朋友,並唔係要嚟搵笨㗎!

 

「喂,我最近搞緊網店賣衫,但係唔識做online marketing,可唔可以教我?」十年無見嘅朋友Grace突然同我講。
「你具體係想做啲咩?」我說。
「未諗㗎,都係落吓FB、Google廣告果啲,我畀啲相同價錢你,你幫我執吖。」Grace說。
「你係想我幫你整?你話我知總共要整幾多樣,幾時要完成,我再quote個價畀你啦。」我說。
「唔使咁大陣象!我哋咁熟,想你幫吓手咋,好簡單啫,你click幾吓就搞掂,啲字係咁二寫就得。」Grace說。
「Hey,咁簡單你自己搞都得啦,使乜我啫。」我說。
「我就係唔識先要搵你幫嘛,你做開咁熟手,唔係唔幫掛一場朋友?」Grace說。
「幫緊你,幫緊你,呢度收得唔係幾好呀,得閒飲茶再傾啦喂!拜拜!」我說。

我自問都唔係一個爛好人,唔係個個都會幫,你估而家好得閒咩?一日得24小時咋!首先,我同呀Grace已經十年無見,通常好耐無見嘅人突然搵你,唔係借錢就係sell保險,佢都算好啲嘅,想要廉價勞工啫,吖唔係,無錢收嘅,佢純粹係想搵我笨啫。如果好聲好氣,虛心學習,我都打算教佢基本嘢,但係佢老馮嘅態度真係令我無名火起,乜叫人幫手嘅態度係咁嘅咩?最憎啲人似熟賣熟,仲要唔熟果下先無奈。

就正如啲十九腦細咁,成日壓designer價,覺得佢哋幫手改吓字改吓圖啫,使唔使咁貴呀,就咁click幾吓咋嘛,但係佢哋從來無諗過呢個係人哋嘅專業,花咗幾多時間去讀去學,中間拆過幾多問題,先有足夠經驗喺你面前click幾吓就搞掂,當然都仲有個原因係某啲人做爛市,腦細成日都話:「上次一張圖$200搞掂啦,使乜畀咁多。」於是以後個budget就變咗$200樓下。

人愈大發現朋友其實唔使多,交心嘅幾個已經好夠,時間耐咗你就會慢慢將啲朋友分類,交到心講到心事嘅,你知道無論係你有事或佢有事,一定都會兩脇插刀幫手,甚至親過兄弟姊妹,有啲雖然好少見,但係一出到嚟就會有講不盡嘅話題,一見如故,有啲就係吃喝玩樂嘅朋友,有啲係百科全書,問佢咩都識答,有啲只係Hi bye friend。

而搵你笨嘅朋友總係會無啦啦彈出嚟,有一種係同佢唔太熟,通常都勁厚面皮,漁翁撒網,叫你去聽talk其實係傳銷,叫你買中醫package啦,幫你做financial planning啦,呢種明刀明槍其實好易防,無乜殺傷力。可惜另一種係「唔熟唔食」,通常有一定交情,你亦唔會諗佢係咪呃你,好容易中招,不過經一事蔡一智,跌跌撞撞之後你就會更加珍惜到而家都仲係真心對你嘅朋友。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 215913
Date: 2021-05-16 12:57:24
Generated at: 2021-06-21 05:17:38
Permalink: https://www.vjmedia.com.hk/articles/2021/05/16/215913/朋友,並唔係要嚟搵笨㗎!