自己矮毒肥,有咩資格周圍鬧人整容。

小城小事 / 最新文章綜覽

 

 

有個台灣妹子因為單身好耐朋友想幫忙一下做媒人,男方睇完佢嘅相問佢係唔係好肥好大份,事實上男方係個矮仔。有次我同男性友人講某女model靚到女人都羨慕,但對方講佢整容同打好打針先有今日咁嘅樣,仲有話佢做雞乜乜柒柒,我係講佢依家好靚好唔好?佢做乜同佢依家外表唔關事㗎。係《全民造星三》嘅一啲參選藝人相到有好多comments鬧人整容,又鬧人唔靚,但我睇落好多都就算有整都好自然而且都靚吖~仲有更多係網上評擊、明嘲暗諷咁話人地個樣。

我理解個個嘅審美觀唔同嘅,但真係有必要咁苛刻咩?首先你自己本身真係好好?最基本你係好過對方先啦。係我細個嘅時候真係好唔掂眉粗細眼成個豬頭咁,童年個樣唔可愛仲要高大無乜人當我細路咁看待更加唔多人當我細路咁錫啦~去到中學唔識打扮,雙眼無神,不過生得高啲人話高人會被人先望個樣,所以整個少年都被評擊到無自信無乜笑容,係街好驚俾人望,行路係望地下唔敢望人,唔敢同陌生人正面溝通,鍾意一個男仔對方唔係靚仔但都覺得對方一定唔會睇得上自己,總之因為無自信而造成自己做乜都膽怯,仲覺得世界對自己唔公平係應該,俾人踩就算唔開心都唔會反擊,望返啲相咪普通少女一個又未去到樣衰到要咁自卑。離開中學開始學打扮,然後出到IVE讀書識到更多唔同嘅人,開始知道生得高嘅自己原來有對長腿係優點(但經常打波仆街好多傷痕),又因為開始識打扮個人自信返嚟個人都成日笑,然後會有男仔主動ICQ(好多小朋友應該唔識,你就當係WHATSAPP啦)讚我著短裙好睇,更加有男同學表白。自信返嚟自然有一個吸引度,而且敢於溝通會攞返好多應有嘅公道。嗱,講明先,我真係唔係咩靚女,自己身邊都有靚女朋友所以我對靚女都有一個準則,只係想講係我嘅經歷中感受過好多人性嘅不公。其實人地靚唔靚關你撚事咩!人地靚你對佢好,你會行大運中六合彩㗎?

絕對支持人係應該貪靚㗎,咁人性係仆街,靚人真係會得到好多優待吖嘛~係我十多年前抑鬱最嚴重時期樣又殘又爛面,去食店叫嘢食時個男人叫我「阿姐」仲好似唔想招呼我咁,但係我康復期皮膚好咗又精神咗,同一間店同一個男人叫我「阿妹」神情仲好似好期待我叫嘢食咁。see~人性真係好仆街㗎。我唔係話支持人地去整容、打針之類,但絕對尊重佢地。喂!真係要好大勇氣同長年累月咁去做㗎~首先要洗一筆錢,然後要受皮肉之苦,而且係要keep住整,唔係話整一次就一世,人嘅面骨隨歲月會有變動,仲有啲唔知乜菌乜酸會慢慢退去或被人體吸收咗,所以啲人咪容易整上癮,慣咗面尖無紋就返唔到轉頭,變咗心病。廿五歲前我仲係單眼皮之後無啦啦走出嚟,幸好我無去割如果唔係依家可能對眼好怪,花錢做facial都唔肯又點會肯去整容吖。不過好多原因令到好多人選擇為靚而去整容哩條不歸路,嗰啲付出係值得尊重㗎喎。好多藝人選擇去整,咁佢地真係要靠樣搵食㗎嘛,整得靚咪得囉,做乜要搵返人地未整前嚟對比然後笑人啫。仲有呀,做咩要笑人身形,你係咪又fit又比例好好先?你有無望清你自己個樣同身形?你有無攞自己個樣同身形同啲model去比?批評人咩都好,首先你自省一下先好嘛?而且點解做人要咁苛刻,善良一啲唔得咩?人地個樣點都好,因為你地無須承擔嘅言論而受到傷害,如果樣子會因為個心而改變嗰啲亂批評人嘅都係怪物咁嘅樣。做人自我審視一下修養先啦~

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 211406
Date: 2020-11-15 10:33:02
Generated at: 2020-11-27 13:14:18
Permalink: https://www.vjmedia.com.hk/articles/2020/11/15/211406/自己矮毒肥,有咩資格周圍鬧人整容。