新一年請遠離潑冷水朋友

 

「唔好辭職呀,呢段時間你搵唔到工㗎!」
「想學豎琴?好難㗎,睇你都係3分鐘熱度!」
「你諗住開cafe?疫情喎,開咗都係等執笠!」
「去台灣working holiday?你一條友邊搞得掂,唔夠一個月你就返香港啦!」

朋友有好多種,有啲係盲撐型,你做乜佢都支持,正面鼓勵你,即使明知你做錯咗都會照撐;有啲係理性型,支持又好唔支持又好,都會同你一齊分析吓件事嘅利弊,等你自己決定;有啲係聆聽型,默默聽你講,表示明白同理解,令你個心覺得舒服啲,好多時人要呻唔係需要一個解決辦法,只係想有人聽吓自己講嘢,抒發吓感受;最後一種係潑冷水型,無論你想做咩,就算只係一個idea,佢都會即刻ban你,睇死你做唔到,有時仲會踩多幾腳話你能力有問題,做乜都唔會成功。

做朋友唔係要你做擦鞋仔,淨係俾讚唔俾踩,因為如果身邊只係圍繞盲撐朋友其實都唔好,只係唔使乜都踩,互相尊重都係做朋友嘅基本禮貌,可能有啲人嘅性格係咁,每件事往往都係睇到唔得嗰面,然後同你講想提醒你,只係用字好mean,當然我唔排除有啲人鍾意踩低人抬高自己,你可以聽完就算,佢有佢講,你有你做,但係人始終會受人影響,日日有人同你講你唔得,終有一日你會開始懷疑,我係咪真係唔得呢?我係咪真係咁差呢?

每件事都有成功同失敗兩個結果,但係過程其實一樣重要,以開café為例,可能最後真係無生意要執笠,但我相信喺整個過程上一定會學到嘢,識多咗人,身心都有成長,成功同失敗,其實可以由自己定義,如果樣樣嘢未開始就放棄話唔得,咁人生已經無晒樂趣,不如咩都唔好理日日食瞓痾算。

無論係朋友定係另一半,當你同呢個人一齊嘅時候,佢成日都對你不滿,令你成日覺得自己好差,咩都做唔到,好負面,其實已經響起咗警告,人嘅性格係唔會改,亦都唔應該要求人改,合則來,不合則去,新一年,對自己好啲,遠離潑冷水朋友啦。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 213016
Date: 2021-01-04 07:13:47
Generated at: 2021-01-18 14:27:30
Permalink: https://www.vjmedia.com.hk/articles/2021/01/04/213016/新一年請遠離潑冷水朋友