識煮嘢食嘅人真係特別charm

 

「喂,你覺唔覺得Ryan煮嘢食果陣真係好charm?」死黨阿花突然問。
「覺呀,咁男人認真做嘢果陣不嬲都charm㗎啦,佢仲要煮得咁好食。」我說。
「咁點解你唔考慮吓佢啫?有個廚師男朋友,晚晚都有好嘢食喎!」阿花說。
「超,我自己都識煮啦而家,同埋初七都有返堂食,如果識煮嘢食就有人鍾意,就唔會有咁多廚師單身。」我說。
「你可唔可以唔好咁mean?」阿花說。
「咁你可唔可以唔好催我溝仔?新年流流係咪想我同你開年。」我說。

無可否認,識煮嘢食嘅人真係會特別charm,係會加分,之前認識好多台灣朋友,佢哋大部分都識煮嘢食,仲要煮得好豐富好好食嗰隻,以前有段時間我同個台灣女仔一齊住,就算佢得一個人都會煮嘢食,有時仲會煮埋畀我食,佢話一人份仲難煮,南乳雞翼、咕嚕肉、枝竹羊腩煲等等乜都識整,真係入得廚房,出得廳堂,我係男人都想娶佢,相反,我嗰陣就成日煮公仔麵,頂多炒隻蛋,貪佢快靚正,同埋一個字:懶,真係正宗經典頹廢宅女。

話說有次聚會要每人整一樣餸,我就整蘿蔔炆牛腩,因為平時無煮開嘢食,我驚會好咸救唔返,於是就落咗好多水,搞到完全無味,勁失敗,而家諗返都覺得死蠢,其實可以用蠔油同生粉水較返個汁救返,不過果陣唔識無計,雖然碟嘢超難食,但係有個朋友都好有義氣食晒佢,真係好感動,同時勁唔好意思,後嚟我就決心要洗底,舊讀者應該都有睇過我嘅「地獄廚神」系列同最近嘅「懶人料理」系列。

其實我本身好鍾意食好西,所以都鍾意煮嘢食,但係往往都係三分鐘熱度,硬係無乜動力,不過最近比較得閒,又可以多返喺屋企煮飯,我呀媽成日都話:「唔識煮飯,搵鬼娶你!」其實我從來都唔覺得唔識煮飯係會嫁唔出,只不過無論男女都好,煮嘢食都算係一個技能嚟,同埋煮得好食,成功感大,自己又有啖好食,何樂而不為?與其想搵個識煮飯嘅男人,不如將自己變成識煮飯嘅女人仲方便快捷。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 214154
Date: 2021-02-12 17:54:12
Generated at: 2021-10-27 11:09:19
Permalink: https://www.vjmedia.com.hk/articles/2021/02/12/214154/識煮嘢食嘅人真係特別charm