「我最喜愛」和「民主」

 

健吾按:關於頒獎典禮和我最喜愛,我沒什麼補充。因為我在2020年11月的《903國民教育》說過了,還被wasabi 說我為什麼要那麼勞氣。 有些事情,香港人不是想知道理,他們喜愛那個愛罵就罵,沒有成本的發洩位而已。

 

不如,講下呢樣野?

 

呢個星期,有好多網友係度講,點解我最喜愛歌手,有張國榮。都已經咁多年啦,其實大家有冇認真咁了解過,呢個大家好似好中意討論既頒獎禮,係點玩既呢?

而係呢件事上,就好反映到,香港人其實唔係好在乎,亦都唔係好知道,民主係d咩。首先,呢個遊戲係咁既。每年,都有好多派台歌,只要派台歌成為左入榜作品,就可以被投票。

我唔知你地記唔記得,有一個故事,我要講好多次架啦。當你冇聽過咁講啦。有一年,有一首歌,係播到入左榜,所以大家有機會投,投完之後,有份唱既歌手,仲要對傳媒講,話大台唔播。我心諗,哦,呢個歌手,係覺得呢個台,唔係大台。

果首歌,最後成為左大家投既我最喜愛歌曲。

果首歌,叫《撐起雨傘》。

呢d係歷史,發生過既事實,一切係網上都係搵得返既。大家可以搵返黎睇下。

而當時,冇人覺得呢個相對寬鬆既機制,有咩問題架。因為,賽果合大家心水丫嘛。

好啦,而家有張國榮入圍,有d人就懶幽默咁係度講:「點解冇鄭錦昌」、「點解冇四大天王」,好簡單,今年,佢地有冇歌派台?有冇派台之後,播到入左榜?

有既話,佢地都可以被選。

而當投票既人,只需要提供一個手機號碼就可以登記做選民,之後佢地係揀既時候,覺得揀唔落手,係覺得張國榮係我最喜愛,咁又點呢?畀唔畀佢投?你又尊唔尊重呢d民意?

我讀書既時候,係中大入面,有一個老師叫陳健民,當年佢教「民主與社會」既時候,佢講左兩個概念,一個係選舉權,一個係被選舉權。而我係日本修美國政治課既時候,當時教我地既prof abbott 就講左一個概念,如果你因為結果而要修改制度既話,首先你要問,你修改既制度,係收緊兩權,選舉權同被選舉權,咁都係違反民主原則既。不過,當然,我最記得既,abbott 成日都話,當權者改制,一定唔係為左令民主機制更完善,而一定一定一定一定一定係為左私利,係為左令自己既既得利益擴大。

呢個星期,有一個音樂平台,亦都公佈左一個名單,呢個j 字頭的音樂平台,第三季的最受樂迷喜愛既本地歌曲,係姜濤既孤獨病。影劇原聲單曲,就係泰劇《只因我們(仍然)天生一對》win metawin 既片尾歌,《那一個定是你》。kpop 就係blackpink 既 how you like that。而k 歌呢?係張國榮既《有心人》。

點解冇人去話果一個音樂平台,搵死人黎玩?

點解有咁多k歌出現,係要畀張國榮?

一個人,死左可唔可以入選?如果因為今次有咁既所謂爭端,而要改制度既話,touchwood 如果有一個歌手,佢一年成績都好好,但不幸悴逝,又會唔會有人話,點解佢死左,我想畀佢,唔畀我畀?

有咩獎,係死人唔拎得既呢?有,有一個。好出名既。諾貝爾。諾貝爾獎,係唔會追頒畀死左既人既。

而同時,我唔知賽果,我亦都冇份開任何既會,我只係話,我以一個只有一票,我只係用左一個手機登記啦,只有一票既選民而言,我對住張名單,我真係最喜愛張國榮,而佢又係名單入面,我投佢,有咩錯?

都係一句,如果大家真係好尊重一樣野叫民主,首先,你問下自己,你相唔相信選舉權同被選舉權,同埋你覺得係咩情況,咩前設之下,就需要改制度。而改左制度之後,會唔會又因為制度改左之後,賽果不乎大家「預期」,又要改返過黎。

更好笑既係,有d人話,點解佢入選,唔問下家人同意。我想問,呢一個人,有冇諗,你既人生入面,你被喜愛同不被喜愛,你有咩話事權?我做節目,我擺事實講道理,我可以選擇你喜愛我抑或唔喜愛我咩?既然喜愛同唔被喜愛,都唔使得到本人同意,你亦都唔會理本人同唔同意就會喜愛同唔喜愛一個人,更何況係佢家人,又或者係佢朋友?

都係果一句,如果你覺得有人濫用制度,可以話果個人濫用制度。你覺得制度唔完善,可以話制度可以修改。但唔該,唔好話咩拎死人黎玩,唔尊重點點點。當個制度出既結果係大家都喜愛,或者唔敢講佢唔喜愛,就叫公平公正。當時點唔同,同一個制度又出現一d 某部份同意,某部份人唔同意既結果,你唔係話我知個制度唔啱,唔去了解個制度,年年都問同一條問題:點解有古天樂,點解有黎明,點解有張國榮?

如果你真係想知點解?我可以好簡單咁講一句:因為佢有歌派台,有入榜,亦都有人投票畀佢。講完。

而深入一d既話,我就會話,香港人,你從來都唔了解民主制度既細節,只係覺得有票投,而我投既果個贏左我就係好勁,好醒,好有眼光。咁你呢一世,都唔會睇到香港係政治上出現令香港社會更好既民主制度,因為你唔係關心制度,你只係關心你果一下,有冇買中馬既快感。

森美說,如果你覺得驚訝,只是你不了解世界。林海峰說,這是希望告訴香港年輕人是有出路的。陳義那麼不一樣。但都係果一句,要講既,一早講左。其他野,冇咩好解釋。

 

Become a Patron!

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 212986
Date: 2021-01-02 20:56:57
Generated at: 2021-04-14 12:38:55
Permalink: https://www.vjmedia.com.hk/articles/2021/01/02/212986/「我最喜愛」和「民主」