30歲未結婚又有乜好驚?

 

「細細個果陣呢,我最想就係30歲前結婚,35歲前生仔。」我說。
「吓,你過咗喇喎!」朋友阿花說。
「想同做不嬲都係兩回事嚟㗎啦,而且過咗30歲就好似Mario食咗無敵星星咁,乜都唔驚㗎喇,隨緣啦。」我說。
「喂,唔好咁灰啦,唔好咁快放棄呀。」阿花說。
「我無放棄喎,只係年紀到咗咁上下,經歷得多,諗法就會唔同咗,好多嘢都睇化咗,順其自然啦,最緊要自己開心。」

老老實實,我從來都無擔心過自己會嫁唔出,而家咩年代呀?女人唔使靠男人養㗎喇,我自己都養得起自己啦,以前就話女人一生嘅成就就係嫁個好老公啫,而家唔係㗎喇,女人都可以有自己嘅事業,追求夢想/理想,當然亦可以追求愛情,做一個幸福嘅家庭主婦都可以係一個目標嚟,分分鐘仲難過要做CEO,因為愛情唔係付出就有回報,亦唔係一個人就做到,仲有好多其他因素影響。

我唔係事業型女性,我都想要愛情,但我真係接受唔到是但搵一個就算,寧缺勿濫呀,可惜就算我唔擔心,唔知點解身邊嘅人都會好替我擔心,一時話要介紹啲所謂「筍盤」畀我,一時又要我轉造型,改頭換面,其實我真係幾滿意現狀喎,好彩我都唔係一個會受人控制嘅人,亦唔會為咗滿足其他人對自己嘅期望而委屈自己,因為人只會得寸進呎,單身就催你拍拖,拍拖就催你結婚,結婚就催你生仔,生完仔又催你生女,我當然知道佢地係「關心」我,但我都係想按返自己步伐慢慢嚟。

其實如果唔打算生小朋友,遲婚/唔結婚真係無乜問題,無錯,如果真係想生小朋友,最好就35歲前生,復原快啲,BB又健康啲,但而家科技先進,其實過咗35歲都一樣生到嘅,有啲嘢真係逼唔嚟,感情同生仔都一樣。

30歲之後最大嘅領悟就係以自己為先,照顧自己嘅感受係最重要,要令自己過得開心快樂,然後跟據吸引力發則(我亂講XD),就會自然會吸引到更多快樂嘅人同事。好簡單,兩個女人,一個成日笑,一個成日苦瓜咁款,係人都揀笑果個啦係咪先?然後可能有人問:「如果笑果個好醜又無身材呢?」ER…我決定呢條問題交畀男讀者們回答XD

 

P.S. 最近終於有時間同心情寫番文,大家久等了!

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 215122
Date: 2021-04-09 23:10:35
Generated at: 2021-10-27 04:44:16
Permalink: https://www.vjmedia.com.hk/articles/2021/04/09/215122/30歲未結婚又有乜好驚?