【現代巫師點滴】狗狗也瘋狂

文教 / 最新文章綜覽

 

 

平時白白寫好多恐怖痴線野,其實有靈力都可以好歡樂架,同乜野都溝通到,今次就分享呢單超好笑嘅狗界奇聞! 

話說不肖徒弟其實就住離島嘅,由細到大同大自然都非常接近,令佢成個家族都有強大靈力(?),同動物都有好深嘅緣份。加上離島小平房個個門口都有田有花園,啲動物當然係喺外面看門口兼周圍走啦,甚至過去搵隔離屋隻狗玩完,夜晚先返黎食飯! 

徒弟仔由細到大都有隻傻金毛叫Lucky,係爸爸養嘅狗黎嘅。Lucky大佬都有咁上下年紀嘅時候,屋企人怕無其他狗狗看門口,或者無寵物陪爸爸會悶,所以就領養左一隻黑色嘅唐狗小白(係丫又叫小白),不幸好早就死左,不過今次故事唔講住黑狗小白住,而係講之後再領養一隻叫Jack嘅臭臉唐狗(真的很臭!買玩具比佢玩都嬲左成村人咁樣!),等Lucky又無咁悶,如果Lucky百年歸老嘅時候,都有其他狗狗比爸爸寄托下。 

但事與願違,爸爸比Lucky更早回到天家了,而Lucky亦都差不多時間前後腳咁走咗… R.I.P. 

剩低嘅阿Jack當然唔開心啦,原本有兩隻狗一齊玩,變左得返自己一個(臭臉!)… 咁徒弟仔就去左領養多一隻唐狗返黎,諗住可以陪下Jack無咁寂寞,而徒弟仔亦都係第一次領養狗BB,之前嘅狗都係已成年,從來佢都無經歷過狗BB成長嘅過程。 

就係因為咁,BB係大哂嘅,徒弟仔明顯地好偏心!當正呢隻小狗狗係寶咁養,日日喺Ig/Fb不停刷!呢隻萬千寵愛在一身嘅狗狗,就當然有個開心嘅名啦,叫做Happy! 

Jack啲咁臭臉嘅叛逆青年,主人又死埋,平時屋企個大佬Lucky又死埋… 狗狗Jack內心OS: 

「明明呢個屋企係我揸旗架喎?做咩啲注意力去哂隻新黎嘅傻仔Happy到呢?!呢個地方根本唔屬於我,我要去尋找我嘅狗生!」 

就係咁,叛逆青年Jack離家出走了! 

咁又唔係走好遠嘅,隔離屋羅。佢去左隔離有14隻狗嘅外國人屋企討拍!咁啱隔離嘅仔仔又好鐘意阿Jack,成日同佢玩,又亂比野佢食,仲有咁多豬朋狗友陪佢(隔離啲狗堅曳堅污糟!簡直係狗界嘅街童廢青…),緊係樂而忘返啦! 

但係隔離屋其實只想一時爽,無話要負責任喎,入黑之後Jack無家可歸,又返返黎徒弟仔屋企。 

Jack因為同啲街童狗友玩左一排,加上隔離屋嘅人當佢如珠如寶,學壞哂,返到黎屋企就完全地叛逆唔聽話,做錯野一話佢,佢就走過去隔離屋討拍學是非!諗住閂閘鎖佢喺花園唔比佢過隔離,Jack就專登入屋痾屎痾尿!(邊隻狗教嘅!同我出黎!)完全就好似啲啱啱落地嘅乖女菲傭姐姐,出去坐左兩個星期學是學非,返到黎屋企就跳草裙舞乜都唔做,又呢又路!(笑~咁講野會唔會比啲左膠咬我呢~) 

徒弟仔忍唔住了,同媽咪商量過都覺得呢隻狗係養唔到落去,明明養黎看門口嘅,看更自己出走係咩玩法?徒弟仔就穿越次元,同過左世嘅金毛大佬Lucky傾下計… 

「Lucky… 點算阿,你同阿爸走左之後Jack完全唔聽我地講!」 

「由得佢!佢要走咪走羅,你阻到咩?」Lucky一副大叔中佬格咁講。 

「好啦…幫我聽日同隔離屋講下…」 

問完大佬Lucky之後,徒弟仔第二日就走左去隔離屋同個外國人講,既然佢地咁鐘意阿Jack,又要餵佢,又要同仔玩,養埋佢啦咁!就係咁,阿Jack就過咗去隔離啦~(白白按:其實有分別咩?你地啲狗都係周圍走…) 

喺Jack過咗去隔離屋嘅第一晚,新領養返黎個隻小Happy個樣就好似食咗屎咗,開心狗變傷心狗!縮埋牆角懷疑狗生!呢班狗啲內心戲有冇多咗少少?!隻隻啲感情性格都好出,其他人啲狗會咁麻L煩架咩? 

