發戴口罩度日之後，連普通傷風，以致流行性感冒，都少左好多。

俾少少一般定義大家先，普通傷風講緊流下鼻水，喉嚨痕咳幾聲，唔發燒，一個禮拜左右就無乜嘢；而流行性感冒，就通常一開波就周身骨痛，然後發燒，然後先喉嚨痛鼻水出，都係一個禮拜左右無嘢。

無論係傷風定感冒，呢類上呼吸道感染，其實傳染方式同武漢肺炎如出一徹，都係靠病毒經由口水鼻涕接觸口腔鼻腔，由病人傳俾其他人，至於點樣搞到口水鼻涕掂到，就可以係飛沫，或者掂完人地啲口水鼻涕再掂自己口鼻。

既然個傳染途徑差唔多，即係話，如果呢段流感高峰期，或者呢一年以來，你都試過感染呢類上呼吸道疾病，其實表明左你嘅所謂防疫生活有漏洞，喺你嘅防疫生活之中仍然有機會接觸人地嘅口水鼻涕，一旦武漢肺炎社區爆發，而呢啲漏洞無堵塞，你都好容易中招。

有啲咩主要漏洞？所有有機會同其他人唔戴口罩近距離接觸嘅，其實都可能係。

例如

返office 就賓至如歸咁除口罩

除非你同同事諗住做生死之交，否則你唔應該假設對方無病。

未清潔雙手就觸摸口鼻

同有無用紙巾隔住先摸係無關係，你張紙巾如果隔到病毒，可以拿諾貝爾獎。個關鍵係摸口鼻之前有無清潔雙手。

外出食飯，去需要搭檯嘅食肆

講一個都幾慘嘅事實俾大家知，一齊食飯，用唔用公筷其實毫無意思，除非你地喺呢餐飯唔講野。首先食飯一定除口罩，講野一定噴口水，呢個唔一定係你見到對面嗰個講得興奮成pat 口水噴出來嗰種，而係就算見唔到，都可能有啲微細嘅飛沫周圍噴，所以呢一年內一齊食飯嘅朋友，用唔用公筷都好，毫無疑問都係生死之交。

但你有無興趣同一個唔識嘅人做生死之交？我見到好多。就係搭檯食飯。

兩個獨自食，唔講野對住食都算，但最恐怖係，兩對，兩個識嘅，對面就係兩個唔識嘅，各自傾計，你以為唔係對住對面噴？你都傻嘅，你連自己打唔打噴嚏都控制唔到，你同我講你想控制啲口水鼻涕點飛？

搭檯食飯，百分之一千係防疫漏洞，漏洞過嫖妓。我認真架，妓女妓男佢一日接幾多客都有限數，但係食肆搭檯就可以幾何級，唔好忘記一日三餐唔同對手，就算嫖客好腰好腎都嫖唔到咁多。

（PS 反人類咁講：嫖妓之後又唔想俾人知，唔該去下啲要搭檯嘅食肆，咁你就算中招，都有個口實喇，笑喊emoji X 100～）

作者：白木乩

聽聞係總編分身，專用來出D 與總編身份不符既膠文

閱讀後覺得好，請多多讚好及分享～：）