無人想知你無睇《XXXX》

 

諗返幾年前韓國嘅《來自星星的你》大熱,好多女人都沉迷當中,唔係爭住話金秀賢係自己嘅就真係妄想症發作,啲女朋友痴線到係咁話想食炸雞要男友隨時送到,大陸啲女人真係因為男友無隨傳隨到而飛條仔,以為自己係千頌伊。另一邊廂啲男人係咁踩男主角個湯碗頭,但聽返佢地又忍唔住會陪睇,可能睇TVB啲師奶劇太多有新鮮感啦~

不過一樣米養百樣人,有人迷都會有人睇,甚至有人鍾意別樹一幟覺得唔跟熱潮好有品味,然後紛紛share圖話自己一集都無睇去笑鳩啲追劇嘅人。睇下,香港人從來都係咁,「我唔睇、我唔知、我有品味、我好威」,其實自己唔睇關人鬼事咩,有品味定無品真係自己衝出嚟話俾人地知。用眼尾睇一兩集唔鍾意,當然係可以,但真係有必要去踩咩?你踩都阻唔到個熱潮㗎嘛,吸引唔到你但吸引其他嘅好多人喎,大眾就係咁喎。自己鍾意嘅嘢你有無落下力去推廣過呢?對於自己鍾意嘅嘢你想有後續唔係推廣俾更多人知,好過去踩自己唔鍾意嘅嘢多咩?

香港人嘅風氣真係痴線㗎,覺得鬧嘢重要過推動嘢,自己鍾意嘅嘢從來無好好令佢持續落去,但就花心機去鬧唔鍾意嘅嘢,到咗自己鍾意嘅嘢無咗嘅時候又係道怨婦咁話可惜,從來無諗過點樣珍惜。今次姜濤事件就係好好嘅一課,唔好理903個機制,係你個行動力係邊。點解會有一堆純粹留意到個世界點運行嘅人浮上水話俾啲後生仔機會先?因為係一種寄望,好似林海峰咁講「年輕人係有希望」,你話佢地無實力努力都唔吸引,我反而想年輕人知道努力係有得追理想,姐姐我真係好鍾意支持啲年輕人㗎嘛~(心心)你有穩定收入,無得去旅行都有staycation,生活去到安穩,點解純粹鼓勵下為理想努力嘅年輕人都唔肯,反正你想睇嘅勁嘢高質嘢,上下網都會搵到晒,外國五光十色乜都有,你本身想睇乜都有,咪推啲小朋友出去由佢地係香港自由發展,覺得唔係你想要嘅水平咪認真小小話佢地知有乜嘢要改進囉,橫點平時都插人唔使責任,夠膽係其他group鳩屌唔敢係佢地小平台認真評語呀?定純粹搵個發洩對象嚟發癲呀?

有無諗過係快畢業時自己嘅理想係咩呀?有無試過瞓身去追呀?定有啲咩阻礙令你放棄呀?我就好可惜無得諗理想,中一阿媽離世嗰刻我個腦第一句係「頭家靠我啦」,就係咁我一直只計算係最少學歷下可以有穩定收入同假期,做到啦但講出嚟就心流淚。所以《全民造星》系列真係好吸引我去睇,唔完美都為理想努力,贏咗唔代表得到咩,但佢地就係努力俾人睇到進步,將自己最好嘅嘢展示出嚟,「喂!我有潛能㗎,俾機會我啦」佢地每個俾我嘅訊息係哩樣,好想自己做唔到嘅嘢年輕人可以有機會爭取,我何嘗唔係想入演藝,唔去學舞台劇都去學跳Jazz,那有錢?那有機會?「姐姐真係好鍾意支持年輕人㗎!」踩佢地嗰啲老屎忽,你地食屎啦!長江後浪推前浪,睇下幾時你地收皮摺埋。

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 213003
Date: 2021-01-03 22:45:53
Generated at: 2021-06-20 21:23:39
Permalink: https://www.vjmedia.com.hk/articles/2021/01/03/213003/無人想知你無睇《xxxx》