呢個時勢仲想轉工有人工加，係咪傻咗？

「我send咗幾十份cv但係一個電話都收唔到，而家個市係咪真係好差？」我說。
「睇下你咩位啦，細位唔算好大影響，經理級就慘喇，好多都降一半人工走嚟見 助理，你呢啲中間位唔多唔少都有影響。」做hr嘅朋友Macy說。
「咁唔怪得無人in我啦，我expected salary仲寫得高過而家呢份。」我說。
「呢個時勢仲想轉工有人工加，係咪傻咗？你知唔知而家幾多人無嘢做？12月無咗保就業會更大鑊。」Macy說。
「但係轉工就係為咗加人工，當然都有一大半係想逃離本身個地獄。」我說。
「咁你本身有份工做緊就無咁驚嘅，睇你想唔想快啲走啦。」Macy說。

做咗七、八年嘢，轉過幾份工，每份工都係有加薪先轉過去，魚唔過塘唔肥，轉工係可以令人工升得快啲，因為喺同一間公司度做，加極有限，但係而家個市咁，確實係有啲影響，好多人都因為搵唔到工而壓價。Expected salary係你覺得自己值幾多錢，我好多時都會寫高少少，因為HR九成九都會壓價，但係仲有好多其他因素影響，例如係你已經裸辭咗好急需要搵工，又或者有頭家要你養等等。

如果係以前，可能我已經裸辭咗，但係疫情沒完沒了，唯有邊搵邊做，而家好多公司都cut budget，我自己果間都係，就算請人，都只會揀最低價嘅嚟in，質素一定無咁好，因為唔夠經驗，請返嚟仲要教同執手尾，但公司就係貪佢平。成日聽人講話疫情影響就點點點，其實都要睇返咩行業，例如IT、醫護等行業其實影響無咁大，同digital有關嘅行業需求仲可能會增加。

雖然「媽劇停」真係有啲影響，但係我仲有份工做緊，所以都係決定唔降價住，最近亦開始收到interview電話，身邊有朋友一樣係無降價，覺得降咗就返唔到轉頭，cv會唔靚，真係搵唔到就當畀自己休息吓先，大佬仲有幾十年工要返，抖幾個月都唔係好過份啫，當然呢個情況只適用於有少少積蓄嘅人。

無論係朋友或者親人，都可能會喺搵工呢個topic畀意見你，包括我而家喺度亂嗡，有人叫你自降身價，有人又叫你吊高嚟賣，有人叫你忍一時風平浪靜，有人又叫你裸辭啦做個有骨氣嘅人，但係其實佢哋都唔清楚你嘅能力，你工作嘅情況，你一直重視嘅係乜嘢，只有你自己最清楚，無論做咩決定，你都只係需要同自己交代，因為後果都係你自己承擔，絕對唔使因為其他人講嘅嘢而影響你心情。辭定唔辭？轉定唔轉？靜落嚟問吓自己就知。

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）