追女仔,最緊要快?

 

初初三九唔識七,喺app度講咗唔夠十句嘢就話約出嚟其實係有少少無奈,除非你有吳彥祖咁靚仔同高大(雖然都會覺得係sell保險或者中醫),無論係女人定男人都可以係外貌協會成員,未睇到你內在美,梗係睇你外在啦,話唔係都係呃你嘅啫,咁講係有啲mean但呢個係事實。

傾計嗰陣唔係話唔可以讚女人嘅外表,咩靚呀、可愛呀、斯文等等,但身材就真係唔好亂讚,讚得唔好,好易會變咗變態,如果傾咗一段時間覺得幾夾咪flirt吓,但都要睇下對方反應點,會唔會flirt返你轉頭,定係無啦啦靜咗,好似樹熊加塊葉個emoji咁。

最好搵吓大家有無共同興趣,例如鍾意做咩運動、聽咩音樂、去邊度旅行、最近有無睇咩戲等等,如果真係搞唔掂,唯有出絕招,就係食好西!民以食為天,我唔信無人鍾意食好嘢,須知道食好嘢唔等如食貴嘢,去性價比高嘅餐廳先係皇道,你估個個都係富二代咩?好快食窮你!如果唔知邊度有好西食就要follow我嘅patreon喇哈哈(植入式廣告XD)。

當然,真人相處始終係最重要,約人出街其實都係一門學問,有啲人會拋個時間出嚟問你:「星期五得唔得閒食飯?」然後如果你話唔得閒,佢又拋另一個時間,不斷loop,其實可以直接問對方幾時得閒,感覺以對方為先,不過要有少少熟嘅程度先好問,唔係好易已讀不回,同埋如果人哋次次都話唔得閒,好忙,其實已經可以收皮,有心同你出去,幾忙都會抽到時間,或者話你知幾時會得閒啲。唔使次次都齋約食飯嘅,有其他活動玩吓會無咁悶,即係睇吓戲、行吓山、跑吓步等等。

出得幾次街其實都feel到大家有無意思,係咪可以發展吓,然後有啲人就好急要即刻一齊,勁chur成日問。太快一嚟無乜安全感,二嚟感覺勁喉禽,雖然我唔排除有啲人真係一拍即合,有相逢恨晚嘅感覺,其實追女仔,可唔可以慢啲?然後朋友Ryan即刻答嘴:「痴L線!追女梗係要快,唔係比人搶咗點算!同埋唔得咪第二個囉,唔好嘥大家時間,係咁㗎啦,好出奇呀?」

「可唔可以做我女朋友?」有日朋友Dave問。

「畀啲時間我考慮吓先。。。」我說。

「咁可唔可以拖住手先?」Dave問。

「唔可以。」我說。

「點解?」Dave問。

「我都唔係你女朋友。」我說,突然覺得自己考慮完。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 215072
Date: 2021-04-06 12:55:55
Generated at: 2021-10-26 23:54:06
Permalink: https://www.vjmedia.com.hk/articles/2021/04/06/215072/追女仔,最緊要快?