當然嘈住咁話比隻狗隔離,件事點會咁快完丫?嘈黎嘈去搞黎搞去,唔知點樣得出咗個最後決定,就係大家「交換」隻狗,徒弟仔比咗阿Jack隔離屋,要換返一隻好老嘅狗女MayMay返黎,其實擺到明就係隻狗太老了,唔想要,又想推比人… 徒弟仔見到小Happy憔悴嘅樣子,都知道點都要搵多隻狗返黎陪架啦,半推半就,就話試養一星期再講啦。 

MayMay第一日返到黎屋企,就好抑鬱症咁縮埋牆角,連飯都唔肯食,其實佢係好乖、好溫柔嘅狗女黎,徒弟仔就「問下」佢到底做咩事啦… 

「做咩事丫MayMay?做咩唔食飯?有肉食喎~」 

「鳴鳴… 佢地杯葛我…」 

「下下下?」 

「鳴鳴鳴…」 

「乖啦,食飯啦,無事啦,呢邊無人蝦你啦~好無?」 

傾完一輪之後,MayMay就乖乖地肯食飯了… 途中最好笑嘅係,當哄緊MayMay食飯嘅時候,隔離屋另一隻唐狗(唔知名)無啦啦走左過黎拍門,因為MayMay過左黎,有人搶左佢條女!? 

(拍!拍!)狗狗用手拍鐵閘。 

「喂,你唔好拍我對門喎~ MayMay做咩事?」 

(拍!拍!)繼續拍… 

但係睇見MayMay唔多睬佢咁,可能都係單戀嘅乘數多…(笑)… 

到底呢班狗係咩事呢?兩間屋嘅狗狗係到上演狗界溏心風暴! 

呢個世界有樣野叫做同頻共震,如上即下,如下即上!狗界溏心風暴係可以轉到人間界都爆炸!媽咪又聽埋聽埋阿姨啲是非,話咩隔離啲狗唔好,又話肯定係因爲隻狗老,又唔知有無病,先至想推比其他人養… 明明徒弟仔一早同媽咪傾好哂先拎隻狗過黎,唔夠半日就媽咪就反口了!徒弟仔就火都黎,話阿媽點對隻老狗,日後就點對返佢!呢個時候徒弟仔就走咗黎同白白呻… 

「大大…好嬲羅,人地講一句佢就信哂,我都話試一星期啦,有咩病痛問題都會知,夾唔夾到都會知,佢做乜?發咩癲啫?可唔可以尊重下我?(下刪千字..)」 

「拿,冷靜啲先。其實,就啲狗喺到溏心風暴,你地卷埋入去做咩事呢?可摸以唔好咁?」 

「哎,咁點算阿而家?」 

「其實呢,呢隻狗係留唔到喺到,而阿Jack轉頭就返黎了,你地嘈乜叉呢?」 

「我都覺。」 

「MayMay嘅功用就係引爆你羅,佢嘅工作完左,可以返屋企啦~」 

「Errr………..好啦,養一個星期拎返過去!」 

由於世界由2012年大揚升之後,時間其實行快左好多,明明一星期先要發生嘅野,可以縮短到一日就發生… 話口未完,第二日徒弟仔又搵我了… 

「大大,真係唔掂,媽咪嘈完我,又去搵阿妹係到嘈嘈嘈,我都話左一星期就拎返過去,佢嘈乜啫而家?」 

「停!拿,你聽日即刻拎返隻狗過去。而家隻狗仲喺到,你狗有藉口嘈你嘛,消滅左件事咁咪無野嘈,問題消失了就不是問題!完!」 

「好…聽日就返去KO佢~」 

咁歡樂嘅事就準備出文同大家分享嘅,點知我都未寫完哂,件事又有新進展啦!!!大家佔下係咩事? 

就係叛逆Jack自己爛咗返徒弟仔屋企… 

可唔可以唔好咁?!!!!(唔好咁好笑!?) 

走又係佢自己要走,仲要周圍痾屎痾尿抗議!過到去唔夠三日,就發現人地其實當佢係草!食飯又無啖肉食,得狗糧!白白從來都未見過阿Jack死狗到咁嘅樣!(極好笑!)真係憔悴到一個點~明明前兩日都仲串柒柒,以爲搵到新主人,開展新生活,點知自己死返黎!而家徒弟仔就算唔關門,阿Jack都唔敢自己行左出去了… 

之後白白同徒弟仔同時望望大佬Lucky… Lucky完全一副戴黑超嘅大佬格… 

「話L咗佢啦~」 

「大佬好野!」白白同徒弟仔甘拜下風! 

狗大佬真係狗大佬!連點整治隻細狗都知,真係寫個服字比佢! 

就係咁,狗狗大戰就暫告一段落啦~~~下次再講下白白同徒弟仔嘅同名黑狗「小白」嘅故仔啦~係咁先~ 

聖誕快樂啦喂!

 

 

作者:小白

擁有超凡視力的人,低調解說平行空間。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 212755
Date: 2020-12-25 06:19:29
Generated at: 2021-01-18 15:04:47
Permalink: https://www.vjmedia.com.hk/articles/2020/12/25/212755/【現代巫師點滴】狗狗也瘋狂