黃店請手足不方便的真相

講真啦，生活安穩，
有份正職嘅絕大部份都冇行到咁前，
畢咗業，有萬零兩萬蚊人工，
或者有家庭有後顧之憂嘅就更加唔會衝到最前，
因為大家仍然有不完美但還算可接受嘅現實。

仗義每多屠狗輩，
對自己生活完全不滿意，冇希望，
毫無後顧之憂嘅先會放手一搏。

做家長照顧得越多仔就越知道，
好多有重Case係身乜乜魔法師小朋友，
本身一係情緒有問題，
一係同人相處或者社交都有問題。

點解我會講番起小朋友，
係因為依幾日大家都講緊黃店，
我知道嘅有啲黃店，
係請咗好多依啲而家無人理嘅小朋友，
係架，佢哋好難攪㗎，
遲到甩底態度差乜都齊，
但係好多有心人都仍然會繼續請佢地，
希望可以教好佢哋。

有啲黃店啲服務真係好閪㗎，
咁係咪代表佢哋唔識做生意呢？
其實係㗎，
如果真係為咗做生意搵錢嘅話，
點解要請呢啲服務態度又衰，
做嘢又求其，
又會無啦啦放飛機嘅人呢？
點解唔好地地請返啲做開果行嘅人呢？
點解要請啲乜都唔識，唔熟手嘅新人呢？

然之後有啲人去到嗰啲舖頭，
接受咗啲唔好嘅服務，
周圍講嗰間舖頭服務差，
今時今日咁嘅服務態度邊度得呀，
都唔知係咪做生意㗎，
咁樣做其實係迫個老細炒晒依班小朋友。

我當然明白冇人願意貼錢買難受，
都冇人希望自己受到啲不禮貌嘅對待，
但係呢個就係所謂請手足嘅難處。

邊面啱邊面錯我真係唔知道，
但我希望大家會對黃店多一份包容，
特別係嗰啲，唔會淨係周圍抽水，
真係明知需要付出代價，
都用心為個社會，
為班手足出一分力，
做一啲事嘅同路人。

作者：焦總的蕉很腫

閱讀後覺得好，請多多讚好及分享～：）