我唔想打死一世工!

 

久唔久都會聽到朋友講佢哋嘅創業夢,無論係9up,定係認真想做都好,至少佢哋都會好明確講到自己想做咩,例如係開cafe、搞ig shop賣衫、DIY手作網店、開studio等等,佢哋都有個共同諗法,就係:「我唔想打死一世工!」可能我以前真係奴性太重,我會覺得打工幾好吖,起碼放咗工就乜都唔使諗,每個月有穩定收入,但係做老闆唔同喎,無得放假,一腳踢,花嘅心力一定畀做打工仔多好多,仲要未必有回報,分分鐘蝕到呀媽都唔認得。

但係最近我竟然改變咗呢個諗法,話說我同朋友食飯,講起身邊其實都有唔少人同我呻話識唔到人,無論男女都係,我都承認自從出咗嚟做嘢之後,真係無乜機會識新朋友,每日就係返工放工,就算fd搭fd識嘅都唔多,交友app都係約炮多,speed dating大家都好抗拒,啲氣氛又好尷尬,唔係個個都頂得順,傾傾吓我就突然叮一聲:「咦,呢樣可能係我想做嘅嘢喎!」

如果有個平台可以比大家互相認識,由朋友做起,一齊去玩,例如行山、食好西,或者係有啲workshop畀大家一齊學嘢,增值自己,咁都唔錯喎!唔一定係以搵另一半為目標,男女比例唔使特登調配,甚至我可以搞個全女班美食團,因為有女性朋友表示佢真係純粹想食好西同講八婆嘢,唔係想溝仔或者畀仔溝。雖然我份人唔係主動到開籠雀咁,但係其實我都鍾意吹水同帶大家去食好西,而且唔會全部活動都係我自己帶隊,行山當然要搵啲山系之子幫手啦。

「唓,你想公器私用溝仔咋嘛!」朋友呀花說。
「妖講呢啲,係幫大家解決識唔到朋友嘅問題。」我說。
「Speeding啲公司都係咁,搞手s預早screen過晒啲人,有好嘢就留畀自己。」呀花說。
「喂呀,認真㗎!我已經睇緊啲創業基金同資訊,計P&L同plan緊唔同嘢,仲想搞partyroom。」
「好啦笑吓你啫,放心啦你真係搞我實支持。」呀花說。
「多謝,不過而家疫情又爆都好大影響,我都係做住research先。」我說。

如果有錢,創業係可以好易,因為好多嘢都可以用錢解決,但對於一個普通打工仔,真係唔可以亂嚟,要計吓點先可以做到收支平衡,點樣做推廣、招人,仲有好多因素要考慮,唔係咁簡單想做就做到,但係我好開心終於搵到自己想做嘅嘢,成個人即刻refresh咗,做人如果無夢想,同條鹹魚有咩分別?

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 211790
Date: 2020-11-24 11:23:27
Generated at: 2021-01-17 16:47:06
Permalink: https://www.vjmedia.com.hk/articles/2020/11/24/211790/我唔想打死一世工!