【現代巫師點滴】靈性工作者中的「靈膠」

文教 / 最新文章綜覽

 

好耐無出文啦!真係比讀者追文追到瘦,好啦,今日白白又搵啲靈界花生寫下。

話說BNO Visa公佈之後,白白身邊唔少人都已經起程過英國,而白白呢啲死窮鬼未走得住,就當然每個星期都係無限Farewell飯局啦。而白白啲靈性朋友亦都一樣,除左將屋企啲史前收藏全部拎哂出黎派之外,最好笑嘅就真係莫過於同朋友嘅一輪妙問妙答…

「嘩,你就咁跟埋男朋友過去,諗好做咩工架啦?」

「未阿… 不過佢媽咪話,咁啱個鎮仔有一間靈性書店想搵人頂手…」

「咁正!咁你頂左佢啦!」白白雙眼發亮!

「佢話喎,I cannot deal with these new age people all day long.(譯:日日對住班靈膠我真係頂唔順喎。)」

聽到呢到,我地幾個朋友都一齊爆笑…

靈性呢個圈子充滿光光愛愛,療癒身心靈,實際上就充滿住各式各樣嘅左膠,而我地圍內亦稱身心靈界左膠爲「靈膠」。點解真正嘅靈性工作者痛恨「靈膠」,就等同於點解市民痛恨楊岳橋,點解泛民被DQ會咁多人喺Facebook比哈哈一樣,一粒老鼠屎真係整壞一鍋粥。

白白應該唔洗太多解釋,大家都明白啲靈膠係點。隨便舉啲例子,就例如真係有人信搵個靈擺轉幾圈,就可以清理三十幾萬世嘅前世孽障,又或者個個都話自己前世係亞特蘭提斯祭司,又或者身邊總係有個人你講乜佢都話幫你做治療乜乜乜咁。最近聽到最好笑嘅靈膠宇宙訊息就係,有班膠周圍同人檢查有無「宇宙蟲」,白白初初聽啲朋友傾計講起,都聽到一舊雲,乜撚野「宇宙蟲」阿?

(聲稱)原來「宇宙蟲」係啲靈性層面嘅蟲,肉眼不可見,但影響甚廣,仲講到唔杜蟲會人個死咁上下,之後就推出左一大堆嘅身心靈杜蟲療程同產品,一大班靈膠仲信到十足十,真係笑到白白仆街!白白呢啲八十後,當年最常聽到嘅騙局「千年蟲」杜蟲藥,估唔到2020年嘅今日又重臨人間,真係一百歲唔死都有新聞阿。

對於白白同班朋友黎講,喺個靈性圈子轉轉轉左咁多年,真係乜野人都見過,見到個圈子日益腐敗,其實都會好心酸。始終「迷信」係一門生意,好多人都想分呢舊肥豬肉,由上世代寺廟賣下啲低成本垃圾串珠,去到性交轉運,行業裡面工作者嘅水平亦都越黎越參次。

白白覺得現在最流行嘅四大靈性金礦,包括1) 各式靈氣、2) 亞卡西紀錄、3) 頌鉢、4) 水晶,產生嘅平均收入應該係最多。

有人可能會問「下?咁占卜塔羅呢?」,大家可以上Instagram打個 #塔羅 去睇下,就會發現個市場其實已經玩爛左,個個小妹妹都開間IG Shop做塔羅占卜,幾十蚊就陪你傾心事,搞到件事好廉價。而接住落黎會玩爛嘅,相信就係「亞卡西紀錄」。

白白大概解釋下比讀者知亞卡西係咩啦~其實亞卡西紀錄Akashic record就好似中華文化所謂嘅「三世書」,相傳喺33次元有個所謂亞卡西紀錄守護者,而某啲工作者就將呢樣野包裝成爲一個課程,學習與守護者連結溝通,就可以取得各種資訊。

亞卡西紀錄嘅原意就係咁。之但係,問題係出喺邊呢?最大嘅問題就係「濫」。

對老師而言,學生學唔學得識,其實好難判斷,就算大中小學入面,讀到畢業都唔代表你識左書本上任何嘅野架啦,更何況係靈力呢啲咁虛無嘅野?

