不如政府防疫專家唔好出事先落街?平日去下餐廳戲院做下消費者?

 

 

新冠肺炎疫情持續,位於尖沙咀新世界旗下K11 MUSEA 餐廳「名潮食館」有員工染疫,更成為超級傳播者。

港大微生物學系講座教授袁國勇一句「鮮風不足」,被各方「廣泛引用」,商場業主新世界更加以此為名單方面終止租約,無視租戶所用工程公司都由業主介紹。

袁國勇係一位優秀學者,佢習慣喺學術期刊被引用,佢以為政治生態、商業社會同埋傳媒嘅世界,係好似學術界咁樣,引用嘅時候唔可以扭曲結論,唔可以斷章取義。

身為一名學者,佢每每爆疫出事之後,到事發地點視察,然後發表觀察評論,但係佢嘅評論,有幾多人真係研讀完之後做跟進研究然後制定有效措施?無。

就好似今次,佢已經講到明,「名潮爆疫有兩大可能,包括短距離空氣傳播和食具交叉感染」(明報),然後按此提供一個在場觀察:「店內部分位置空氣流動低」。點知全部人唔係利用佢呢個觀察真係做研究,而係業主賴租戶自己搞成咁累街坊然後判死刑終止租約,我反而真係想知,個別租戶係咪可以改動舖位嘅空調系統。

其次教授本身根本無觀察到食肆客人,乃至商場其他遊人嘅行為。新冠肺炎作為一個飛沫傳染嘅病,人與人之間點樣接觸,係傳播關鍵。

教授請你去唔同餐廳食下野,去貴價野都唔好包房,坐大廳,你睇睇啲好高貴嘅食客,有啲人食到咁上下走來走去,去廁所、講電話、同部長吹水,好不熱鬧,全部唔戴口罩,成間餐廳俾佢播滿口水;去啲平民餐廳,唔食都好,你望入去,睇下啲人點樣搭檯,或者所謂「隔籬檯」嘅隔籬可以幾咁近,而嗰塊咁嘅膠板,遮檯唔遮人係幾咁形同虛設。

喺消費嘅過程當中,去多兩轉廁所,行多幾次附近社區,教授你應該會觀察到,呢啲行為每一刻都發生緊,諗住點防,定唔防,定係好似今次咁,講完樣嘢出來,然後業主終止租約,就好似個社會為防疫做左好多野咁?

 

作者:容樂其

我覺得總編輯都有得出文係常識囉!

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 214417
Date: 2021-03-02 18:02:53
Generated at: 2021-05-16 02:16:09
Permalink: https://www.vjmedia.com.hk/articles/2021/03/02/214417/不如政府防疫專家唔好出事先落街?平日去下餐廳