究竟last day 要唔要派散水餅？

「我公司個小鮮肉要辭職喇，做咗幾年同事，點都有啲唔捨得，所以大家送晒禮又請食佢食飯。」朋友晴晴說。
「哎呀，你以後返工咪無晒動力囉？」我說。
「唔講呢啲住啦，重點係佢last day竟然無派散水餅呀！」晴晴驚訝地說。
「吓？係咪佢太細個，無見過人last day，唔知要派餅呀？」我說。
「Of course not！餅都食過幾次啦，我見佢好似無買仲溫馨提示佢，點知佢都無反應，仲有佢之後只係返兼職但竟然扣晒所有假，一星期就走！留咗一堆屎畀我哋執！」晴晴說。
「咁絕…」我說。

出嚟做嘢好多時都有啲潛規則，無講到明，但人哋會預咗你做，last day派散水餅都算係其中一樣，其他就例如係新同事第一日返工會同佢食welcome lunch，去完旅行要派手信等等，你唔做，無人會話你錯，但係做咗會好啲，其實都係啲人情嘢，睇你識唔識做。

如果份工做得唔長，probation都未過，咁就梗係唔使派啦（雖然我都見過有人照派），但係如果做超過一年，我就一定會派，老土啲講句，做得同事都算係一場緣份，無論中間開心唔開心都好，一齊相處嘅時間都長，分分鐘仲對得多過屋企人，呢件散水餅就當係我答謝佢哋一直以來嘅照顧。

感性完就去返理性層面，呢個社會一直都係識人好過識字，我會希望大家好嚟好去，因為你永遠唔會知道第時有無機會見返呢堆人，你亦唔知道將來會唔會有一日突然間要搵某某幫忙，多個朋友點都好過多個敵人。

至於派咩餅又係另一門學問，要睇同事多唔多，如果多就派平啲嘅嘢，或者啲獨立包裝嘅嘢食，因為人多派餅係有啲麻煩，我見過有人拎住成七、八盒西餅，逐件派，睇見都覺得佢辛苦，如果同事人數少，感情又好就可以派啲貴嘢或者心思嘢，anyway，都係一份心意，大家開心吓。

至於扣唔扣假走，我就通常睇我同啲同事嘅感情有幾好，同埋新工有幾趕，自己想唔想休息等等，正常都會留少少時間handover，當然你可以話都辭職啦，使乜理咁多，日日hea住做等出糧，或者扣晒假即日走都得啦！都係果句，無話唔得，除非公司唔畀，有啲公司係一定要一個月通知期，寧願補返錢畀你，同樣地亦有公司會逼你扣晒啲假提早走，因為驚你留喺度搞搞震，所以真係間間唔同做法。

識做人，喺職場上點都會易過好多，禮多人不怪，老土但永遠啱用。

P.S. 暫時我聽過最慘嘅係last day買完過千蚊散水餅仲要畀人屈請所有同事食lunch…我以前通常last day係同事請我食lunch，我派餅，有來有往，你哋呢？

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）