人愈大愈難搵工?

 

 

「喂,你仲想做幾耐廢青,究竟有無搵工㗎?」朋友阿花說。
「我有搵㗎,send咗幾十封cv喇!工都見咗五、六次,不過無聲氣咋嘛。」我說。
「咁疫情都有啲影響,失業率都高咗,不過最近個市好似好番啲,加油啦!」阿花說。
「疫情係其一啦,其二我覺得人大咗人工高咗,工都難搵啲,我個爛鬼title仲要無升過,跟本同個人工唔match,直接跳級apply啲senior位又好似唔夠經驗。」我說。
「咁你唔好再做細公司啦,得你一條友升鬼咩,搵間大公司啦。」阿花說。
「係人都想做大公司啦,有先得㗎…」我說。

話咁快我都已經搵咗幾個月工,雖然唔算係好急咁搵,因為仲有freelance做吓未至於無錢開飯,但係一路都無offer都有啲灰心,以前真係見親都多數請,仲可以喺度揀做邊份好,仲會懶叻覺得自己果陣準備充足,面試表現好所以請,但而家會諗係咪純粹果陣人工低呢?或者好彩遇到公司急要人呢?最慘係最近份份工嘅HR/management見工果陣都顯得好有興趣,講到好大機會有second in咁,但最後又係等,寂寞到夜深…

過咗30歲,好多嘢都要認真思考吓,因為時間話多唔多,話少唔少,好似已經無咩時間再去hea咁,成日都聽話外國啲人呀隨時都可以揹個backpack就放自己一年break,但係香港人呢?你幾個月無返工已經畀HR問到你口啞啞啦,局住要話自己讀咗啲乜乜課程/做兼職/freelance,點解唔可以直接話我想休息抖抖?因為佢哋會覺得你懶,唔夠勤力,唔夠搏命,work life balance?食得㗎?

身邊好多朋友都開始讀master或者係其他有cert嘅課程,我真心好佩服佢地,返完工散晒都仲有心力去讀書,我都有試過去讀Photoshop同AI,因為而家啲工成日要Marketing人做埋design個位,但我真係好唔鍾意,學咗都無乜點用過,好快已經唔記得晒,Digital marketing嘅嘢keep住都變緊,真係去讀個course嘅話讀完都過咗氣,而且實戰機會其實更重要,而返工就係有最多實戰機會。

有啲工作上嘅前輩都有提點過我唔好浪費時間,唔好煲劇睇動畫,做多啲對自己有益嘅事,增值自己,吸收知識,唔係第時就會後悔,其實我都明白,但人總有懶散嘅時候,橡根吓吓扯到行都會斷,所以而家就當係邊搵工邊休息,多啲陪屋企人、另一半、朋友同埋好好享受自己獨處嘅時刻,一個人煮吓嘢食、做吓瑜伽、寫吓文,每日都過得好充實。

一世人流流長,就算第時有幸爬到上高位,賺到好多錢,都未必買到而家嘅輕鬆同快樂。人生就係不斷用時間同快樂去換錢,然後再用錢去買番啲時間同快樂番嚟,其實都幾可笑。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 215620
Date: 2021-04-28 05:47:21
Generated at: 2021-10-26 11:39:23
Permalink: https://www.vjmedia.com.hk/articles/2021/04/28/215620/人愈大愈難搵工?