太驚真係唔好出街食,外賣啦

 

話說今日我毒毒一個人去食黃店,星期六嘅中午十二點,成間鋪加埋我都係得三枱客,仲要兩枱係毒毒,即係總共得四個客,然後我就好矛盾,一邊好擔心呢間小店會唔會做唔住,因為呢度租金應該都幾貴,但係同時我又覺得好正,因為一個人都可以舒舒服服,靜靜哋咁食好西,唔使遭受其他人嘅奇異目光,覺得我霸住咗啲位,後嚟越來越多人嚟,有對母女就直接坐咗喺我張枱度。

媽:「你食咩呀?」
女:「你揀先啦,你揀完再比我睇。」
媽:「我食A(餃子)+B(主食),你食A+B+C咪得,C有小食。」
女:「你揀完比我自己睇啦。」
媽:「你食咩?叫得未?快啲啦!」
女:「我都叫粟米豬肉餃。」
媽:「做咩同我叫埋同一樣,你叫第二樣啦!小食揀咩?」
女:「咁…芫茜豬肉餃同關東煮。」
媽:「吓?點會揀關東煮,揀過第二樣啦!快啲啦,一陣一點鐘好多人㗎,唔該落單吖!要個A+B,點呀你要咩?」
侍應:「可以自己填落紙,嗰度有筆。」

然後我好心指一指支筆(無掂到),即刻嚇到佢兩母女彈起,兩個一齊係咁話:「唔使!唔使!我哋自己有!」其實我淨係坐喺隔離聽住佢哋嘅對話都覺得好攰,好地地放假想食個lunch都要咁急,趕住去投胎咩。

媽:「我平時咪就係成日喺呢度外賣返嚟食囉。」
女:「咁點解今日唔外賣呀?」
媽:「外賣邊有位食呀!唔通返到去先食呀?返到去都成粒鐘啦!同埋啲餃子會腍晒!」

個細路女一秒就辣著咗佢呀媽,就係因為問佢點解唔外賣,然後個細路女就無再出過聲,同時我亦睇得出佢真係好唔想搭枱,因為佢周身唔自在咁,不斷望啲枱幾時有人走,佢呀媽亦一直講話有人走就轉枱,我唔知個細路女係純粹怕同生保人搭枱定係驚我有武肺,其實姐姐個樣都唔係咁得人驚啫。

好死唔死我因為碗嘢太辣,竟然喺呢個時候食到流鼻水,然後個呀媽啤住我,我明白疫情令大家警覺性提高,但係我都唔想,你咁啤住我都無用,仲搞到我食得好唔自在,我知佢哋一路都好想轉枱,又或者好想我走,但係我真係未食完嘛大佬,然後好快佢哋就嗌轉枱,臨轉之前個女仲同呀媽講咗句:「下次都係外賣啦。」等佢哋轉好晒枱我都食完埋單走人,其實如果真係咁驚,不如外賣啦,廢事影響自己又影響人。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 211411
Date: 2020-11-15 10:46:05
Generated at: 2020-11-28 04:17:10
Permalink: https://www.vjmedia.com.hk/articles/2020/11/15/211411/太驚真係唔好出街食,外賣啦