有一啲無操守嘅老師,爲左推廣課程(i.e.賺錢),上兩日嘅工作坊就會派證書。爲左要正氣正念,對學生要鼓勵有加,仲要補多句「You are special! You are gifted!」,而靈膠們真係信以爲真,覺得自己好特別,天降大任於斯人,上兩日堂重新開啓前世記憶,一秒就變先知。

真係好痴線呢?仲未夠阿,一大堆呢啲痴線人,上兩日堂,第三日已經自己開課教其他人啦,仲喺IG開店開到成行成市。

前幾日有位年長老朋友又講起#亞卡西紀錄…

「個後生仔同我講呢,佢想學亞卡西紀錄,我聽到一舊雲阿。」

「點解阿?咪即係 Channeling(通靈)囉,佢地好似話特定連接個咩守護者咋嘛。」白白嘗試解釋…

「係羅,我心諗,下?以前我地學下學下,自動波乜都連接到架啦,同精靈又連接,同天使又係咁連接,唔洗叫架喎!乜原來而家要專登學#亞卡西架咩?」

「哈哈哈…你都幾心水清。」

其實比較正統嘅修行,都係講緊提升整個人嘅感應能力,基礎打好左,任何嘅靈性能力都係一脈相成。

睇到呢到,可能你就會challenge白白,「下?你又知其他人唔得?你又好好咩?#錦鋰又做過咩阿?」

唔信白白嘅話,大家可以自己上Instagram打個#亞卡西,可以睇下佢地啲「好評截圖」,或者比十元八塊自己體驗下。

其實做得呢行耐,就會知道啲熟客,一坐低係會「試鐘」先,例如乜聲都唔出,直接問有咩就講啦,或者問一啲只有自己先知到嘅事,睇下個工作者嘅能力係咪真。呢個已經不知不覺間成爲行規咁濟。

朋友分享比我睇幾張所謂 #亞卡西 嘅IG服務截圖,個工作者打左差唔多兩千字,但講嘅野全部廢話黎(係,全部!)。點廢法?即係作爲一個朋友,你都識同個Friend講或者安慰說話個類啦,資訊性完全係零。小姐,你知唔知 #亞卡西 係做緊「通靈」,唔係做社工阿?啲Spirit講野好直接了當,一野就比哂指令要做咩架啦,兩千字你連接緊自己個大腦咋~

每年白白老細生日嘅時候,都會搞個簡單生日派對,即使平時好少黎鋪頭嘅靈性界老朋友,都會比面上黎飲杯茶傾下計,而好多都係類似白白,天生有啲特異功能,低調又唔鍾意出名,甚至根本唔會接生意,但個個都通靈王咁嘅款。

因爲呢啲社交場面,總係有啲靈膠係好鍾意殺上黎,一種係想表現自己兜生意,一種就係想傾計過程中R免費占卜。仲記得有一年,低調嘅白白著住Uniqxx動漫Tee同牛仔褲,同一位報稱做OL嘅外藉肥姐姐傾緊計,當然我地成班「通靈王」,唔洗講大家都知咩事,互相講見到大家背後守護神係點嘅樣。有條靈膠上到黎,話自己係咩咩魔法師,又話自己靈力點勁點勁,其實就乜能力都無,佢見到靚靚外國姐姐,就走埋黎話幫佢同守護靈溝通,仲作哂狀好似問米咁…

我同姐姐同時望住背後嘅守護靈,做左個Meme圖攤手pose,成件事真係好尷尬…

當然,市場上都不乏一啲真正有心嘅工作者啦,不過以白白觀察,有料嘅十個有十個都好低調…而白白都一樣 “cannot deal with these new age people all day long.”

今次講住咁多先啦~拜拜!

 

【現代巫師點滴】

妄想用「科學」解釋「靈性」,最終只會令你. . .

訓訓下,我隔離多左個人!全身白色衫,條利勁長!

風水佬亂set 嘢,古靈精怪圍住間屋開Party,可以點解決?

幫少女驅白蛇,佢唔多謝不特止,仲. . . . . .

遊魂野鬼入左人型公仔,趕走佢仲難過cut 有線!

我地呢行都有西客?叫我去驅鬼通常都西. . . . . .

 

 

作者:小白

擁有超凡視力的人,低調解說平行空間。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 211606
Date: 2020-11-21 07:47:22
Generated at: 2020-11-27 18:32:18
Permalink: https://www.vjmedia.com.hk/articles/2020/11/21/211606/【現代巫師點滴】靈性工作者中的「靈膠」